Dosar Biboron 32 - সান্তালী বাইবেল

¹ “E serma, ińakʼ kathako luturakʼme; E Ot, ińakʼ moca reakʼ katha ańjomtińme.

² Ińakʼ cecetʼakʼ do jạṛi dakʼ leka ńurokʼma, ińakʼ katha do sisir dakʼ leka rińjikʼma. Legecʼ ghãs cetanre poroe poroe dakʼ leka, ar aṛakʼ sakamko cetanre achaṛ dakʼko lekage.

³ Iń do Probhu Isorakʼ ńutumiń jạhirtaea. Ape do aboren Isorakʼ ṭhonok reakʼ sarhaotaepe.

⁴ “Uni kangeae asray buru do, uniyakʼ kạmi do sạbitgetaea; uniyakʼ sanam horko do hok reakʼ kana. Uni do ṭekʼhãḍicʼ Isor kanae, unire jãhãn behokakʼ do bạnukʼanaṅ; uni do sạri are dhoromgea.

⁵ “Acʼren hoṛko do unire bạṛicʼko beohar akada. Onkoakʼ dos dạgi iạte uniren hopon ar hoponera doko baṅkana. Onko do bin pạtiạran ar phepṛa hoṛ kanako.

⁶ E bebuj, ar bin ạkilan jạtrenko! Probhu Isor do cetʼ nonkagepe halawaea? Uni do cetʼ aperen baba ar sisirjạuicʼ doe baṅkana? Unige coṅ ape mae sirjạu akatʼpe; ar jạtrenko lekate unige ape doe kajak akatʼpea.

⁷ “Sedaeakʼ ona dinko reakʼ katha disạipe; aperen ḍher din laharen hapṛamkoakʼ kathako baṛe hudispe. Onako din reakʼ kathako aperen apatko ṭhen kulijoṅpe, onko do apeko lạiyapea; ar haṛam hoṛko kulikope, onko do apeko bujhạuapea.

⁸ Maraṅ Isor do tinre eṭakʼ jạtrenko sompottiye hạṭińatʼkoa, ar manwa hoponko tinre eṭakʼ eṭakʼ jạtreye hạṭińketʼkoa, unre Israel jạtrenkoakʼ lekhae disạ dohṛaketʼte eṭakʼ jạtrenkoakʼ simạnakoe ṭhik dohoatʼkoa.

⁹ Probhu Isorakʼ bakhra do acʼren hoṛkoge; ar Jakob doe Israel jạtena acʼakʼ ạidạri bakhra.

¹⁰ “Uni do hahaṅkar disạmreye ńamkedea, hińjrạukʼkan mitʼ nisun jaegare. Uni doe esetʼ ạcurkedea, are jotonkedea; ar mẽtʼ reakʼ joti lekage uni doe horhokedea.

¹¹ Pajhaṛ cẽṛẽ acʼakʼ tukại ebhenetʼtae hoponko cetanre phạ̃kṛạ̃kʼe phad phadaoetʼtaea, ar cetʼleka onko cetanre uni do lap lapae uḍạukʼkan, ar cetʼleka onko rakapʼko lạgitʼ acʼakʼ phạ̃kṛạ̃kʼe lap lapakakʼkan, ar cetʼleka acʼakʼ phạ̃kṛạ̃kʼte onkoe gugu idiyetʼko.

¹² Probhu do eskarge uniye ạyur ạguyedea, uni sãote cele debota hõ bako tahẽkana.

¹³ “Uni do pirthimi reakʼ usul jaegareye decʼ sen ocokedea disạm reakʼ mitʼ buru khon eṭakʼ burute; ar ot baṛge reakʼ phosole jom ocokedea. Uni do dumur rasa hõe cepecʼadea buru khoṅkor khon ńamokʼakʼge, uni do cạṭạni dhiri khon jạitun sunum hõe emadea.

¹⁴ Uni do palrenkoakʼ dahe ar bhiḍi meromko reakʼ toa, ar bhiḍi hoponkoakʼ jele jom ocokedea, Basan disạmren palren merom bodakoakʼ itil do guhum reakʼ mĩhĩ holoṅ tulucʼe jom ocokedea. E Israel, am do darkha reakʼ rasagem ńũ akada.

¹⁵ “Menkhan Jisurun doe moṭayena are phandakeda. E Jisurun, am do ḍher jomte ạḍim moṭayena. Ona tayom uni do acʼren sisirjạuicʼ Isore bạgi giḍiadea, ar acʼakʼ asrayokʼ buru hõe nihạ̃t giḍikada.

¹⁶ Ạnạṛi Isor sewawae iạte uni do ạḍiko ãṭ ocokedea, ar hirkhạwakʼkoteko khĩs ocokedea.

¹⁷ Onko do bạṛicʼ jiuko teṅgenatʼkoa. okoe do Isorko baṅkan, onko do nãwã boṅga ńutumte samaṅokʼakʼ porobko porobena, okoe do sor din lahareko upelakan, okoe do aperen hapṛamko bako botorakokan tahẽkan.

¹⁸ Ape do ona asray burupe nihạ̃t giḍiakada okoe doe aperen babakan; uni Isor dope hiṛiń akadea okoe do eṅgat leka bedon talate noa dhạrtiteye ạguakatʼpe.

¹⁹ “Ona ńelte Probhu Isor do acʼren hopon ar hoponerako khon acʼakʼ mẽtʼãhãe danaṅketʼtaea, ente onko do edreteko khĩs ocoakadea.

²⁰ Uni doe menkeda, “Iń do onko khon ińakʼ mẽtʼãhãń danaṅtińạ, ar sesre cetʼ hoyokʼtako onań ńela; ente onko do peṛta pirthimi ar bin pạtiạran hoponko kanako.

²¹ Isore baṅkan nonkanicʼko sewawaekante ar bako botorạńkante onko do ińko ãṭ ocoakadińa; ar onkoren boṅga murhutʼko iạte ińko khĩs ocoakadińa. Okoe do jạtrenko baṅkan onkoakʼ tire soprotkate onkoń jaljalao ocokoa; ar mitʼṭen bebuj jạtrenkoakʼ tire soprotkate onkoń khĩs ocokoa.

²² Ińakʼ edre do seṅgel leka salgao akana; ona seṅgel do khạndri Seol hạbicʼ jolokʼkana. Ona seṅgel do dhạrti ar ona reakʼ sanamakʼ phosolkoe joma ar buruko reakʼ rehetʼko hõe jeretʼakʼa.

²³ “Iń do joto lekan muhinko ạgukate onko upạrteń jarwaea; ar ińakʼ sarko do onko cetanreń teraṅa.

²⁴ Onko do reṅgecʼteko loraokʼa ar durdurạukʼ ruạ ar bisanakʼ rogteko capoṭokʼa. Onko upạrte iń do kaṭaha janwarko ar dhuṛire leńokʼkan bisan bińkoń kolkoa.

²⁵ Onkoren hopon ar hoponerako do nagraha bahrere tarwaṛe reakʼ hạnteko gujukʼa, ar oṛakʼ bhitrire botorteko udạsokʼa. Onkoren juạn koṛa ar kuṛiko, kạṭicʼ gidrạko ar haṛam buḍhiko doko marao utạrokʼa.

²⁶ Iń doń menleda, onko doń kaṭra kuṭrạ cabakoa, manwako tala khon onkoakʼ disạ doń meṭao utạra.

²⁷ Menkhan iń doń baḍaekan tahẽkana bạiriko do bạḍạiteko perejokʼa ar begor bujhạuteko roṛa baṅma onkoakʼge jitạu do hoyakana; Probhu Isor do noako reakʼ cetʼge bae ceka akada.”

²⁸ Israel jạtrenko talare bhage solha emokʼ hoṛge bạnukʼkoa, ente onko do jãhãn buj sujge bạnukʼtakoa.

²⁹ Ạklinanko tahẽlen khan honaṅ ona kathako bhujhạukea ses dosa cetʼ hoyokʼtakoa mente.

³⁰ Mitʼ hoṛ do cekate hajar hoṛkoe lagakoa, ar bar hoṛ ńelte cekate gel hajar hoṛko ńir pharakokʼa, onkoakʼ asray buru bạirikoakʼ tire onko bae ạkhrińleko khan, ar Probhu Isor hõ bạirikoakʼ tire onko bae soprot leko khan?

³¹ Bạirikoakʼ asray buru do aboakʼ asray buru leka do baṅkana, noa do aboren bạirikoakʼ bicạr phanḍaoakʼ kana.

³² Probhu Isore meneda, “Onkoakʼ darkha nạ̃ṛĩ do Sodom reakʼ darkha nạ̃ṛĩ khon ar Gomora reakʼ khet khonge omon akana. Onkoakʼ darkha nạ̃ṛĩre do bis menakʼa, ar darkha thopako do haṛhatʼgetakoa.

³³ Onkoakʼ darkha rasa do bińakʼ bis leka, ayaṅ bińakʼ botoranakʼ bis lekage.

³⁴ Ona do iń ṭhen doho-baege menakʼa, ińakʼ dhon oṛakʼre mohor chapakatʼge.

³⁵ Behok reakʼ sạjại emokʼ reakʼ ạidạri do ińakʼge; okoeyakʼ oka kuṛại onage uniń emaea. Okte purạulen khan bạirikoakʼ jaṅga do leńjedokʼtakoa; onkoakʼ maraokʼ reakʼ din do sor hecʼakana. Onko lạgitʼ oka ṭhik dohoakan, ona do usạrage onkore paṛaokʼa.”

³⁶ Probhu Isor tinreye ńela, acʼren hoṛkoakʼ daṛe do caba akana, guti se sạdhin okoeyakʼ daṛege bạnukʼa, unre uni doe acʼren hoṛko sejokʼa, ar acʼren gutiko cetanreye mãyãkʼa.

³⁷ Unre uni doe mena, “Okayenako onkoren debotako do? Okayena onkoakʼ ona buru do one okareko asraylen?

³⁸ Okayenako onko debotako do okoe do onkoren teṅgen janwarkoakʼ itilko jomletʼ, ar onkoakʼ coḍor samaṅokʼakʼ ar darkha rasako ńũletʼ? Ńitokʼ onko do hecʼkateko goṛowape ma, ar asray hõko emape ma.

³⁹ Ńitokʼ hudisokʼpe ar ńelpe ińkangeạń uni do; iń chaḍa ar cele Isorge bạnukʼkoa. Ińge gogocʼicʼ ar ińge jiwetʼicʼ, ińge ghạghạlicʼ, ińge bokʼgeyicʼ; ińakʼ ti khone bańcao daṛeakʼ nonkan celege bạnukʼkoa.

⁴⁰ Iń do serma secʼ ti tiạr kateń meneda, jaejugiń jiwetʼ leka iń meneda,

⁴¹ Ińakʼ malkaokʼkan tarwaṛe iń doń lasertińạ, ar bicạr reakʼ ray purạu lạgitʼte ona doń saba, ar ińren bạirikoń sạjạikoa, okoe ińko hirkhạwạń onko do kuṛạiyiń emkatakoa.

⁴² Makʼ gocʼ ar bondi akan hoṛkoakʼ mãyãmiń ńũ ocoyte ińakʼ sarkoń bul ocoytińa; ar ińakʼ tarwaṛe do jele joma, bạiriren mukhiyạkoren mathako reakʼge.

⁴³ E sanam jạtren hoṛko, Probhu Isorren hoṛko sãote uni baṛe sarhaoepe, ente acʼren gutikoakʼ mãyãm reakʼe hala hạliya, uni do acʼren bạirikoe sạjạikoa ar acʼakʼ disạm ar acʼren hoṛkoakʼ kại ikại reakʼe bondobosa.

⁴⁴ Mose ar Nunren hopon Josuạ do senkate noako sereń sanam hoṛkin ańjomatʼkoa.

^45-46 Mose do sanam Israelko noako katha galmaraoakoe mucạtʼketʼ khane metatʼkoa, “Okako katha ape samaṅre goha leka tahen lạgitʼ teheńiń metatʼpe onape disạ dohokakʼa ar ạn-ạriko joton salakʼpe manaote aperen hopon ar hoponerakope hukum daṛeako.

⁴⁷ Ape lạgitʼ noa do ạuṛi katha baṅkana, menkhan apeakʼ jion kangea. Jordan gaḍa tinrepe paromokʼa ar ona disạmpe dokhola unre noako kathape dohoya ar ḍher din jiwetʼpe tahena.”

Moseyakʼ gujukʼ reakʼ katha

⁴⁸ Enhilokʼ Probhu Isor do Moseye metadea,

⁴⁹ “Am do Jerikho samaṅ reakʼ Moab disạm reakʼ Abarim buru reakʼ Nebo muthnite dejokʼme ar sompotti lekate Israelko okaṭakʼ Kanan disạmiń emako lạgidokʼkan ona mitʼ dhao ńelme.

⁵⁰ Amren dadam cetʼleka Hor reakʼ burureye gocʼente acʼren hapṛamko ṭhene senen onkage amhõ Nebo bururem gujukʼa ar amren hapṛamko ṭhenem senokʼa.

⁵¹ Cedakʼ je, Sin hahaṅkarre Kades reakʼ Meriba-dakʼ ṭhen Israel hoponko talare iń tulucʼ biswạsben rạputʼleda ar Israel hoponko talare baben sonotledińạ.

⁵² Onate okaṭakʼ disạm Israelkoń emako lạgidokʼkan ona do eken sạṅgiń khonem ńela menkhan onḍe do bam bolo ńama.”