Dosar Biboron 31 - সান্তালী বাইবেল

Mose tayom Josuạ

¹ Mose do Israelren sanamkoe metatʼkoa,

² “Ińakʼ umer do mitʼsae bargel bochor hoyakana. Iń do ar bạń kạmi daṛeakʼkana. Probhu Isor doe men akawạdińạ, iń do jordan gaḍa bạń parom daṛeakʼa.

³ Aperen Probhu Isor do acʼge gaḍae parom idipea are ạyurpea. Ar ape samaṅ khon onko jạtrenkoe marao cabakoa ar ona disạmpe dokhol joṅa. Probhu Isorakʼ katha lekage Josuạ do gaḍa paromkate ape laha lahateye calakʼa.

⁴ Amorikoren Sihon raj ar Og rajakʼ disạm Probhu Isor cetʼlekae jarkharletʼ onkage uni do onko jạtrenkoe maraokoa.

⁵ Onko do apeakʼ tireye jimạkoa ar oka cekae reakʼ iń hukumatʼpe onape onkaea.

⁶ Daṛeanko hoyokʼpe ar monre dil dohoype. Onko ńelte alope botorokʼa se alope thar tharaokʼa, ente Probhu Isorge ape sãoteye tahena. Uni do tishõ bae bạgiyapea.”

⁷ Inạ tayom Mose do Josuại hohoadea ar sanam Israelko samaṅre uniye metadea, “Daṛean hoyokʼme ar monre dil joṅme ente amge noko hoṛko sãote ona disạmte calakʼ hoyokʼtama one okaṭakʼ Probhu Isor do nokoren hapṛamko ṭhen emokʼ lạgitʼe gokʼletʼ. Ar amge ona disạm do sompotti lekatem hạṭińakoa.

⁸ Probhu Isor do acʼge am laha lahateye senokʼa ar am sãoteye tahena. Uni do tishõ bae bạgi giḍimea. Alom botorokʼa, ar alom torasokʼa.”

Ạn-ạriko paṛhao reaṅ

⁹ Mose do ạn-ạriko olkate Liwi gusṭiren naekeko, okoe do Probhu Isorakʼ goha sindukko gokʼ bhạriạ idiyetʼ tahẽkan, onko ar Israelren sanam murubbiko onae ematʼkoa.

^10-11 Uni doe hukumatʼkoa, “Mimitʼ eaeakʼ bochorre, metakʼme rin khon chaḍaokʼ bochorre chạuni porob jokhecʼ Israelko tinre Probhu Isor samaṅre hạjirokʼ lạgitʼ uniyakʼ bachao akatʼ ṭhạ̃iteko calakʼa unre noa ạn-ạripe paṛhao ańjomakoa.

¹² Herel hoṛ, maejiuko, aperen gidrạko apeakʼ judạ judạ ato ar nagraharen eṭakʼ jạtren hoṛko mitʼ ṭhenpe jarwakoa, jemon onako ańjom daṛeakʼte aperen Probhu Isorko botorae ar ạn-ạriko joton salakʼko palon daṛeakʼ.

¹³ Nonkate onkoren hopon ar hoponerako, okoe do noa ạn-ạri reakʼ katha bako baḍaekan, onko hõ onako ańjoma ar noa sikhnạtko ńama, jordan gaḍa paromkate okaṭakʼ disạm dokhol lạgitʼpe calakʼkan onḍe onko do jiwetʼ jonom Probhu Isorko botoraea.”

Hul reakʼ nạbi katha

¹⁴ Inạ tayom Probhu Isor do Moseye metadea, “Amakʼ gujukʼ din do sor hecʼakana. Am do Josuạ hohowaeme ar ńapamokʼ tạmbu ṭhen hạjirokʼme. Onḍe uni do kạmi reakʼ bhariń emaea.” Onate Mose ar Josuạ do ńapamokʼ tạmbu ṭhen senkate Probhu Isor samaṅrekin teṅgoyena.

¹⁵ Unre Probhu Isor do rimil reakʼ khunṭi talare ona tạmbureye sodorena ar ona rimil khunṭi do tạmbu reakʼ duạr ṭhen senkate teṅgoyena.

¹⁶ Probhu Isor do Moseye metadea, “Am do amren hapṛamko ṭhen giticʼ lạgitʼem calakʼkana, menkhan noko hoṛ okaṭakʼ disạmko bolo lạgidokʼkan onḍe onko do ạnạṛi deb debi ṭhenko ạkhrińokʼa arko laṭghaṭa. Onko do ińko bạgiyińạ ar oka bondobosiń doholetʼ ona hõko rạpuda.

¹⁷ Ar unre onko upạrte ińakʼ edre jolokʼtińa ariń bạgi giḍiyakoa ar onko khon ińakʼ mẽtʼãhãń danaṅtińạ; arko marao utạrokʼa. Unre onko cetanre duk-kosṭo ar muhinko hecʼ paṛaokʼa. Ar enhilokʼko mena, ‘aleren Probhu Isor ale sãore bạnuite alere noa muhin do paṛao akana.’

¹⁸ Debotako secʼ ạcurkate oka bạṛicʼakʼko kạmi ona iạte iń do khạṭige ińakʼ mẽtʼãhãń danaṅtińạ.

¹⁹ “Ńitokʼ ape do noa sereń ol dohokakʼpe. Noa do Israelkope cetʼakoa ar onkope sereń ocokoa, jemon onko upạrte mitʼṭecʼ goha leka hoyokʼ.

²⁰ Onkoren hapṛamko ṭhen gokʼakʼ ona toa ar dumur rasa ạtukʼkan disạmte tinreń idikoa ar tinre lacʼ bikʼko joma arko tirpitokʼa unre onko do eṭakʼ debota secʼko ạcurokʼte, onkoko ḍobokʼakoa ar ińko nihạ̃tińa ar ińakʼ bondobosko rạpuda.

²¹ Onko cetanre tinre ḍher duk-kosṭoko hijukʼa unre niạ sereńge onko upạrte goha lekae teṅgona, ente onkoren bõsko do noa sereń bako hiṛińa. Ente kiriạ akawatʼko gokʼakʼ disạmte idiko laharege iń doń baḍaea onkoakʼ ontore cetʼ menakʼa mente.”

²² Ar Mose do enhilokʼ ona sereń olkate Israelkoe cetʼatʼkoa.

²³ Probhu Isor do Nunren hopon Josuạ noae hukumadea, “Daṛeanicʼ hoyokʼme ar monre dil dohoyme. Ente oka disạm emokʼ lạgitʼ iń gokʼletʼ ariń kiriạlen onḍe do amgem idikoa. Ar ińge am sãoteń tahena.”

²⁴ Mose do ses hạbicʼ noa ạn-ạri reakʼ sanamakʼ kathako mitʼṭecʼ puthireye ol dohokada.

²⁵ Ar ona tayom Probhu Isorakʼ bondobos reakʼ sinduk gogokʼ Liwikoe metatʼkoa,

²⁶ “Ạn-ạri reakʼ noa puthi idikate Probhu Isorakʼ bondobos reakʼ sinduk aṛere dohokakʼpe. Noa do Israelko upạrte goha leka tahena.

²⁷ Ar cetʼ lekan keṭecʼ hoṭokʼan ar huhulko kanpe ona doń baḍaegea. Ape talare jiwetʼ iń tahenrege Probhu Isor upạrtepe huhulkan khan ińiń gujukʼ tayom do tinạkʼ artetʼpe onkaea!

²⁸ Ape do ape gusṭiren murubbiko ar sanam kạmiyạko iń samaṅre jarwakope. Iń do noa metakoń khojkana ar serma ar ot hõ onko upạrte goha mente doho hõń khojkana.

²⁹ Ińiń baḍaea, ińakʼ gujukʼ tayom ape dope kharapokʼa ar oka horte calakʼ reakʼ iń hukumakatʼpe ona khon dope ghańjeṛokʼa. Ar onate darakan dinkore ape cetanre muhinko hecʼ paṛaokʼa, ente Probhu Isorakʼ mẽtʼre oka bạṛicʼakʼkan onagepe kạmiya ar apeakʼ tite benao akatʼko boṅga murhutʼ iạte unipe khĩs ocoyea.

Moseyakʼ sereń

³⁰ “Ona tayom Mose do noa sereń reakʼ kathako pạhil khon mucạtʼ hạbicʼ sanam Israelkoe ańjomatʼkoa: