Dosar Biboron 30 - সান্তালী বাইবেল

Probhu Isor ṭhen ruạṛ hijukʼ reakʼ jo.

¹ “Apeko samaṅre oka bhor ar sarapiń sodorketʼ ona sanamakʼge ape cetanre hijukʼa. Ona tayom Probhu Isor okoe jạtrenko talare tinreye chirchạturpea ar onko talarepe girobasokʼa unre ape do noako kathape moneyakʼa.

² Ar onako dinre ape ar aperen hopon ar hoponerako tinre Probhu Isor ṭhenpe ruạṛ hijukʼa ar teheń okako hukumiń emapekan onape dohoyte mon ar ontorte uniyakʼ sana lekape taṛama,

³ unre Probhu Isor do bondi dosa khone chaḍao ruạṛ ạgupea. Uni doe mãyãwapea ar okoe jạtrenko talareye pasnaope onko tala khon arhõe halaṅ samṭao ruạṛpea.

⁴ Serma reakʼ ses simạnakorepe giḍi ocokʼre hõ Probhu Isor do onḍe khone halaṅ samṭao ạgupea.

⁵ Uni do aperen hapṛamkoakʼ disạmteye ruạṛ ạgupea ar ape do arhõ onape hat ruạṛa. Uni do ạḍiye bhạlạiypea ar aperen hapṛamko khon hõ ḍhere saṅge ocopea.

⁶ Ar jemon apeakʼ goṭa mon ar ontorte unipe dulạṛete jiwetʼpe tahen ona lạgitʼ ape ar aperen bõsko ontorreye khatna ocopea.

⁷ Aperen Probhu Isor do aperen bạiriko cetanre noako sarape ạguiya one okoe do apeko hirkhạ apekan arko santaoetʼpe.

⁸ Unre ape do arhõ Probhu Isorakʼpe bataotaea ar uniyakʼ okako hukum teheń iń emapekan onape manaoa.

⁹ “Unre aperen Probhu Isor do sanamakʼteye bhạlạiypea. Uni do kạmikoreye bhorapea ar aperen hopon ar hoponerakoe saṅgekoa, mĩhũ-meromkoe bạḍ ocokoa ar jumi reakʼ phosole ḍher ocoytapea. Aperen hapṛamko cetanre uniyakʼ oka rạskạ tahẽkan ape cetanre hõ ona rạskạ iạtegeye bhạlạiypea.

¹⁰ Khạjuk aperen Probhu Isorakʼpe bataotae ar noa ạn-ạri puthire olakan uniyakʼ sanam hukum ar niạmkope manao arpe senakʼte mon ar ontorte uni secʼpe ruạṛ hijukʼ.

Jion se Moron

¹¹ “Teheń okań hukum apekan ona manao ar ona leka senokʼ ape lạgitʼ jãhãn keṭecʼakʼ do baṅkana se noa hukum hõ ape khon ḍher sạṅgińakʼ do baṅkana.

¹² Noa hukum do sermare dohokakʼ jinis hõ baṅkana, onatepe men botecʼkea, ‘sermate do okoeye dejokʼte onae ạgua bona ar ańjomkate ona leka bon sen daṛekokʼ?’

¹³ Noa do jalapuri cetan reakʼ jãhãn jinis hõ baṅkana, onepe menke, ‘jalapuri paromkate do okoe bhala onae ańjom ocolea jemon onale manao ar ona lekale sen daṛekokʼ?’

¹⁴ Probhu Isorakʼ katha do ape soṅgetege menakʼa; ona do apeakʼ mocare ar ontorre dohokakʼpe ar ona leka colonpe.

¹⁵ “Ńelpe, teheń ape samaṅre okań sodoretʼ ona do Jion se bhạlại ar Gujukʼ se bin bhạlại reakʼ kangea.

¹⁶ Teheń ape ṭhen ińakʼ hukum do noage, aperen Probhu Isorpe dulạṛea, uniyakʼ hortepe calakʼa ar uniyakʼ hukum ar niạmkope manaotaea. Enḍekhan ape do jiwetʼpe tahena ar lekhatepe saṅge idikʼa, ar okaṭakʼ disạm dokhol lạgitʼpe senokʼkan onḍe aperen Probhu Isor do apeye bhorapea.

¹⁷ “Menkhan apeakʼ ontor uni khon ocogokʼtape ar uniyakʼ bape bataotae ar eṭakʼ debotako ṭhenpe ḍobog arpe sewawako,

¹⁸ enḍekhan teheńiń metapekana, ape do khạṭigepe ḍahao marao utạrokʼa. Ar jordan gaḍa paraomkate okaṭakʼ disạm dokhol lạgitʼpe senokʼkan onḍe ḍher din jiwetʼ bape tahena.

^19-20 “Teheń serma ar ot do ape upạrteń goha ocoyetʼkinạ, iń do jion ar moron, bhor ar sarapge ape samaṅreń dohoakada. Jionge bachao joṅpe, jemon ape ar aperen hopon ar hoponerako jiwetʼpe tahen ar aperen Probhu Isorpe dulạṛete uniyakʼ kathape ańjom ar unirepe sapʼ kajak akae tahen, ente noakorege apeakʼ jion do menakʼa. Ar okaṭakʼ disạm emape lạgitʼ aperen hapṛam Abraham, Isahak ar Jakob ṭhene kiriạlen onḍegepe girobasokʼa.”