Dosar Biboron 3 - সান্তালী বাইবেল

Basonren Og raje bhagao ocoyen

¹ “Inạ tayom abon do ạcurente Bason secʼakʼ horte bon sen idiyena. Ar Basonren raj ar uniren lạṛhại phạdko do abo sãote lạṛhại lạgitʼ Edreyi nagrahareko oḍok hecʼena.

² Unre Probhu Isor do ińe metadińạ, ‘am do alom botoraea, ente uni ar uniyakʼ disạm ar lạṛhại phạdko do amakʼ tireń jimạ akatʼkoa. Am do Hesbonreye tahẽkan Amorikoren Sihon rajakʼ oka halotem hoeoco akatʼtae onkage nuiyakʼ hõm hoeocoytaea.’

³ “Nonkate aboren Probhu Isor do Basonren Og raj ar uniren sanam lạṛhại phạdko aboakʼ tireye jimạletʼkoa. Ar abon do onko sanamkoge bon gocʼketʼkoa; cele hõ jiwetʼ do babon doholetʼkoa.

⁴ Ona jokhecʼ abon do uniyakʼ ato ar nagrahako bon hatketʼtaea. Uniyakʼ turui gel goṭecʼ nagraha reakʼ joto nagrahage bon dokholkeda; ar mitʼṭen hõ babon sarecʼ oṭoleda. Goṭa Argog ṭoṭha, metakʼme Bason tala reakʼ Ogakʼ goṭa rajosṭige abo dobon dokhokeda.

⁵ Noako nagrahako do usul pạcrikote esetʼ ạcur tahẽkana ar onare do phaṭok duạr ar hurkạṛko hõ tahẽkana.

⁶ Abon do onako ato ar nagrahako purạte bon marao giḍiletʼ tahẽkana. Hesbonren raj Sihon bon cekalede onkage onkoren herel hoponko, maejiuko ar gidrạko ar mimitʼ atoko ar nagrahako jotogebon marao utạrleda.

⁷ Menkhan onḍe khon sanam janwar ar luṭ ạguwakʼ jinisko do apnar lạgitʼ bon ạguwan tahẽkana.

⁸ “Ona jokhecʼ abo do Arnon gaḍa khon Hermon buru hạbicʼ jordan gaḍa purub secʼ reakʼ jaegako do nukin banar Amorikoren rajakʼ ti khon bon recʼ hataoan tahẽkana.

⁹ Hermon do Sidonren hoṛko Sirion ar Amoriko do Senirko metakʼkana.

¹⁰ Ar onako bilạn ṭạnḍi reakʼ sanam atoko ar nagrahako, goṭa Gilead ṭoṭha ar Basonren raj Ogakʼ rajosṭi Salka ar Edre hạbicʼ goṭa Bason disạmge abo dobon dokholkeda.

¹¹ Rephiyikoren sarecʼ hoṛko modre eken Basonren raj Ogge jiwetʼe tahẽkana. Uniyakʼ mẽṛhẽtʼ reakʼ benaoakʼ giticʼ aṭetʼ do jeleńte are moka ar osarte pon moka tahẽkana. Ona do ńitokʼ hõ Amonrenkoakʼ Raba nagrahare menakʼa.

Jaega-jumi hạṭińokʼkan

¹² “Abo bon ạidạri akawan jaega khon iń do unre Arnon gaḍa ṭhen Aroer nagraha bahre utạr secʼ reakʼ ṭoṭha ar Gilead buru ṭoṭha reakʼ adha ar onḍenakʼ sanam atoko ar nagraha do Ruben ar Gad gusṭiren hoṛkoń ematʼkoa.

¹³ Gilead disạm reakʼ sarecʼ hạṭiń ar Og rajakʼ goṭa Bason rajosṭi do Manasi gusṭiren adha hoṛkoń ematʼkoa. “Bason tala reakʼ sanam Argab ṭoṭha do Rephiyikoakʼ disạmko metakʼkan tahẽkana.

¹⁴ Manase hopon Jayir do Gesuri ar Makathikoakʼ simạna hạbicʼ goṭa Argob ṭoṭha dokholkate apnarakʼ ńutum lekaye dohokeda. Onate ńitokʼ Bason do Habot-Jayirko metakʼkana.

¹⁵ “Ar Makir do Gilead ṭoṭhań emadea.

¹⁶ Menkhan Gilead khon Arnon soḍokʼ reakʼ adha simạ hạbicʼ sanam jaega ar onḍe khon Amonrenkoakʼ simạna Jabok gaḍa hạbicʼ iń do Ruben ar Gad gusṭiren hoṛkoń ematʼkoa.

¹⁷ Pạchim secʼ onkoakʼ ses simạna do Araba jordan gaḍa reakʼ okaṭakʼ hĩs do Kineret khon Pisga buruko reakʼ dhasna reakʼ Araba doreão, metakʼme buluṅ doreão hạbicʼ sen akana.

¹⁸ “Ona tayom iń do onkoń metatʼkoa, ‘Aperen Probhu Isor do noa jaegage dokhol lạgitʼe em akatʼpea. Menkhan ape talare okoekoakʼ daṛe menakʼ onko do lạṛhại reakʼ khanḍa bhanḍako horokʼkate Israel boehako laha lahate gaḍa paromokʼ hoyokʼtakoa.

¹⁹ Tobe apekoakʼ okako ato ar nagrahako pạcrite esetʼ hoyen onḍe aperen bạhuko, gidrạko ar ạsul janwarkope doho oṭo daṛeakoa. Ińiń baḍaea aperen ạsul janwarko doko ḍhergetapea.

²⁰ Probhu Isor tinạkʼ din ape leka aperen boehako jirạukʼ reakʼ ạt bae emako ar jordan gaḍa hanasare okaṭakʼ disạm aperen Probhu Isor do onkoe emako lạgidokʼkan ona ạuriko ạidạri joṅ hạbicʼ ape do lạṛhạitege tahen hoyokʼtapea. Ar ona tayom do noa jaegape emocokʼa ar nonḍepe ruạṛ hecʼ daṛeakʼa.’

Mose Jordan gaḍa baṅ parom ocoae reakʼ gokʼakʼ

²¹ “Onako dinre iń do Josuạń metadea, ‘aboren Probhu Isor do nukin raj cetanre okae cekaketʼ ona do amakʼ mẽtʼtegem ńelkeda. Ar okarepe calakʼkan onḍenakʼ sanam rajosṭiko reakʼ hõ Probhu Isor do onkageye hoeocoya.

²² Onko do alope botorakoa; aperen Probhu Isorge ape secʼ hoykateye lạṛhạiya.’

²³ “Ar onako dinre iń do Probhu Isor ṭhen nẽhorenteń menkeda,

²⁴ ‘E Probhu Isor, am do maraṅ arem daṛeangea ar amren guti onam udukʼae kana. Serma ar dhạrtire okoe debota menakʼkoa, amem kạmikanakʼkoe kạmi daṛeke ar amem udukʼ akatʼ daṛekoe udukʼ daṛeke?

²⁵ Jordan gaḍa paromkate ona napae utạr disạm, metakʼme ona buru disạm ar ona Lebanon disạm baṛe ńel ocoạńme.’

²⁶ “Menkhan ape iạte Probhu Isor do iń cetanreye edreyente ińakʼ kathako do bae ańjomletʼtińạ. Uni doe metadińạ, ‘ḍher hoyakana. Niạ babotre iń do ar alom mitạńa.

²⁷ Am do Pisga buru muthnite rakapʼkate utạr- dạkhin ar purub-pạchim secʼ beṅgedme. Jordan gaḍa bam parom daṛeakʼre hõ amakʼ mẽtʼte disạm do mitʼdhao ńelme.

²⁸ Ar Josuạ cetʼe cekaea ona baṛe lạiyaeme; ona sãote udgạu ar dil emaeme, ente uni do lahate senkate hoṛkoe parom idikoa ar okaṭakʼ disạm ńel lạgitʼem menetʼ tahẽkan ona do onkom ạidạriakoa.’

²⁹ Ona iạte abo do Bet-peor mohnḍa muhnḍi reakʼ buru tala reakʼ otetre bon tahẽyena.