Dosar Biboron 29 - সান্তালী বাইবেল

¹ Probhu Isor do Horeb burure Mose hotete Israelko lạgitʼ mitʼṭecʼ bondobose doholeda, noako do ona bondobos reakʼ katha kana okaṭakʼ do Moab disạmre Mose Israelko lạgitʼ bondobos bandhao lạgitʼe metade tahẽkana.

Moabre Moseyakʼ lại sodorakʼ katha

² Mose do sanam Israelko hoho jarwakateye metatʼkoa, “Probhu Isor do Misor disạmren Pharao raj ar uniren sanam raj-kạmiyạrenko cetanre ar uniyakʼ goṭa disạm cetanre okae cekaletʼ ona do apeakʼ mẽtʼtegepe ńel akada.

³ Onkoakʼ ona maraṅ biḍạu ar Probhu Isore udukʼletʼ cinhạko ar maraṅ maraṅ hahaṛa kạmiko hõpe ńelleda.

⁴ Menkhan Probhu Isor ṭhen khon teheń hạbicʼ hõ onako bujhạu reakʼ mon, ńeńel reakʼ mẽtʼ ar ańjom lạgitʼ lutur hõ bape ńamana.

⁵ Pongel bochor hạbicʼ Probhu Isorge ape do hahaṅkar talateye idiletʼpea. Onako dinre apeakʼ hoṛmo reakʼ kicricʼ hõ baṅ lamjakʼlena ar panahe hõ baṅ heṛlentapea.

⁶ Unre piṭhạ hõ bape jomleda, darkha rasa se eṭakʼ jãhãn ńuńuteakʼ hõ bape ńamleda. Probhu Isorge ona doe onkaleda jemonpe bujhạu daṛeakʼ, Probhu kangeae aperen Isor do.

⁷ “Ar noa ṭhạ̃irepe seṭeren tayom Hisbonren raj Sihon ar Basonren raj Og do abo sãote lạṛhại lạgitʼkin oḍok hecʼlena, menkhan unkin dobon bhagaoketʼkina.

⁸ Ar unkinakʼ disạm hatkate sompotti lekate Rubenrenko, Gadrenko ar Manase khũṭren adha hoṛko do ona bon em akatʼkoa.

⁹ Ona iạte ape do noa bondobos reakʼ sanam hukumko joton salakʼ dohoype jemon sanamakʼ kạmire bhạlại hoyokʼtape.

¹⁰ “Teheń ape do sanamkoge Probhu Isor samaṅre hecʼkatepe teṅgo akana- aperen sordarko ar mukhiyạko, aperen murubbiko ar kạmiyạko ar eṭakʼ sanam Israelko hõ nonḍe menakʼkoa.

¹¹ Ape samaṅre aperen hopon ar hoponerako; ar apeakʼ ḍerareko tahenkan eṭakʼ jạtren upriạ hoṛko okoe do sahanko mamakʼkan ar dakʼko lo rakapʼ apekan.

¹² Aperen Probhu Isor teheń ape lạgitʼ oka khạṭiteakʼ gokʼakʼ ar bondobose dohoakatʼ ona gokʼakʼ ar bondobos manao lạgitʼge nonḍe hecʼkatepe teṅgo akana.

¹³ Probhu Isor do teheń onae dohoakada jemon aperen hapṛam Abraham, Isạhak ar Jakob ṭhen gokʼakʼ ar ape ṭhene kiriạlen lekate aperen Isore hoedaṛeakʼ ar teheń do acʼren hoṛe hoe ocopea.

^14-15 Ińren Probhu Isor samaṅre hecʼkate teheń okoeko teṅgo akan eken onko lạgitʼ khạṭiteakʼ kiriạ ar bondobos reakʼ iń lại sodoreda ona do baṅa, menkhan okoe do ńitʼhõ ạuriko janamokʼ onko lạgitʼ hõń meneda.

¹⁶ “Apepe baḍaegea, Misor disạmre cetʼ lekape tahẽkana mente ar cetʼ lekate eṭakʼ eṭakʼ disạmko talate paromkate nonḍe hecʼkatepe seṭer akana.

¹⁷ Unire ape do onko talare kaṭte, dhirite, sonate ar rupạteko benao akatʼko onkoren hirkhạwan murhutʼko ar boṅgakope ńelletʼkoa.

¹⁸ Teheń ape talare nonkan herel hoṛ se maejiu se jãhãe gusṭirenko aloko tahenma okoe do aperen Probhu Isor bạgikate onko boṅgako sewawako lạgitʼe lilkạrokʼkan. Ar jãhãe nonkanicʼ menae khan uni do ape talare mitʼṭecʼ rehetʼ leka kanae okoe do sesre bis ar nagdanae upcạu ocoy.

¹⁹ Ar noa kiriạ reakʼ kathako ańjom jokhecʼ okoe hoṛ do mone monete bhạganicʼ menteye hudisokʼ ar mone monteye men, apnarakʼ sana leka senlenre hõ nirạiteye tahena, enḍekhan ape sanamko cetanre uni do sorbonase paṛao ocoya.

²⁰ Probhu Isor do tishõ uni ikạkae do bae rạjikʼa. Ar uniyakʼ raṅgao ar ãṭ do uni hoṛ upạrte dhũạkʼa. Noa puthire oka sarap reakʼ kathako roṛakan ona sanamakʼ do uni cetanre paṛaokʼa. Ar Probhu Isor do dhạrti khon uniyakʼ ńutumme meṭao utạrtaea.

²¹ Uni do Israelren sanam gusṭiko tala khon bin bhạlại lạgitʼ unigeye bachaoea, ar noa ạn-ạri puthire olakan bondobosre okako sarapanakʼ katha roṛakan ona lekage unireye paṛao ocoya.

²² “Nonkate noa disạm cetanre oka hạnko hijukʼ ar Probhu Isor okako rog bighin noa disạm cetanreye kol ona reaṅ aperen bõsko ar sạṅgiń disạm khon hijukʼkan bidisiạko hõ noako ńela.

²³ Goṭa disạmge buluṅ ar gondhokte ḍahao reḍha akana. Onare cetʼge baṅ er ar rohoeyokʼa, se onare cetʼge baṅ janamokʼa ar ghãs hõ baṅ omonokʼa. Noa disạm do Sodom, Gomora, Adma ar Seboyim leka hoyokʼa one oka do Probhu Isor raṅgao ar edreteye jalao maraoletʼ.

²⁴ Ona ńelte eṭakʼ sanam jạtren hoṛko mena, ‘Probhu Isor do cedakʼ noa disạm doe nonka akada? Cedakʼ uniyakʼ noa jaljalao edre do?’

²⁵ “Ar ona reakʼ roṛ ruạṛ do hoyokʼa, ‘ente noa jạtrenko do akoren hapṛamkoren Probhu Isorakʼ bondobosko bạgi giḍiakada, one oka do Misor disom khon oḍok ạguko tayom onko lạgitʼe bandhaoletʼ.

²⁶ Onko do eṭakʼ nãwã deb-debikoko sewawatʼkoa arko ḍobokʼatʼkoa, one onko ḍobokʼako reakʼ hukum Probhu Isor doe mana akatʼ.

²⁷ Onatege Probhu Isorakʼ edre do noa disạm cetanre jol rakabokʼ kana ar noa puthire olakʼ sanamakʼ sarapko do noa disạm cetanreye dul akada.

²⁸ Uniyakʼ raṅgao ar botoranakʼ jolokʼkan edre iạte onko do disạm khone or totʼ akatʼkoa ar eṭakʼ disạmreye giḍiakatʼkoa, ar teheń hạbicʼ hõ onḍege menakʼkoa.’

²⁹ “Danaṅakʼ reakʼ jotowakʼko do aboren Probhu Isorakʼ bisoe kana, menkhan sodorakʼ jotowakʼ do jaejug lạgitʼ abo ar abokoren hopon ar hoponerako lạgitʼkana, jemon noa ạn-ạri reakʼ sanamakʼ kathako bon senakʼte ona bon purạu.