Dosar Biboron 27 - সান্তালী বাইবেল

Ebol buru reakʼ pinḍ

¹ Mose do Israelren murubbiko soṅgekate hoṛkoe metatʼkoa, “Okako hukum teheńiń emapekan onape dohoya arpe manaoa.

² Jordan gaḍa paromkate aperen Probhu Isore emakawatʼpe disạmte bolokate lạṭu lạṭu dhiripe cake rakaba ar cuntepe potaokakʼa,

³ ar onako cetanre ạn-ạri reakʼ kathakope ol dohokakʼa. Aperen hapṛamkoren Probhu Isor do acʼakʼ gokʼakʼ leka toa ar dumur rasate perecʼ okaṭakʼ disạmteye idipe lạgidokʼkan onḍepe bololen tayom,

⁴ metakʼme jordan gaḍa parom tayom ińakʼ hukum leka Ebol burure ona dhirikope bereda ar cuntepe potaokakʼa.

⁵ Ape do Probhu Isor ńutumte onḍe dhiri reakʼ mitʼṭecʼ pinḍpe benaoa. Menkhan dhiriko cetanre mẽṛhẽtʼ reakʼ jãhãnakʼ khanḍage alope epela.

⁶ Aperen Probhu Isorakʼ noa pinḍ do pahṭa dhiriko reakʼtegepe benaoa ar ona cetanre aperen Probhu Isor ńutumte jeredokʼ samaṅokʼakʼpe samaṅa.

⁷ Onḍe do sulukren samaṅokʼakʼ porob hõpe porobokʼa ar samaṅokʼakʼ jinisko jomkate aperen Probhu Isor samaṅrepe rạskạkʼa.

⁸ Ar okako dhiripe cake rakab ona cetanre noa ạn-ạri reakʼ sanamakʼ kathako pusṭạutepe ol dohokakʼa.”

Ebol buru khon sarapakʼ roṛ

⁹ Inạ tayom Mose do Liwi naekeko ar sanam Israelkoe metatʼkoa, “E Israelko, thirkate ańjompe. Teheń ape do aperen Probhu Isorren hoṛpe hoyakana.

¹⁰ Ape do uniyakʼ bataotaepe. Ar teheń okako hukum ar ạn-ạrikoń emapekan ona dohoype.”

¹¹ Enhilokʼge Mose do hoṛkoe galmaraoatʼkoa,

¹² “Jordan gaḍa paromkate tinre Probhu Isorakʼ ạsirbad reakʼ katha roṛogokʼa unre Simeonren, Liwiren, Jihudạren, Isakarren, Josephren ar Benjamin khũṭren hoṛko do Gerisim buru cetanreko tahena.

¹³ Ar tinre sarapakʼ reakʼ katha roṛogokʼa unre Rubenren, Gadren, Aserren, Sebulonren, Danren ar Napthali khũṭren hoṛko do Ebol buru cetanreko tahena.

¹⁴ “Ar Liwiko do sanam Israelko samaṅre ãṭ aṛaṅte noa kathako mena;

¹⁵ ‘Onko hoṛ doko sarapangea, okoe do chãńchre dulakʼ muṭhạnko, kaṭren se dhiriren murhutʼko rokʼ benaoetʼko ar sewawako lạgitʼ danaṅ ṭhạ̃ireko dohoyetʼko. Noko sanam murhutʼko do Probhu Isor ṭhen hirkhạwan jinis kanako, ar eken kạrigolakʼ titegeko benao akana.’ Unre sanamkoko mena, ‘Amen.’

¹⁶ ‘Sarapangeae uni hoṛ do, okoe do eṅgat ar apate bemanotetʼkin.’ Unre sanam hoṛko mena, ‘Amen.’

¹⁷ ‘Sarapangeae uni hoṛ do, okoe do eṭakʼ hoṛakʼ jumi reakʼ simạnakoe ocokʼ giḍiyetʼkan.’ Unre sanam hoṛko mena, ‘Amen.’

¹⁸ ‘Sarapangeae uni hoṛ do, okoe do kãṛã hoṛ bhul horteye idiyede.’ Unre sanam hoṛko mena, ‘Amen.’

¹⁹ ‘Sarapangeae uni hoṛ do, one okoe do upriạko, ṭũạr amarko ar rạnḍi maejiuko cetanreye behoketʼkan.’ Unre sanam hoṛko mena, ‘Amen.’

²⁰ ‘Sarapangeae uni hoṛ do, okoe do acʼren kạki eṅgat tulucʼe laṭghaṭetʼkan, ente uni do acʼren apattetʼe bemanot edekana.’ Unre sanam hoṛko mena, ‘Amen.’

²¹ ‘Sarapangeae uni hoṛ do, okoe do janwarko sãoteye laṭghaṭetʼkan.’ Unre sanam hoṛko mena, ‘Amen.’

²² ‘Sarapangeae uni hoṛ do, okoe do kạki gogo se kaka babaren hoponera sãoteye laṭghaṭetʼkan.’ Unre sanam hoṛko mena, ‘Amen.’

²³ ‘Sarapangeae uni hoṛ do, okoe do acʼren hanhartetʼ sãoteye laṭghaṭetʼkan.’ Unre sanam hoṛko mena, ‘Amen.’

²⁴ ‘Sarapangeae uni hoṛ do, okoe do danaṅre hoṛe khunetʼko.’ Unre sanam hoṛko mena, ‘Amen.’

²⁵ ‘Sarapangeae uni hoṛ do, okoe do bindusạn hoṛ khun ocoye lạgitʼ ghuse hataoetʼkan.’ Unre sanam hoṛko mena, ‘Amen.’

²⁶ ‘Sarapangeae uni hoṛ, okoe do noa ạn-ạri reakʼ mimitʼ hukumko leka bae senokʼkan ar ona reakʼ daṛe bae aṅgocetʼkan.’ Unre sanam hoṛko mena, ‘Amen.’