Dosar Biboron 26 - সান্তালী বাইবেল

Pạhil rakapʼakʼ phosol ar gelakʼ hĩs

¹ “Aperen Probhu Isor okaṭakʼ disạm sompotti lekateye emape lạgidokʼkan ona hatkate tinre onḍepe girobasokʼa,

² unre aperen Probhu Isore em akawatʼpe ona disạmre okako phosolpe hoyocoe ona reakʼ pạhil rakapʼakʼ khon thoṛa phosol hataokate khạclạkʼrepe dohoya. Ar Probhu Isor sodorokʼ lạgitʼ okaṭakʼ ṭhạ̃iye bachaojoṅ onḍepe idiya.

³ Unre okoeṭakʼ naeke onḍeye tahen unipe metaea, ‘teheń ińren Probhu Isor samaṅreń jạhireda, okaṭakʼ disạm emabon lạgitʼ aboren hapṛamko ṭhene gokʼletʼ ona disạmteń bolo akana.’

⁴ Unre naeke do apeakʼ ti khon onako khạclạkʼ hataokate aperen Probhu Isorakʼ pinḍ samaṅreye dohoya.

⁵ Ar ona tayom do Probhu Isor samaṅrepe mena, ‘Aleren hapṛam do Aramren mitʼṭen uḍạcal hoṛe tahẽkana. Uni do eken thoṛa hoṛante Misor disomteye senlena ar onḍeye tahẽkanre uni hotete mitʼṭen maraṅ ar daṛean jạtrenkoakʼ janam hoylena ar onkoakʼ lekha do ḍherge tahẽkana.

⁶ Menkhan Misorren hoṛ do abo sãote bhage bako beoharleda. Onko do ạḍi kosṭoko ematʼbon tahẽkana ar abo cetanre hamal bojhako ladeyatʼ bon tahẽkana.

⁷ Unre abo do aboren hapṛamkoren Probhu Isor ṭhen bon rakʼleda. Ar uni do aboakʼ rakʼjoṅakʼe ańjomketʼtabona ar aboakʼ harkhet sasete ńelkeda; ar cetʼleka bon santao ocokʼkan ona hõe ńelkeda.

⁸ Onate acʼakʼ keṭecʼ ti ar tiạrakatʼ sopote ar maraṅ botoranakʼ kạmite, cinhạkote ar hahaṛa kạmikoe udukʼatʼbonte Misor disạm khone oḍok ạguketʼbona.

⁹ Uni do nonḍeye ạguketʼbona ar toa-dumur rasate perecʼ noa disạme ematʼbona.

¹⁰ Ona iạte E Probhu Isor, am emakʼ ot baṛge reakʼ pạhil rakapʼakʼ phosol khonakʼ am ṭheniń ạguakada.’ Ar noa menkate aperen Probhu Isor samaṅre khạclạkʼpe dohoya ar unipe sewawaea.

¹¹ Ape ar gharońjrenko Probhu Isor oka bhage bhageakʼ jiniskoteye bhor akawatʼpe onate ape do, Liwiko ar ape talare menakʼko upriạ hoṛko sãotepe rạskạ joṅa.

¹² “Tesarakʼ bochor, metakʼme, gel hạṭiń reakʼ mitʼ hạṭiń emokʼ bochorre, apeakʼ arjaoakʼ sanam phosol reakʼ gel hạṭiń reakʼ mitʼ hạṭińpe begar sạtlere arpe tirpitlenre Liwiko, upriạko, ṭũạr amarko ar rạnḍi maejiukope emakoa. Onate onko do apeakʼ disạmre jom-ńũkateko tirpitokʼa.

¹³ Ona tayom ape sanamko aperen Probhu Isorpe metaea, ‘iń do amakʼ hukum lekage ińakʼ arjaoakʼ khon am ńutumteń begar dohoakatʼ hạṭiń do oṛakʼ khon oḍokkate Liwiko, upriạko, ṭũạr amarko ar rạnḍi maejiukoń emakawatʼkoa. Amakʼ hukum do bạń bebatao akada ar onako reakʼ mitʼṭecʼ hõ bạń hiṛińakada.

¹⁴ Gocʼko lạgitʼ homor halaṅ dinre hõ am ńutumte begar dohoakatʼ hạṭińko reakʼ khon cetʼge bạń jomakada, se chut iń tahẽkan jokhecʼ hõ oṛakʼ khon bạń oḍokleda, se ona khon jãhãn hạṭiń hõ gocʼko ńutumte bạń dan akada. Iń do ińren Probhu Isorakʼ katha lekageń kạmi akada. Amem hukumakatʼ jotowakʼgeń kạmi akada.

¹⁵ E Probhu Isor, amakʼ sonot tahen ṭhạ̃i khon baṛe beṅgedme ar amren hoṛ baṛe beṅgetʼakome, metakʼme Israelko baṛe bhoraleme. Aleren hapṛamko ṭhen amakʼ gokʼakʼ lekate toa ar dumur rasate perecʼ okaṭakʼ disạmem emakawatʼle noa disạm hõ bhorakʼtaleme.’

Probhu Isorakʼ hukum manao

¹⁶ “Aperen Probhu Isor teheń noako ạn ar bicạrko dohoy reakʼe hukum apekana. Ape do sontor salakʼ goṭa mon ar ontorte onape manaoa.

¹⁷ Ar teheńge lại sodorpe. Probhu kangeae aperen Isor do ar uniyakʼ horregepe taṛama mente. Arpe aṅgocetʼ kana, uniyakʼ hukumko ar bicạrkope dohoya ar uniyakʼ katha lekape calakʼa.

¹⁸ Probhu Isor hõ teheńgeye lại sodoretʼkana, acʼakʼ gokʼakʼ lekate ape do uniren kanape. Onate uniyakʼ hukum leka senokʼ hoyokʼtapea.

¹⁹ Uni doe lại sodoretʼkana, sarhao, man ar sabasi secʼte sirjạuren sanam jạtrenko cetanre uni doe dohopeya ar aperen Isor Probhu Isorakʼ gokʼakʼ lekate apege uni ńutumte begar akan jạtrenpe hoyokʼa.”