Dosar Biboron 25 - সান্তালী বাইবেল

¹ “Hoṛko talare jhogṛa jhạṭi hoylenre ar adalot hạbicʼ senlen khan bikʼcạrko do bin dusiyicʼ do bin dusi ar dusiyicʼ do dusi menkateko bicạr chinḍạukatakoma.

² Ona rayre dusiyicʼ do dale reakʼ hukum hoylen khan bikʼcạricʼ do uniye taber ocoyea ar dos akatʼ lekate lekhakate acʼ samaṅregeye dal ocoyea.

³ Menkhan pongel ṭheṅga khon bạ̃ṛti dale do baṅ hoyokʼa. Niạ khon bạ̃ṛti dalle khan Israel boeha do sanam hoṛko samaṅreye bemanot ocokʼa.

⁴ “Ekʼen kan ḍaṅgra do moca alom toltaea.

⁵ “Boeha boeha mitʼ gharońjreko tahenre jãhãe begor gidrạwanteye gocʼlen khan, uniren rạnḍi maejiu do gharońj bahre eṭakʼ jãhãre bae bapla daṛeakʼa. Uniren erweltetʼ koṛa do uniye baplayea ar uni do dadattetʼ lạgitʼ bõse teṅgokoa.

⁶ Ar uniren pạhilicʼ hoponge uniren gocʼ akanicʼ dadattetʼakʼ ńutume rukhiyạya ar uni boehawakʼ ńutum Israelko tala khon baṅ meṭaokʼtaea.

⁷ Menkhan erweltetʼ koṛa uni rạnḍi maejiu baplaye bae rạjikʼ enḍekhan uni maejiu do ato se nagraha reakʼ phaṭok-duạrre murubbiko ṭhen senkateye mena, ‘erweliń koṛa do ińren jãwãeyakʼ ńutum Israelko talare rukhiyại lạgitʼ bae rạjikʼkana. Ar ińre oka dạyik menakʼtae ona manao hõ bae khojkana.’

⁸ Unre onḍenko murubbi do uni hoṛ hohowaeteko bujhạuaea. Ar ona tayom hõ uni baplaye lạgitʼ bae rạjikʼ,

⁹ enḍekhan uniren hilit era do murubbiko samaṅrege erweltetʼ koṛa ṭhen sen sorkate uniyakʼ panaheye bojtaea ar mẽtʼãhãreye thoaea are mena, ‘dadattetʼakʼ bõs okoe rukhiyại bae men uni do nonkawaege ṭhika.’

¹⁰ Ar Israelko talare uni hoṛakʼ bõs do ‘Bocʼ panahe bõsko’ metakʼa.

¹¹ “Bar hoṛkin lạṛhại oktere unkin modren mitʼ hoṛren maejiu do acʼren jãwãe bańcaoe lạgitʼ sen sorkate eṭakʼ herel hoṛakʼ hereltetʼe racakʼ lekhan,

¹² enḍekhan uni maejiuakʼ ti do samakʼ giḍikakʼ hoyokʼa. Uni do alogepe dayawaea.

¹³ “Apeakʼ thạilạkʼre mitʼṭecʼ do ḍher ojon reakʼ ar mitʼṭecʼ do kom ojon reakʼ nonka bar lekan baṭkhara do alo baṛe tahentapema.

¹⁴ Apeakʼ oṛakʼre mitʼṭecʼ do lạṭu ar mitʼṭecʼ do kạṭicʼ nonkan bar lekan sosoṅakʼ hõ alo tahenma.

¹⁵ Aperen Probhu Isor okaṭakʼ disạme emape lạgidokʼkan onḍe jemon ḍher dinpe bahaokʼ onate ṭhik lekan sosoṅakʼ baṭkhara ar tulạpe dohoya.

¹⁶ Okoeye nonkae, metakʼme, ṭhokʼkayicʼ hoṛ do aperen Probhu Isore hirkhạwaea.

¹⁷ “Misor disạm khonpe oḍok hecʼen tayom Amalekiko horre ape sãote okako cekaletʼ ona do alope hiṛińa.

¹⁸ Onko do aperen tayomreko tahẽkan hoṛko okoe do laṅga ar reńgecʼteko tahẽkan onko cetanre jhãpko emleda. Onko do Isor bako botoradea.

¹⁹ Aperen Probhu Isor okaṭakʼ disạm do sompotti lekate dokhol lạgitʼe emapekan onḍe beṛhaeten bạiriko sãote lạṛhạikate tinreye jirạu ocopea unre dhạrti khon Amalekikope marao utạrkoa. Noa katha do alogepe hiṛińa.