Dosar Biboron 24 - সান্তালী বাইবেল

¹ “Bapla tayom jãhãege bạhuttetʼ cetanre jãhãnakʼ dose ńamtae ar uni cetanreye bekusikʼte bapag dolele olae ar uniyakʼ oṛakʼteye kolgotʼkae,

^2-3 ar uni maejiu do acʼakʼ oṛakʼte senkate jãhãeye baplaye ar uniren dosaricʼ jãwãe hõ tayomte bae kusiyae ar uni cetanreye onkae, se uni jãwãetetʼ hõe gujukʼ

⁴ enḍekhan uniren pạhilicʼ jãwãe, one okoeye bạgilede uni do ar bae bapla daṛeaea, ente uni doe besaphagea. Ar nonkanakʼ bapla Probhu Isor doe hirkhạwakʼa. Sompotti lekate okaṭakʼ disạm aperen Probhu Isore emape lạgidokʼkan ona disạm cetanre kại alope paṛao ocoya.

⁵ “Thoṛa din lahareye bapla akan nonkan hoṛ lạṛhại lạgitʼ do alope kolea se uni cetanre jãhãnakʼ bhar hõ alope ema. Uni do bapla akade bạhu tulucʼ kusi rạskạre tahen lạgitʼ mitʼ bochor hạbicʼ chuṭạge tahẽocoae hoyokʼa.

⁶ “Okoe hõ jante dhiri, se jante reakʼ cetan dhiri hõ bandhok menkate alope hataoa, ente onkayicʼ hoṛ do jiwige bandhoke hataoeda.

⁷ “Ar jãhãe hoṛ jãhãe Israel boeha kombṛo idikate guti menteye hataoe seye ạkhrińe, enḍekhan uni kombṛo hoṛ do gujukʼ hoyokʼtaea. Ape tala khon onkan bạṛicʼ hoṛ dope marao utạrkoa.

⁸ “Murhucʼ jom rog menakʼtae hoṛ khon sontorokʼpe ar Liwi naekeko okako hukumape onako joton salakʼ manaope. Iń okań hukum akawatʼko ape hõ sontor salakʼ onka leka calakʼpe.

⁹ Misor disạm khonpe oḍok hecʼen tayom horre Probhu Isor do Mạriạm cetʼe cekalede ona baṛe disạipe.

¹⁰ “Ape pheḍren hoṛ rin dhar lekate jãhãnakʼpe emae khan bondhok lekate jãhãnakʼ jinis hatao lạgitʼ uniyakʼ oṛakʼte alope bolokʼa.

¹¹ “Ape do bahrerege teṅgonpe ar okoe rin dharpe emakawade unige bondhok lạgitʼ jinisko ape ṭhene ạguiya.

¹² Reṅgecʼ hoṛ kan khane enḍekhan uniyakʼ bondhok dohoakatʼ kicricʼ cetanre alope giticʼa.

¹³ Menkhan cando hạsurokʼre onape ruạṛkataea jemon onate oyokateye jạpitʼ daṛeakʼ. Ar onate uni do apeakʼ bhạlại lạgitʼe koeya, ar aperen Probhu Isor samaṅre dhoromge hoyokʼtapea.

¹⁴ “Paona babotre reṅgecʼ orecʼ ar din mạjuriko cetanre alope behoka baṅ doe aperen Israel boehakan ar baṅ doe apeakʼ disạmren upriạ hoṛkan.

¹⁵ Siń cando hạsurokʼ laharege uniyakʼ kuṛại do emkatae hoyokʼa, ente uni doe reṅgecʼ hoṛ kana ar ona kuṛại cetanregeye ṭehãḍ akana. Ar bape onkale khan kại hoyokʼtapea, ar uni do ape upạrte Probhu ṭhene raga ar kạirepe paṛaokʼa.

¹⁶ “Hoponakʼ kại gunạkʼte apat do bae gocʼ ocokʼa se apatakʼ kại gunạkʼte hopon hõ bae gocʼ ocokʼa. Mimitʼ hoṛ do acʼakʼ kại gunạkʼte gujukʼ hoyokʼtaea.

¹⁷ “Upriạ ar ṭũạr amarko lạgitʼ behokakʼ reakʼ do alope bicạra. Ar rạnḍi maejiuko ṭhen khon bandhok lekate kicricʼ hõ alope hataoa.

¹⁸ Disạipe, Misor disạmre ape hõ golampe tahẽkana ar aperen Probhu Isor do onḍe khone chaḍao ạgu akatʼpea. Ona iạte noako kạmi lạgitʼ iń hukumape kana.

¹⁹ “Apeakʼ jumi reakʼ phosolpe samṭao jokhecʼ ạṭi ạguiype hiṛiń lekhan ona ạgui lạgitʼ do alope ruạṛ calakʼa. Ona do upriạko, ṭũạr amarko ar rạnḍiko lạgitʼ bạgi oṭokakʼpe. Enḍekhan aperen Probhu Isor do jotowakʼ kạmireye bhorapea.

²⁰ Jạitun jo dal ńurhại tayom ḍạrko secʼ do ar alope beṅgetʼ dohṛaea. Okaṭakʼ tahen ona do upriạko, ṭũạr amarko ar rạnḍiko lạgitʼ bạgi oṭokakʼpe.

²¹ Apeakʼ darkha bagwan khon darkha jope godre dosar dhao alope ńel dohṛaea. Okaṭakʼ tahen ona do upriạko, ṭũạr amarko ar rạnḍiko lạgitʼ bạgi oṭokakʼpe.

²² Disạipe, ape hõ Misor disạmre golampe tahẽkana. Ona iạte iń do noakoń hukum apekana.