Dosar Biboron 23 - সান্তালী বাইবেল

Baronakʼko reaṅ

¹ “Koṭecʼ cạkrạ akadeyicʼ se getʼ cạkrạ akadeyicʼ hoṛ do okoe hõ Probhu Isorakʼ manḍerre bako seletʼ daṛeakʼa.

² “Jãhãe bidhuạ hoṛ hõ Probhu Isorakʼ manḍerre bae seletʼ daṛeakʼa; gelpon piṛhi hạbicʼ uniren do cele hõ bako seletʼ daṛeakʼa.

³ “Jãhãe Amoni se Moabi hõ Probhu Isorakʼ manḍerre bae seletʼ daṛeakʼa; gelpon piṛhi hạbicʼ uniren cele hõ manḍerre bako bolo daṛeakʼa.

⁴ Ente Misor disạm khon oḍok hecʼkate apeakʼ dãṛãn horre onko do jomakʼ ar dakʼante bako daramletʼpea, bickom sarapape lạgitʼ Mesopoṭamia disạm reakʼ Pethor nagraha khon Beor hopon Biliam do ṭakateko ạguledea.

⁵ Menkhan aperen Probhu Isor do Biliamakʼ katha bae luturada; ar ape bako dulạṛletʼpe iạte uni do sarap bodolteye bhoratʼpea.

⁶ Tinạkʼ din jiwetʼpe tahen unạkʼ din onko bhạlạiko reakʼ alope kurumuṭuiya.

⁷ “Menkhan Edomrenko do alope hirkhạwakoa, ente onko do aperen boeha kanako. Misorrenko hõ alope hirkhạwakoa, ente onkoakʼ disạmre ape do porjạtrenko lekatepe tahekana.

⁸ Onkoren tesar piṛhiren gidrạko do Probhu Isorakʼ manḍerreko seletʼ daṛeakʼa.

Lạṛhại phạdkoakʼ ḍera sapha dohoy reakʼ

⁹ “Bạiriko upạrte lạṛhại senkate ḍera benao tayom sanam lekan besaphawakʼko khon pharak akaepe tahena.

¹⁰ Ape talaren jãhãege ńindạ jokhecʼ jãhãnakʼ iạteye besapha len khan, uni do ḍera bahrete senokʼ hoyokʼtaea.

¹¹ Ar ạyubokʼ dela deli doe ḍạbrạ saphakʼa. Ar siń cando hạsur tayom do ḍerateye bolo daṛeakʼa.

¹² “Ṭạnḍite lạgitʼ metakʼme bahrete calakʼ lạgitʼ ḍera bahre mitʼṭecʼ jaegape ṭhik dohokakʼa.

¹³ Apeakʼ khanḍa bhanḍako modre ot lae lạgitʼ mitʼṭecʼ khonta hõ dohoy hoyokʼtapea. Ar ṭạnḍite metakʼme bahre calakʼ lahare onatepe la ghạḍluga ar ṭạnḍite baṛakate hasatepe topa oṭokakʼa.

¹⁴ Ape rukhiyạpe lạgitʼ ar aperen bạiriko apeakʼ tire soprotko lạgitʼ aperen Probhu Isor do apeakʼ ḍera talareye dãṛãna. Onate apeakʼ ḍera do sonotpe dohoya jemon ape talare hirkhạwakʼ jãhãnakʼ ńelte aloe dea giḍipe.

Emanteakʼ niạmko

¹⁵ “Jãhãeren guti do ape ṭhen hecʼkate asraye hatao enḍekhan uniren kisạ̃ṛakʼ tire alope jimạ ruạṛkaea.

¹⁶ Uni guti do ape talare okare tahene menjoṅ onḍege tahẽ ocoaea; ar alope santaoea.

¹⁷ “Jãhãe Israelren maejiu jemon mundilren kusmbi aloe hoyokʼ; ar jãhãe Israel herel hõ mundilren kusmbi metakʼme alo jemone jogna ocokʼ.

¹⁸ Herelge cetʼ ar maejiu kusmbige cetʼ uniyakʼ rojgarakʼ ṭaka do mundilte manot purạu lạgitʼ aperen Probhu Isorakʼ oṛakʼte alope ạguiya, ente Probhu Isor do nonkan herel ar maejiue hirkhạwako kana.

¹⁹ “Jãhãe Israel boehako ṭhen khon sud alope hataoa, baṅ do ṭaka cetanre ar baṅ do jomakʼ jinis cetanre, baṅ do eṭakʼ jãhãn jinis cetanre ape do sudge alope hataoa.

²⁰ Menkhan eṭakʼ jạtren hoṛko ṭhen khon dope hatao daṛeakʼa eken Israel boehako chaḍa. Nonkape senakʼ khan okaṭakʼ disạm dokhol lạgitʼpe calakʼkan onḍe ape do jãhãnakʼrege hatpe calao onarege Probhu Isor doe bhorapea.

²¹ “Aperen Probhu Isor ṭhen jãhãnakʼge manot lạgitʼpe dohoy enḍekhan ona purạu lạgitʼ do alope biloma, ente aperen Probhu Isor do tishõ ona khon bae khalaspea. Ar onate ape do kạirepe paṛaokʼa.

²² Menkhan manotakʼ reakʼ jãhãnakʼ bape doholere kại do baṅ hoyokʼtapea.

²³ Mocate okaṭakʼ manotakʼ reakʼ kathape roṛ ona do purạutege hoyokʼtapea, ente amakʼ mocatege Probhu Isor samaṅre manotakʼ reakʼem roṛ akada.

²⁴ “Eṭakʼ jãhãeakʼ darkha khetre senkate apeakʼ kusi leka darkha jope jom daṛeakʼa, menkhan idiy lạgitʼ do bape gocha daṛeakʼa.

²⁵ Ape pheḍren hoṛakʼ teṅgo akan phosolrepe bololenre ona reakʼ gelepe hulecʼ daṛeakʼa, menkhan datromte do bape getʼ daṛeakʼa.