Dosar Biboron 21 - সান্তালী বাইবেল

Bae baḍaekan khũniạhi reaṅ

¹ “Aperen Probhu Isor okaṭakʼ disạm dokhol lạgitʼe emape lạgidokʼkan onḍe ṭạnḍire jãhãe khun akanpe ńelle khan, ar okoe uniye khunkede ona reakʼ jãhãnakʼ bape baḍae daṛeakʼ.

² Enḍekhan aperen murubbiko ar bikʼcạrko do bahrete senkate ona mạ̃ṛĩ khon sor reakʼ ato se nagrahako soṅa tinạkʼ sạṅgińre menakʼa mente.

³ Ar mạ̃ṛĩ khon okaṭakʼ nagraha do joto khon sorre menakʼ nagraharen murubbiko do nonkan mitʼṭen phẽṭaṛko hataoea okoe do kạmire baṅ lagaoakade ar tarenre tishõ arãṛ baṅ lade akawade.

⁴ Ar okare tishõ bako casakatʼ se itạ hõ bako erakatʼ ar onḍe mitʼṭecʼ ạtukʼ soḍokʼ menakʼ, nonkan mitʼṭecʼ sokṛa soḍokʼte uniko idiyea. Ar ona soḍokʼre uni phẽṭaṛakʼ hoṭokʼko rạpudtaea.

⁵ Ona tayom naekeko, metakʼme Liwi gusṭiren hoṛko do sapʼsosor kạmi lạgitʼko hecʼ sorokʼa, onko do Probhu Isor ńutumte hoṛko bhorakoa ar reṭepeṭe, dapal tapamre hoṛkoakʼko bicạr chinḍạutakoa ente aperen Probhu Isor do onkoe bachao akatʼkoa.

⁶ Ona tayom onko sor ato se nagraharen murubbiko do hoṭokʼ rạputʼ akatʼtae phẽṭaṛ cetanre akoakʼ tiko ạrupʼ saphaetakoa.

⁷ Ar inạ tayomko mena, ‘aleakʼ ti do niạ mãyãm bae joroakada ar ona hoyokʼ hõ bale ńelakada.

⁸ E Probhu Isor, amem chaḍao akatʼko Israelko baṛe ikạkako me. Nui hoṛakʼ mãyãm iạte amren hoṛko alom dusikoa.’ Ar onate mãyãm reakʼ dos khon ikạpe ńama.

⁹ Nonkate ape tala khon bin dusạn hoṛakʼ mãyãm reakʼ dospe meṭao daṛeakʼa, ente unre Probhu Isorakʼ mẽtʼre oka bhageakʼkan onage hoyokʼa.

Lạṛhạire hat akan maejiuko reaṅ

¹⁰ “Bạiriko sãote lạṛhại senkate tinre aperen Probhu Isor apeakʼ tire onkoe jimạkoa ar ape do onkope bondikoa,

¹¹ unre onkoren mońje ńelokʼ maejiu ńelte jãhãeye kusi emanlen khan uni do bạhuttetʼ menteye doho daṛeaea.

¹² Ar maejiu do acʼakʼ oṛakʼteye idiyea. Ona tayom uni maejiu do hoyo munḍrikʼ hoyokʼtaea ar ramakoe getʼ giḍiytaea,

¹³ ar bondikate ạguiye jokhecʼ acʼakʼ hoṛmore okako kicricʼ tahẽkantae onakoe giḍikataea. Inạ tayom uniyakʼ oṛakʼre tahẽkate maejiu do mitʼ cando hạbicʼ acʼren go-baba lạgitʼe rakʼ homora. Ar ona tayom uni hoṛ do maejiue baplayete uniren jãwãeye hoyokʼa ar maejiu hõ uniren bạhui hoyokʼa.

¹⁴ Menkhan tayomte maejiu bae kusiyae khan uni okare calakʼe men onḍege sen ocowae hoyokʼa. Uni do bae ạkhriń daṛeaea se kạ̃ṛmĩ lekate hõ bae doho daṛeaea, ente uni doe bemanot akadea.

Pạhilicʼ hoponakʼ ạidạri

¹⁵ “Nonka hoedaṛeakʼa, mitʼ hoṛren do barea bạhu menakʼkintaea, unkin modre mitʼṭene dulạṛea ar eṭakʼicʼ do baṅa. Ar unkin bana hoṛren koṛa hoponkin janamokʼ ar bae dulạṛedekan bạhuren pạhil koṛa hopone janamokʼ,

¹⁶ enḍekhan sompotti emokʼ jokhecʼ okoeṭakʼ bạhu bae dulạṛede tahẽkan uniren hopon badkate eṭakʼ bạhuren pạhilicʼ koṛa ạidạri emae do baṅ ganokʼtaea, ente okoeṭakʼ bạhu bae dulạṛede tahẽkan uniren hoponge pạhilreye janam akana.

¹⁷ Ar bạhu bae dulạṛedekanren hoponge acʼakʼ sompotti reakʼ eṭakʼ hopon khon bar doboṛ emkate unige pạhilicʼ hopon mente aṅgoce hoyokʼtaea. Ente uni hoponkangeae apattetʼakʼ daṛe reakʼ pạhilicʼ jo do. Ar pạhil hopon reakʼ ạidạri do unigeye ńama.

Bebatao koṛa hopon reaṅ

¹⁸ “Jãhãeren koṛa hopon ḍhiṭ ar ṭhokicʼe hoyokʼ, ar go-babawakʼ katha bae ańjom ar unkinakʼ ḍanṭao bae manao,

¹⁹ enḍekhan uniren go-baba do ạkinakʼ ato se nagraha reakʼ phaṭok duạrre murubbiko ṭhenkin idiyea.

²⁰ Unkin do murubbiko kin metakoa, ‘ạlińren nui hopon do ạḍitetʼ ḍhiṭicʼ kanae are ṭhokgea; uni do bae hetawạliń kana. Uni doe ńũ bulokʼkana ar ṭaka poesae tahas nahas cabayetʼa.’

²¹ Unre ona ṭhạ̃iren sanam herel hoṛ do dhirite uniko tiń gojea. Ar nonkate ape tala khon uni bạṛicʼ hoṛ doe caba utạrokʼa. Ar Israelko do noa katha ańjomkate botor caṛhaoakoa.

Eṭakʼ eṭakʼ niạmko

²² “Jãhãe hoṛ gujukʼ sạjại ńam lek kanae menteye dos akatʼ khan ar gocʼkate darereko ṭaṅgao dohoakade khan,

²³ enḍekhan setakʼ hạbicʼ mạ̃ṛĩ do darere aka dohokakʼ baṅ ganokʼa. Enhilokʼge uni do topakae hoyokʼa, ente onkanko hoṛ do Probhu Isorren sarapan hoṛkanako. Ar Probhu Isor do sompotti lekate okaṭakʼ disạme emape lạgidokʼkan ona do alope besapha ocoya.