Dosar Biboron 20 - সান্তালী বাইবেল

Lạṛhại reaṅ

¹ “Lạṛhại senkate bạiri secʼrenko ape khon ḍher sadomko, lạṛhại gạḍiko ar palṭonko ńelkate alope botorokʼa, ente aperen Probhu Isor okoe do Misor disạm khone oḍok ạgu akatʼpe uni do ape sãoteye tahena.

^2-3 Lạṛhại lạgitʼpe oḍokʼ calakʼ lahare naeke do samaṅ secʼ hecʼkate palṭonkoe metakoa, ‘E Israelko ańjompe, teheń ape do aperen bạiriko sãote lạṛhại lạgitʼpe calakʼkana. Dil dohojoṅpe; ar alope botorokʼa se alope lạbṛujokʼa; bạiriko ńelte alope thar tharaokʼa.

⁴ Ente bạiriko sãote lạṛhạikate jitạu ocope lạgitʼ iạte aperen Probhu Isor do ape sãoteye calakʼ kana.’

⁵ “Ona tayom onkoren mukhiyạko mena, ‘ape talare jãhãe nãwãte oṛakʼ benaokate ona bae uḍhạu akatʼ khan uni do oṛakʼteye ruạṛ calakʼma; ar baṅkhan lạṛhạire uniye gocʼlen khan eṭakʼko do ona oṛakʼko uḍhạu joṅa.

⁶ Jãhãe darkha bagwan benaokate ona reakʼ jo bae jomakatʼ khan uni do oṛakʼteye ruạṛ calakʼma; ar baṅkhan lạṛhạireye gocʼlen khan eṭakʼko do ona bagwanko dokhol joṅa.

⁷ Bapla bondobos tayom jãhãe bae bapla akan khan uni hõ oṛakʼteye ruạṛ calakʼma; ar baṅkhan lạṛhạireye gocʼlen khan eṭakʼ hoṛ do uni maejiue baplayea.’

⁸ Naekeko do arhõko mena, ‘ape talare jãhãeko botorokʼkan khan se dil bako ạikạuetʼ khan, enḍekhan ona ńelte eṭakʼ Israel boehakoakʼ mon alo bhiṅgṛạukʼ onate uni do acʼakʼ oṛakʼteye ruạṛ calakʼma.’

⁹ Palṭonko ṭhen katha roṛ mucạtʼkate mukhiyạko do palṭonkoakʼ eṭakʼ eṭakʼ dol cetanre akoren subedarko bahalkoa.

¹⁰ “Ar jãhãn ato se nagraha upạrte lạṛhại lạgitʼpe oḍok senlenre onḍenko hoṛ sulukokʼ lạgitʼpe metakoa.

¹¹ Onko hoṛ do sulukokʼ lạgitʼko rạjikʼte phaṭok duạrko jhicʼape enḍekhan sanamkoge ape taberen hoṛko hoyokʼa ar ape lạgitʼko kạmiya.

¹² Menkhan sulukokʼ baṅkate ape upạrte lạṛhại lạgitʼko teṅgokʼ enḍekhan ona nagrahape gherao eseda.

¹³ Aperen Probhu Isor do tinre ona nagraha apeakʼ tireye jimạya unre onḍenko herel hoṛ dope gocʼ cabakoa.

¹⁴ Menkhan maejiuko, gidrạko, janwarko ar ona nagraha reakʼ eṭakʼakʼ jinisko do luṭakʼ jinis lekate ape lạgitʼpe ạgu daṛeakʼa. Bạirikoakʼ disạm khon luṭ ạguwakʼ okako jinis aperen Probhu Isor apeye emape ona dope hạṭiń daṛeakʼa.

¹⁵ Ar okako nagraha sạṅgińre menakʼ, ona do ape jạtrenkoakʼ nagraha do baṅkana, ar onako cetanrehõ onkagepe hoeocoya.

¹⁶ Menkhan aperen Probhu Isor do okoe jạtrenkoakʼ ato ar nagrahako somppoti lekateye emape lạgidokʼkan onḍe okoe hõ jiwetʼ do alope dohokoa.

¹⁷ Aperen Probhu Isorakʼ hukum leka ape Hittiko, Amoriko, Kananiko, Phạrusiko, Hiwiko ar Jebusiko jotoge purạtepe marao cabakoa.

¹⁸ Ar bape onka lekhan onkoren debotako sewawako reakʼ hirkhạwakʼ kạmipe cetʼjoṅa ar onate aperen Probhu Isor upạrtepe kạiya.

¹⁹ “Jãhãn ato se nagraha ḍher din hạbicʼ gherao tayom ona dokhol lạgitʼpe lạṛhạire onḍenakʼ jãhãn darere ṭeṅgocʼ do alope calaoa, ente onako reakʼ jo do apegepe joma. Onate dareko do alope makʼ giḍikakʼa. Ente ṭạnḍi reakʼ dareko do manwa doko baṅkana apeko hạnpea mente.

²⁰ Menkhan okako do jo dare baṅkan ona dope makʼ giḍi daṛeakʼa ar oka nagraharen hoṛ ape upạrte lạṛhại lạgitʼko teṅgokʼ onko ạuripe bhagaoko hạbicʼ onako dare dope makʼ daṛeakʼa ekʼsetʼakʼkope benaojoṅre.