Dosar Biboron 2 - সান্তালী বাইবেল

Hahaṅkarre Israelko

¹ “Probhu Isor cetʼ lekae hukumạdiń tahẽkan onkage abo do ona tayom ruạṛkate Akaba doreão reakʼ horte hahaṅkar secʼ bon mohnḍa idiyena. Ar Seyir buru ṭoṭha secʼte ạcur ạcurte ḍher din do paromena.

² Ona tayom Probhu Isor do ińe metadińạ,

³ ‘ḍher din khon niạ buru ṭoṭhakorepe ạcur baṛae kana; niạ dhao do utạr secʼ ạcurokʼpe.’

⁴ Ona tayom uni do apeko metape lạgitʼe metadińạ, ‘ńitokʼ do aperen Seyirren boeha Esao bõsrenkoakʼ rajosṭi talate calakʼ hoyokʼtapea. Ape ńelte onko do botor caṛhaoakoa menkhan sontor akae tahenpe.

⁵ Esao bõsrenko lạṛhại lạgitʼ alope uskạukoa, ente onkoakʼ disạm reakʼ okaṭakʼ hĩs hõ bạń emapea, apeakʼ jaṅga dohoy reakʼ ṭhạ̃i hõ baṅa. Ente Seyir reakʼ noa buru ṭoṭhako Esao do acʼakʼ disạm lekateń emakawadea.

⁶ Onko ṭhen khon jomakʼ ar dakʼ do ṭakate kiriń hoyokʼtapea.’

⁷ “Aperen Probhu Isor do joto kạmiregeye bhor akawatʼpea. Ar noa maraṅ utạr hahaṅkar talate calakʼ jokhecʼ hõ uni do apeye ńel todarot akatʼpea. Niạ pongel bochor aperen Probhu Isor do ape sãoteye tahẽkana ar apeakʼ jãhãn okulạn hõ baṅ hoylentaepea.

⁸ “Onate abo do aboren Seyirren boeha Esao bõsrenko bạgikate bon hecʼena. Arabat reakʼ okaṭakʼ hor do Elat ar Esion Geber khon oḍok hecʼakan ona hor bạgikate Moab reakʼ hahaṅkar secʼtebon parom hecʼena.

⁹ Ona tayom Probhu Isor do ińe metadińạ, ‘ape do Moabrenko alope buskokoa se lạṛhại lạgitʼ hõ alope uskạukoa, ente onkoakʼ disạm reakʼ oka hĩsge ape do bạń emapea. Iń do sompotti lekate Ar nagraha do Loṭren bõskoń emakawatʼkoa.”

¹⁰ Lahate Emiko do onako ṭoṭharegeko girobasokʼkan tahẽkana. Emi jạtren hoṛko do daṛeangeko tahẽkana, lekhare hõ ḍher ar Anakiko leka usulgeko tahẽkana.

¹¹ Anakiko leka Emiko hõ Rephiyiko lekhakʼkan tahẽkana menkhan Moabrenko do Emiko metakokan tahẽkana.

¹² Seyirre do Horiko girobasokʼkan tahẽkana, menkhan tayomte Esao bõsrenko do onḍe khon onkoko laga ńirletʼkoa. Probhu Isor do sompotti lekate Israelko okaṭakʼ disạme ematʼko tahẽkan onḍe onko okako kạmiletʼ Esao bõsrenko hõ ṭhik onageko kạmileda; onko do Horikoko maraoketʼkote onkoakʼ jaegare apnar girobasokʼko ehopʼena.

¹³ “Ona tayom Probhu Isorre menkeda, ‘ńitokʼ do beretʼkate Serod reakʼ soḍokʼte parom calakʼpe.’ Ar abo do ona bon parom ạgukeda.

¹⁴ Kades bạgikate Sered soḍokʼ paromokʼte pegel irạl bochor lagao atʼbon tahẽkana. Kades bạgi oṭowakʼ lahare ḍerare okoe palṭonko tahẽkan onko sanamkoge niạ pegel irạl bochor bhitrite Probhu Isorakʼ gokʼakʼ reakʼ katha lekateko gocʼena.

¹⁵ Ḍera khon maraoko lạgitʼ Probhu Isorge onko upạrteye kạmikeda, onko ạuriko marao caba utạrokʼ hạbicʼ.

^16-18 “Onko palṭonko gocʼen tayom Probhu Isor do ińe metadiń tahẽkana, ‘teheń ape do Ar nagraha aṛete Moab disạm reakʼ simạ bạgikate calakʼ hoyokʼtapea.

¹⁹ Menkhan ape do tinre Amonrenko ṭhenpe seṭerokʼa unre onko do alope ạṛiskoa se lạṛhại lạgitʼ alope uskạukoa, ente Amonrenkoakʼ disạm reakʼ okaṭakʼ hĩs hõ ape do bạń emapea. Ona do Loṭ bõsrenko sompotti lekateń em dohoakatʼkoa.’ ”

²⁰ Ona disạm do Rephiyimkoakʼ disạm hõko metakʼkan tahẽkana, ente onko do laha khon onḍeko girobasokʼkan tahẽkana; ar Amonrenko do Samsumi jạtren hoṛko metakokan tahẽkana.

²¹ Rephayimko do daṛean ar lekhare ḍhergeko tahẽkana. Ar Anakiko leka usul hoṛko tahẽkana. Probhu Isor do Amonrenko hotete onkoe maraoletʼkoa; ar Amonrenko do Rephayimkoko laga ńirketʼkote onkoakʼ jaegare girobasokʼko ehopʼena.

²² Probhu Isor do Esao bõsrenko babotre hõ inạ mitʼ kạmigeye kạmileda. Uni do onko hotete Horikoe maraoletʼkoa. Onko do Horikoko laga ńirketʼkote onkoakʼ jaega Seyirre teheń hạbicʼko girobasokʼ kana.

²³ Kaphtor khon Kaphtoriko hecʼkate Awikoko maraoketʼkote onkoakʼ jaegare girobasokʼko ehopʼena. Ar Awiko do unre Gasa hạbicʼ sanam atoreko girobasokʼkan tahẽkana.

²⁴ “Ona tayom Probhu Isor doe metadińa, ‘ape do oḍok hijukʼpe ar Arnon gaḍa paromkate calakʼpe. Ńelpe, iń do Hesbonren Amorikoren Sihon raj ar uniyakʼ disạm do apeakʼ tireń jimạ akada. Ape do uniyakʼ disạm dokhol iạte lạṛhại lạgitʼpe uskạukoa.

²⁵ Teheń khon dhạrtiren sanam jạtrenko talare ape reaṅ mitʼṭecʼ botoriń caṛhao ocoytakoa. Onko do apeakʼ kathako ańjomle khan botorteko thar tharaokʼa ar ape iạte ạḍiko cintạkʼa.’

Hesbonren Sihon raje bhagao ocokʼkan

²⁶ “Inạ tayom iń do suluk dohoy lạgitʼ Kedemot hahaṅkar khon Hesbonren Sihon raj ṭhen kathań roṛ gotʼkada,

²⁷ ‘amakʼ disạm talate calao ocoaleme baṛe. Ale do etom se końe secʼ bale beṅgeda ar ḍahartegele parom calakʼa.

^28-29 Ar ṭakate ale do amakʼ jomakʼ ar dakʼle kirińtama. Ente aleren Probhu Isor okaṭakʼ disạme emale lạgidokʼkan ar jordan gaḍa ạurile paromokʼ hạbicʼ amakʼ disạm talate taṛam parom ocoaleme. Seyirren hoṛ Esao bõsrenko ar Aer nagraharen Moabren hoṛko do aboko parom hecʼ ocowatʼbona.’

³⁰ Menkhan Hesbonren Sihon raj do bae rạjilena. Aboren Probhu Isor do uniyakʼ mone keṭecʼ ocoketʼtaea jemon aboakʼ tireye paṛaokʼ, ar ńitokʼ do onage hoyakana.

³¹ “Tayomte Probhu Isor do ińe metadińạ, ‘ńelpe, Sihon ar uniyakʼ rajosṭi do ape tireń jimạyeda. Am do ńitokʼ senkate uniyakʼ disạm dokhol joṅme ar onḍe girobasokʼpe.’

^32-33 “Inạ tayom tinre Sihon do abo sãote lạṛhại lạgitʼ acʼren lạṛhại phạdkoante Johasreye oḍok hecʼena unre aboren Probhu Isor do aboakʼ tire uniye jimạkedea. Ar abo do uni ar uniren sanam hoponko ar uniren lạṛhại phạdko bon maraoketʼkoa.

³⁴ Ona jokhecʼ abo do uniyakʼ sanam atoko ar nagrahako bon dokholketʼte onkoren herel hoponko, maejiuko ar gidrạko bon marao cabaketʼkoa; onkoren celege jiwetʼ do babon doholetʼkoa.

³⁵ Menkhan janwarko ar nagraha khon luṭ akan jinisko do apnar lạgitʼ bon ạgukeda.

³⁶ Ar Arnon soḍokʼ aṛe reakʼ Aroer nagraha ar ona soḍokʼ tala reakʼ ato khon ehopʼkate Gilead hạbicʼ nonkan jãhãn daṛeanakʼ atoko se nagraha do baṅ tahẽkana one okaṭakʼ do babon jitạu daṛeakʼ tahẽkan. Aboren Probhu Isor do onako sanamakʼge aboakʼ tireye jimạkeda.

³⁷ Eken Amonrenkoakʼ jaega, Jabok gaḍa aṛe reakʼ jaega, buru tala reakʼ jaega ar eṭakʼakʼ okako jaega senokʼe manaletʼ bon tahẽkan, onako jaega do ape hõ bape senlena.