Dosar Biboron 19 - সান্তালী বাইবেল

Asrayokʼ-nagrahako

¹ “Aperen Probhu Isor okaṭakʼ disạme emape lạgidokʼkan onḍe onko boṅgan hoṛ jạtrenko tinreye marao utạrkoa ar onkoakʼ ato, nagraha ar oṛakʼkorepe girobasokʼa,

^2-3 unre sompotti lekate aperen Probhu Isor emakʼ disạm do pe ṭhenpe hạṭińa. Onako modre Asrayokʼ nagraha lekate pea nagrahape begar dohokakʼa ar onḍe senokʼ reakʼ hor hõpe benaojoṅa. Jemon khũniạhi hoṛ do ona Asrayokʼ nagrahateye ńir bańcao daṛeakʼa.

⁴ “Ar khũniạhi hoṛ onḍeye ńir bańcaokʼte jiwiye bańcaotae reakʼ bondobos do nonka kana. Jãhãege acʼ pheḍren hoṛ begor kurudaeteye khũn emanlere,

⁵ jemon mitʼ hoṛ do eṭakʼ hoṛ sãote birte sahan makʼe sen akana. Ar onḍe sahan mamakʼ jokhecʼ mitʼ hoṛakʼ ṭeṅgocʼ do ḍanḍom khon bocʼkate eṭakʼ hoṛe josokʼ ar onate uni hoṛe gujukʼ. Unre khũniạhi hoṛ do onako asray nagraha reakʼ mitʼ nagrahate ńir senkate acʼakʼ jiwiye bańcao daṛeataea.

⁶ Ar baṅkhan mãyãm halayicʼ do raṅgaote uniye lagayea ar asrayokʼ nagraha ạuriye tiyogrege uni doe gojeya, menkhan mon khon ona bae kạmi akatʼte uni do gujukʼ reakʼ dusire bae paṛaokʼa.

⁷ Ona iạte ińiń hukum apekana ape lạgitʼ pea nagrahape begar dohokakʼa.

^8-9 “Aperen Probhu Isor dulạṛe ar jao okte uniyakʼ horte taṛam lạgitʼ teheń okako hukumiń emapekan ona joton salakʼpe pańjae enḍekhan aperen hapṛamko ṭhen kiriạkateye gokʼletʼ iạte Probhu Isor do apeakʼ simạnakoe baṛhao ocoytapea ar goṭa disạmgeye emapea. Unre ape lạgitʼ pea nagraha do Asrayokʼ nagraha lekatepe begar dohokakʼa.

¹⁰ Ape do noape nonkaea jemon sompotti lekate okaṭakʼ disạm aperen Probhu Isore emape lạgidokʼkan ona disạm cetanre bin dusạn hoṛkoakʼ mãyãm alo jorokʼ ar mãyãm reakʼ doste ape hõ dusire alope paṛaokʼ.

¹¹ “Menkhan jãhãe hoṛ edre iạte jãhãe goje lạgitʼ tãṛãkʼ akane tahen ar uniye gojete ona Asrayokʼ nagrahateye ńir bańcaokʼ,

¹² enḍekhan acʼakʼ nagraharen mukhiyạko do hoṛ kolkate ona nagrahateko sapʼ ạguyea ar mãyãm halayicʼakʼ tireko jimạyea jemon uniye goje.

¹³ Unre uni do alogepe dayawaea. Israelko tala khon bin dusạn hoṛkoakʼ mãyãm reakʼ dospe meṭao utạra. Ar onate bhạlại hoyokʼtapea.

¹⁴ “Aperen Probhu Isor okaṭakʼ disạm dokhol lạgitʼe emape lạgidokʼkan onḍe aperen hapṛamko ṭhik dohoakatʼ simạna reakʼ cinhạ do alope ocoga.

Gohako reaṅ

¹⁵ “Jãhãe birudre dusi se behok akatʼ reakʼ lạlis rakapʼlen khan, eken mitʼ hoṛakʼ gohate ghạṭ seye kại akada mente do ohoe dusi ocolena; bar se pe hoṛakʼ goha chaḍa jãhãnakʼge sạriyakʼkana mente do ohoge sạbudokʼa.

¹⁶ “Hạne reakʼ monsubạte jãhãe birudre behokakʼe lạlis,

¹⁷ enḍekhan ona babotre unkin bana hoṛge naeke se bikʼcạricʼ ṭhen idikate Probhu Isor samaṅre teṅgokin hoyokʼa.

¹⁸ Ar bikʼcạricʼ do mońjte suṭhik hataokateye ńelkatakina. Ar gokʼhayicʼ do eṛeyicʼ menteye sapʼ ńamokʼ,

¹⁹ enḍekhan acʼren boeha cetanre oka cekawaeye menletʼ onage uni cetanre hõ hoyocoe hoyokʼa. Ar ape tala khon nonkanko hoṛ dope marao utạrkoa.

²⁰ Inạkhan noa ańjomkate eṭakʼ Israelko do botor hecʼakoa ar nonkan behokakʼ do tisge bako kạmiya.

²¹ Uni hoṛ do daya hõ alope dayawaea, jiwi bodol jiwi, mẽtʼ bodol mẽtʼ, ḍaṭa bodol ḍaṭa, ti bodol ti ar jaṅga bodol jaṅga reakʼpe hala hạliya.