Dosar Biboron 18 - সান্তালী বাইবেল

Naeke ar Liwiko lạgitʼ dan

¹ “Liwi Naekeko ar Liwi gusṭiren eṭakʼ hoṛko do Israelko leka jãhãn jaega jumi se sompotti do bako ńama. Probhu Isor ńutumte seṅgelre samaṅokʼakʼ lạgitʼ okako jinis ạgukʼ ar Probhu Isor okako jinis emae hoyokʼ onage onko doko joma.

² Israel boehako talare sompotti mente onko do cetʼge baṅ tahentakoa. Probhu Isorakʼ gokʼakʼ lekate Isorge onkoren sompotti doe hoyokʼa.

³ “Disạm hoṛko okoe do ḍaṅgra, merom boda, bheḍako samaṅokʼakʼ lạgitʼko ạguko onko reakʼ phạṛi, banar jambe reakʼ jel ar remetʼ do naekeko emaea; noako do naekeakʼge hoyokʼa.

⁴ Apeakʼ pạhil rakapʼakʼ phosol, nãwã darkha rasa, sunum, merom ar bhiḍikoakʼ pạhil getʼakʼ upʼ hõ naekepe emaea,

⁵ ente aperen Probhu Isor do aperen sanam gusṭirenko tala khon Liwiko ar onkoren bõskogeye bachao akawana, jemon jao okte onko do Probhu Isorko sapʼsorae.

⁶ “Israelkoakʼ disạmren jãhãe Liwi hoṛ acʼakʼ nagraha khon Probhu Isore bachao akatʼ ṭhạ̃iteye hijukʼ,

⁷ enḍekhan eṭakʼ Liwi boehako leka uni hõ acʼren Probhu Isor ńutumte sekʼwa kạmiye kạmi daṛeakʼa.

⁸ Acʼren apate doho oṭoakatʼ jiniskoe ạkhriń akatʼrehõ onḍenko Liwiko sãote uni do hạṭińre soman ạidạriye hoyokʼa.

Probhu Isorakʼ mẽtʼãhãre bạṛicʼakʼko

⁹ “Aperen Probhu Isor ape okaṭakʼ disạme emape lạgidokʼkan onḍe senkate onḍenko jạtren hoṛ oka bạṛicʼakʼko kạmi ona do alope cetʼjoṅa.

¹⁰ Ape talare nonkan hoṛ aloko tahenma one okoe do acʼren hopon seṅgelre samaṅokʼ reakʼ porobe hoyocoe ar okoe doe gukʼni seye janokʼkan se darakan dinko reakʼe lại, okoe do jạdu biddạkoe udug,

¹¹ okoe do bhutko hoteteye kạmikan, okoe do bạṛicʼ jiu sãoteye peṛakʼ ar okoe do gocʼ hoṛkoe ḍakaoko.

¹² Onko do Probhu Isor lạgitʼ hirkhạwan hoṛ kanako. Ar nokoakʼ bạṛicʼakʼ iạtege aperen Isor do onko jạtrenko ape samaṅ khone laga ńirkoa.

¹³ Ape do aperen Probhu Isor samaṅre bin dusạnko leka baṛe tahenpe.

Mitʼṭen nạbi kole reakʼ lại laha

¹⁴ “Okoe jạtren hoṛkope bedokholko lạgidokʼkan onko do jạdu biddạ ar janokʼkoakʼ kathako luturakʼa, menkhan aperen Probhu Isor do onakoe mana akada.

¹⁵ Aperen Probhu Isor do Israel boehako tala khon iń leka mitʼṭen nạbiye teṅgoapea. Ar uniyakʼ katha leka ape do calakʼ hoyokʼtapea.

¹⁶ Horeb burure oka hilokʼ sanamko Probhu Isor samaṅrepe jarwalen enhilokʼge ape do aperen Probhu Isor ṭhen onagepe khojleda. Apepe menleda, ‘ale do aleren Probhu Isorakʼ katha alo baṛele ańjomma se niạ maraṅ seṅgel hõ alole ńelma; ar baṅkhan ale dole gujukʼa.’

¹⁷ “Probhu Isor do ińe metadiń tahẽkana, ‘onko do bhagegeko menakada.

¹⁸ Iń do onkoren Israel boehako tala khon onko lạgitʼ am leka mitʼṭen nạbiyiń teṅgo akoa. Ar uniyakʼ mocatege ińakʼ kathakoń roṛa, ar iń oka lạlạiyiń hukumae onage uni doe roṛa.

¹⁹ Uni nạbi do ińakʼ ńutumte oka kathae lại ar jãhãege ona katha bae ańjom, enḍekhan ińge uni hoṛ do dạyireń paṛao ocoyea.

²⁰ Menkhan iń oka bạń hukum akawade nonkan katha jãhãe nạbi ińakʼ ńutumte dilkate se debotakoakʼ ńutumte kathae roṛ, enḍekhan uni do gocʼ giḍikae hoyokʼa.’

²¹ “Jãhãn mitʼṭecʼ katha iạte mone montepe mendaṛekea, ‘Probhu Isor do noa kathae menakada se baṅ ona do cekatele baḍaea?’

²² Jãhãe nạbi Probhu Isor ńutumte jãhãn kathae roṛ ar ona do eṛeteakʼ hoyokʼ khan se onka baṅ hoylen khan, enḍekhan bujhạu hoyokʼa ona katha Probhu Isor do bae roṛ akada. Menkhan uni nạbige dilkateye roṛ akada. Uni do alope botoraea.