Dosar Biboron 17 - সান্তালী বাইবেল

¹ “Aperen Probhu Isor ńutumte nonkan ḍaṅgra se merom boda se bheḍa hõ alope samaṅkoa okoe do niphuṭ utạrko baṅkan, ente uni do onakoe hirkhạwakʼa.

² “Aperen Probhu Isore emape lạgidokʼkan ato se nagrahare hoedaṛeakʼa, ape modren jãhãe herel hoṛ se maejiu Probhu Isorakʼ emakʼ bondobos rạputʼkate uniyakʼ nońjorre oka bạṛicʼakʼkan onageye onkae.

³ Ar hoedaṛeakʼa uni do ińakʼ hukum birudre senkate debotakoe sewawako ar onko debota se siń cando, ńindạ cando se sermaren ipilkoe sewawako.

⁴ Ar onako reakʼpe baḍae lekhan, ona reakʼ mońjtepe suṭhik hataoa. Ar sạrikan khan ar Israelko talare hirkhạwanakʼ kạmi hoyakana mente sạbudokʼ khan,

⁵ enḍekhan okoe herel hoṛ se maejiu nonkae kạmiakatʼ uni do ato se nagraha reakʼ bahre phaṭok duạr ṭhen idikate dhiritepe tiń gojea.

⁶ Ar gocʼ ocokʼicʼ do bar se pe hoṛakʼ gohako reakʼ gohawakʼ iạte goje hoyokʼa; menkhan eken mitʼ hoṛakʼ goha iạte do alope onkaea.

⁷ Uni hoṛ goje lạgitʼ do gohakoge pạhilre dhiriteko tiń maṛaṅema, ar ona tayom do eṭakʼ hoṛkoko tińea. Ar nonkate ape tala khon uni bạṛicʼ hoṛpe marao giḍikaea.

Kuṭhin bicạr reakʼ hukum

⁸ “Apeakʼ nonkanakʼ mamblako adalotre bicạr lạgitʼ muskilge bujhạukʼ khan- baṅ do khun khun talare ar baṅ do hok hok talare ar baṅ do hạn hạn talare enḍekhan ona mambla do Probhu Isore bachao akawan ṭhạ̃ite idiy hoyokʼtapea.

⁹ Unre ape do un jokhecʼren bikʼcạricʼ ar Liwiko talaren naekeko ṭhenpe calakʼa. Onko ṭhenpe kulijoṅa ar apeakʼ bicạr reakʼ rayko lạiyapea.

¹⁰ Probhu Isor bachao akawan thạ̃ire onko okaṭakʼ rayko baḍae ocope ona lekage ape dope kạmiya. Tobe sontor akae tahenpe, onko okaṭakʼko metape ona reakʼ cetʼge alope bad oṭokakʼa.

¹¹ Onko do ạn-ạri reaṅ okako cetʼape ar okaṭakʼ rayko emokʼ ona lekagepe kạmiya. Ar okaṭakʼko metape ṭhik ona lekagepe onkaea, oka secʼge alope ghańjeṛa.

¹² Jãhãe hoṛ bạḍại salakʼ uni bikʼcạricʼakʼ katha se aperen Probhu Isorren sapʼdapʼicʼ naekeakʼ katha bae ańjom, enḍekhan uni do khạṭige gocʼ giḍikae hoyokʼa. Ar Israelko tala khon nonkan bạṛicʼ hoṛ dope marao utạrkoa.

¹³ Enḍekhan ona katha ańjomkate hoṛko do botor caṛhao akoa ar nonka bako bạḍạiyokʼa.

Raj bahale reakʼ

¹⁴ “Aperen Probhu Isor okaṭakʼ disạme emape lạgidokʼkan ona dokhol tayom tinre onḍepe girobasokʼa arpe mena, ‘dela, aḍepaseren jạtrenko leka, abo hõ mitʼṭen raj bon bachao joṅa,’

¹⁵ unre aperen Probhu Isor okoeye ṭhikape unigepe rajea. Ar uni do aperen Israel boehako modren mitʼ hoṛge jemone hoyokʼ. Okoe aperen Israel boehae baṅkan nonkan eṭakʼ jạtren hoṛ do alope rajkoa.

¹⁶ Uni raj do acʼ lạgitʼ ḍher sadomko aloe dohojoṅma ar inạ tayom arhõ aema sadomko ńamjoṅ lạgitʼ Misor disạmte Israelko aloe kolkoma, ente Probhu Isore menakada, ‘ona disạmte do ar tishõ alope ruạṛ calakʼa.’

¹⁷ Uni do aema aloe bạhu joṅma; onate uni do eṭakʼ secʼe ghańjeṛokʼa. Uni do apnar lạgitʼ sona rupạ aema aloe jarwajoṅma.

¹⁸ “Liwiko modren okoe doko naekekan ar onko ṭhen ạn-ạri reakʼ okako puthi menakʼ siṅghạsonre duṛubokʼ jokhecʼ onako puthi khon acʼ lạgitʼ joto ạn-ạriko reakʼ mitʼṭecʼ nokole oljoṅa.

¹⁹ Ona do acʼ ṭhengeye dohokakʼa ar jiwetʼ jonom onae paṛhaoa jemon Probhu Isore botoraete ạn-ạri reakʼ kathakoe manao idiy.

²⁰ Onate eṭakʼ Israel boehako khon bae usulokʼa ar ạn-ạri khon bae ghańjeṛokʼa. Onate uni ar uni bõsrenko Israelko cetanre ḍher dinko raj daṛeakʼa.