Dosar Biboron 15 - সান্তালী বাইবেল

Rin khon khalasokʼ reakʼ bochor

¹ “Eae bochor mucạtʼre rin khonpe khalaskoa.

² Ape do noa dharatepe khalaskoa: Mimitʼ Israel mahajon do eṭakʼ Israelkoe khalaskoa. Rin khalas lạgitʼ Probhu Isor okaṭakʼ okteye ṭhik dohoakatʼ ona sodor tayom Israel boehako ṭhen khon rin halae reakʼ do bape dạbi daṛeakʼa.

³ Menkhan eṭakʼ jạtren hoṛko ṭhen dope dạbi daṛeakʼa, ar aperen boehakoakʼ rin dope khalaskatakoa.

^4-5 Aperen Probhu Isorakʼ kathare batao akanpe tahen ar teheń okako hukumiń emapekan ona reakʼpe moneyakʼ, enḍekhan ape modre okoehõ bape reṅgejokʼa, ente sompotti lekate okaṭakʼ disạm aperen Probhu Isore emape lạgidokʼkan uni do onḍe ạḍiye bhorapea.

⁶ Aperen Probhu Isor do acʼakʼ gokʼakʼ lekateye bhorapea, ar onate ape do jạt jạtren hoṛko rinpe emakoa, menkhan ape do okoe ṭhen khon hõ rin bape hataoa ar baṅ lagaoapea. Ape do ạḍi utạr jạtrenkope ḍanṭaokoa menkhan okoe hõ ape do bako ḍanṭaopea.

⁷ “Aperen Probhu Isor okaṭakʼ disạme emape lạgidokʼkan ona disạmre aperen boehako modre jãhãege reṅgecʼreye paṛaokʼ, enḍekhan unire apeakʼ ontor do alope keṭejtapea, se uni reṅgecʼ boeha lạgitʼ apeakʼ ti do muṭ akae alope dohoytapea.

⁸ Apeakʼ ti do jemon khulạge tahen; ape do uniyakʼ jạruṛokʼakʼ leka pańcape emaea.

⁹ Sontorokʼpe, apeakʼ monre dusṭạmi hudis do alope rakapʼ ocoya je, eaeakʼ bochor, metakʼme rin khalas reakʼ bochor hecʼakana mente. Ar noa hudiskate reṅgecʼre paṛao akan boeha secʼ alope kurkunḍujokʼa ar eken ti alope bidạgotʼkaea. Arpe onkae khan uni do Probhu Isor ṭhen ape upạrteye raga ar bicạre khoja onate apepe behoketʼ iạte dusirepe paṛaokʼa.

¹⁰ Ar monre haso dohokate do alope emaea; enḍekhan Probhu Isor do apeakʼ sanam kạmireye bhorapea ar jãhãnakʼrege hatpe lagao onaregepe jo bahakʼa.

¹¹ Reṅgecʼ hoṛ do dhạrtireko tahengea. Onate noań hukumape kana, aperen boehako secʼ ar disạmren reṅgecʼ ar nacar hoṛko secʼ apeakʼ ti do khulạge tahentape ma.

Guti ar kạ̃ṛmĩkoakʼ chaḍaokʼ

¹² “Jãhãe Ibri herel se maejiu hoṛ ape ṭhene ạkhrińokʼ, enḍekhan turui bochor ape ṭhen golame khaṭaokʼa ar eaeakʼ bochorre doe sạdhin ocokʼa.

¹³ Ar sạdhine oktere uni do eken ti alope bidạ gotʼkaea.

¹⁴ Ape do kharsala monte aperen merom se bhiḍi, se khạrại reakʼ anaj ar darkha jo lelen kunḍ khon darkha rasape emaea. Aperen Probhu Isor oka lekae bhor akawatʼpe onkage uni hõpe emaea.

¹⁵ Disạipe, Misor disạmre ape hõ golampe tahẽkana ar aperen Probhu Isor doe chaḍao akatʼpea. Ona iạte iń do noako hukumiń emapekana.

¹⁶ “Menkhan uni guti do apeakʼ gharońjren hoṛkoe dulạṛko ar ape ṭhen sukrege menae iạte bae bạgiyape,

¹⁷ enḍekhan uni do sạlạkte luturpe pạṭi tabtaea; ar onate uni do goṭa jion aperen golam akane tahena. Ar aperen kạ̃ṛmĩ cetanrehõpe onkaea.

¹⁸ “Aperen guti se kạ̃ṛmĩ do sạdhintepe sen ocoaere hamal do alope hudisa; ente niạ turui bochor ape ṭhen khaṭaokʼ reakʼ dam do barea mujurikin reakʼ soman kana. Onkope sạdhinleko khan aperen Probhu Isor do sanamakʼe bhoratapea.

Janwarkoren pạhil hopon

¹⁹ “Aperen ḍaṅgra, bhiḍi ar meromkoren mimitʼ pạhil janam akan ạnḍiạ hoponko do aperen Probhu Isor ńutumtepe begar dohokoa. Ar ḍaṅgraren pạhil hoponko hõ kạmire alope lagaokoa ar bhiḍi ar meromren pạhil hoponkoakʼ upʼ hõ alope kạpciy takoa.

²⁰ Aperen Probhu Isorre bachao akawan ṭhạ̃ire jao bochor ape do gharońjrenko sãote onako reakʼ jelpe joma.

²¹ Menkhan onko janwarko modren jãhãeṭakʼge niphuṭ utạricʼ bae tahen, metakʼme leḍha se kãṛã se uniyakʼ hoṛmore jãhãn dos tahen, enḍekhan uni do aperen Probhu Isor ńutumte alope samaṅea.

²² Onkanko do apeakʼ nagraharegepe jomkoa. Sapha-besapha jãhãe hoṛge jhaṅkaṛ se selepʼ jelakʼ jel lekagepe jom daṛeakʼa.

²³ Menkhan uniyakʼ mãyãm do alope joma; dakʼ leka ona do otrepe dul giḍikakʼa.