Dosar Biboron 14 - সান্তালী বাইবেল

Hoṛmo hạṭiń alo hạn reaṅ

¹ “Ape do aperen Probhu Isorren hoponko kanape. Ona iạte gocʼ hoṛko lạgitʼpe rakʼ homor joṅre hoṛmore alope getʼ cirokʼa, se bohokʼ samaṅ secʼ alope hoyo poṭorokʼa.

² Ape do Probhu Isor ńutumte mitʼṭen begar akan jạtrenko kanape. Dhạrtiren sanam jạtrenko mod khon Probhu Isor do apegeye bachao akatʼpea jemon uniren ạidạri porjakope hoyokʼ.

Sapha ar besapha janwarko

³ “Ape do jãhãn hirkhạwakʼ jinisko alope joma.

⁴ Okoeko janwarakʼ jelpe jom daṛeakʼ onko doko hoyokʼ kana ḍaṅgra, bhiḍi, merom,

⁵ jhaṅkaṛ, selepʼ jel, ṭiklạkʼ jel, bir merom, bhạ̃uṭiạ jel, ar kạpil gại.

⁶ Okoeko janwarakʼ khurạ bar hạṭińte cirạge ar okoeko pạgur onko janwarakʼ jel dope jom daṛeakʼgea.

⁷ Menkhan ekenko pạgur se eken khurạ moto hạṭińgetako onkan janwarkoakʼ jel do bape jom daṛeakʼa. Ũṭ, kulại, saphon kulạiyakʼ jel do alope joma, ente onko doko pạgurgere hõ khurạ do baṅ bar hạṭińgetakoa. Onate onko doko besaphagea.

⁸ Sukri doko besaphagea; khurạ hạṭińgetakore hõ bako pạgura. Onkoakʼ jel do alope joma ar joṭetʼ hõ alope joṭeda.

⁹ “Dakʼreko tahen jiwiyanko modre okoekoakʼ il ar cũyạkʼ menakʼtako eken onkogepe jom daṛeakoa,

¹⁰ menkhan okoekoakʼ il ar cũyạkʼ bạnukʼtako onko do alope jomkoa. Onko do ape lạgitʼko besaphagea.

^11-18 “Jãhãn sapha cẽṛẽ dope jom daṛeakogea; menkhan noko do alope jomkoa; buru pajhaṛ, seṅgel gidi, hako sapʼ pajhaṛ, tarse koṭapʼ, jalo, kũṛĩtʼ, ar onko jạtrenko, mitʼke mitʼ kạhu ar onko jạtrenko, ũṭ cẽṛẽ, ńindạ pajhaṛ, dakʼ kẽhẽ, ṭirmuṭi ar onko jạtrenko, kokor, dundu, dereń kokor, bonbayar, gidi, kikir, ḍheṅka kõkʼ ar onko jạtrenko, ḍablạ kuṭạm ar barduṛũcʼ.

¹⁹ “Ar sanam cĩuṭi pipṛiko hõ ape lạgitʼko besaphagea; onko do alope jomkoa,

²⁰ Menkhan sanam sapha uḍạukʼko dope jom daṛeakogea.

²¹ “Gocʼ akan nonkan jãhãn jiwiyanko hõ alope jomkoa, ente ape do aperen Probhu Isor ńutumte mitʼṭecʼ begar akan jạtrenko kanape. Apeakʼ ato se nagrahareko girobasokʼkan eṭakʼ jạtren hoṛko ona dope em daṛeakoa ar ona do onkoko jom daṛeakʼa, se eṭakʼ porjạtrenko ṭhen dope ạkhriń daṛeakoa.

Gelakʼ hĩs

²² “Jao bochor apeakʼ jumire okako phosol hoyokʼ ona reakʼ gel hạṭiń reakʼ mitʼ hạṭiń dope begar dohokakʼa.

²³ Aperen Probhu Isor botoraepe ar apeakʼ anaj ar phosol reakʼ, nãwã darkha rasa ar sunum reakʼ gel hạṭiń reakʼ mitʼ hạṭiń do emokʼ hoyokʼtapea. Ar aperen palren ḍaṅgra, bhiḍi, meromkoren pạhilicʼ hopon reakʼ jel do aperen Probhu Isor samaṅre nonkan ṭhạ̃ire jojom hoyokʼtapea one okaṭakʼ ṭhạ̃ire sodorokʼ lạgitʼte acʼakʼ tahen oṛakʼ menteye bachaojoṅ.

²⁴ Menkhan ona ṭhạ̃i do sạṅgińre menakʼ khan ar Probhu Isor nunạkʼe bhor akatʼpete ona gel hạṭiń reakʼ mitʼ hạṭińko sạṅgiń hor iạte bape idi daṛeakʼ khan,

²⁵ ona dope ạkhrińa ar ona ạkhriń reakʼ ṭaka do aperen Probhu Isore bachao akawan ṭhạ̃itepe idi oṭokakʼa.

²⁶ Ar ona ṭakate apeakʼ kusi leka jiniskope kirińa, jemon ḍaṅgra, merom, bhiḍi, darkha rasa, eṭakʼ jãhãnakʼ se apeakʼ kusi leka jãhãnakʼgepe kiriń daṛeakʼa. Ona tayom do apeakʼ gharońjrenko tulucʼ aperen Probhu Isor samaṅre jom ńũkatepe rạskạkʼa.

²⁷ Ar okoe Liwiko apeakʼ ato se nagrahareko girobasokʼkan onko do alope hiṛińkoa, ente onko do apnarakʼ mente jãhãnakʼ cetʼge, metakʼme jaega jumi do bạnukʼtakoa.

²⁸ “Mimitʼ tesar bochor reakʼ sesre apeakʼ ona bochor reakʼ phosol reakʼ gel hạṭiń reakʼ mitʼ hạṭiń do nagraha bahrete ạgukatepe jarwaea.

²⁹ Ar onate Liwiko, okoe do apnarakʼ mente cetʼ jaega jumi se sompotti bạnukʼtako ar onḍe menakʼko porjạtrenko, rạnḍiko ar ṭũạr amarko onako jom daṛeakʼa. Onate apeakʼ sanam kạmire aperen Probhu Isor doe bhorapea.