Dosar Biboron 13 - সান্তালী বাইবেল

Murhutʼ sekʼwa upạrte cehaona

^1-2 “Ape modren jãhãn nạbi se kukmũ ńelkate tayom daram reakʼ kathae lại daṛeakʼ nonkanicʼ jãhãeye upellen khan ar ape ṭhen jãhãn hahaṛa cinhạ se kạmi reakʼ kathae men ar sạrige ona hoyokʼ. Ar uni hoṛ hõ ape ṭhen nãwãn nonkan debotako reaṅ katha lạiyapeteye men, ‘dela bon pańjakoma arbon sewawakoma,’

³ Enḍekhan uni nạbi se kukmũ ńeńel hoṛakʼ katha alope ańjomtaea. Ente aperen Probhu Isor do mon ar ontortepe dulạṛedekana se baṅa ona ńel lạgitʼ biḍạureye paṛao ocoyetʼpea.

⁴ Ape do aperen Probhu Isorakʼ katha leka calakʼ hoyokʼtapea ar uni botorae hoyokʼtapea. Ape do uniyakʼ hukumkope manaoa arpe bataotaea; unipe sewawaea ar unirege jamaṛ akaepe tahena.

⁵ Menkhan uni nạbi se uni kukmũ ńeńelicʼ hoṛ dope gocʼ giḍikaea, ente aperen Probhu Isor, okoe do Misor disạm khone oḍok ạguakatʼpe ar golam oṛakʼ khone chaḍao akatʼpe, uni upạrteye uskạu akatʼpea ar aperen Probhu Isor oka horte calakʼ reakʼe hukumakatʼpe ona hor khon ruạṛpe lạgitʼe kurumuṭukana. Onate ape tala khon uni bạṛicʼicʼ dope marao giḍikaea.

^6-7 “Dhạrti reakʼ mitʼ simạna khon eṭakʼ simạna hạbicʼ ape beṛhaeten sor ar sạṅgińren okoe do debotako sewawako kan, ar okoe do amren hapṛamkoren bin baḍayicʼ uni debota secʼ amren boeha se amren hopon ar hoponerako se amren bạhu se amren gate am ńamkate bạṛicʼ horte calakʼ lạgitʼe metam, ‘dela, debotako laṅ sewawakoa,’

⁸ enḍekhan uniyakʼ do alom luturakʼa ar ańjom hõ alom ańjomtaea. Uni do alom dayawaea; ar alom aṛagea, se alom rukhiyạyea.

⁹ Uni do gojetege hoyokʼa. Ar uni gocʼ giḍikae reakʼ kạmi do amakʼ titege ehob hoyokʼtama, ar inạ tayom do eṭakʼkoko seledokʼa.

¹⁰ Misor disạm reakʼ golam oṛakʼ khon okoeye oḍok ạguakatʼme amren Probhu Isor secʼ khon ruạṛmeye kurumuṭuyetʼ khan uni do dhiritem tiń gojea.

¹¹ Onate Israel do sanamkoge niạ katha ańjomkate botor caṛhaoakoa ar ape modren okoe hõ nonkan bạṛicʼ kạmi do bako kạmiya.

¹² “Aperen Probhu Isor okako ato se nagrahako girobasokʼ lạgitʼe em lạgidokʼkan ona jãhãṭakʼ reaṅ hoedaṛeakʼape ańjom ńama,

¹³ onḍenko Israelko modren thoṛa bạṛicʼ hoṛ do onḍenko hoṛko niạ menkate bạṛicʼ horteko or idiakatʼko, ‘dela bon, debotako bon sewawako ma,’ okoe do abo ṭhenko nãwãge.

¹⁴ Ar onage hoyokʼ khan ape do mońj okocʼte suṭhik hataokate biḍạu aṭkarpe. Ar sạrikana mente sạbudlen khan bạṛicʼ utạrakʼ kạmi ape talare hoyakante,

¹⁵ onḍenko sanam hoṛge gocʼ giḍikako hoyokʼa. Ar ape do ona ato ar nagraha, onaren hoṛko ar janwarko purạtepe marao cabakoa.

¹⁶ Ar onḍenakʼ luṭ ạguwakʼ joto jinisko do nagraha reakʼ tala kulhirepe dohoya ar sanamakʼ jinisko, ona ato ar nagraha hõ aperen Probhu Isor ńutumte jeredokʼ samaṅokʼakʼ leka purạtepe jeretʼ giḍikakʼa. Ona jaega do jaejug hạbicʼ ḍhipi leka tahena; ar ona do tishõ baṅ benao hoyokʼ.

¹⁷ Probhu Isor jemon acʼakʼ botoranakʼ edre khone ruạṛokʼ onate apeakʼ tire noako jinis reakʼ mitʼṭen hõ jemon alo ńelokʼ, ente onare do maraokʼ reakʼ sarap menakʼa. Enḍekhan uni do daya are mãyãwapea ar aperen hapṛamko ṭhen kiriạkateye gokʼletʼ iạte aperen bõskoe bạḍ ocokoa,

¹⁸ ente teheń okako hukumiń emapekan onape bataotae ar aperen Probhu Isorakʼ nońjorre ṭhikakʼpe kạmi.