Dosar Biboron 12 - সান্তালী বাইবেল

Dewa sewae lạgitʼ mitʼṭecʼ jaega

¹ “Aperen hapṛamkoren Probhu Isor okaṭakʼ disạm dokhol lạgitʼe em akatʼpe onḍe dhạrti ṭuṅdạṅ bhor noako niạm ar hukumko joton salakʼpe manaoa.

² Okoe jạtrenkoakʼ bedokhol lạgitʼpe calakʼkan onḍe usul buru ar boṭkocʼkore ar hạriạṛ dare buṭạkore akoren debotako sewawako kan tahẽkan onako jaega dope marao giḍikakʼa.

³ Onkoakʼ than boṭkocʼko, onkoakʼ sewawakʼ dhiriko, murhutʼ khunṭiko ar debotawakʼ muṭhạnkope rạputʼ giḍikakʼa ar nonkate onako jaega khon onkoren debotakoakʼ ńutumpe meṭao utạra.

⁴ “Aperen Probhu Isorakʼ dekʼwa sewa do onkoakʼ sewa leka do alope onkaea.

⁵ Menkhan aperen Probhu Isor do apnar sodorokʼ lạgitʼ aperen gusṭiko emakʼ jaega khon okaṭakʼ ṭhạ̃i acʼ lạgitʼe bachao joṅ onḍege sewawae lạgitʼ calakʼpe.

⁶ Ape do aperen jeredokʼ samaṅokʼakʼ ar eṭakʼ janwar samaṅokʼakʼ, apeakʼ gel hạṭiń reakʼ mitʼ hạṭiń, tulokʼ samaṅokʼakʼ ar manotakʼ samaṅokʼakʼ, kusiteakʼ samaṅokʼakʼ ar aperen ḍaṅgrako, bhiḍiko ar meromkoren pạhilicʼ hoponge onḍepe idikoa.

⁷ Onḍege aperen Probhu Isor samaṅre apeakʼ gharońjrenko salakʼpe jom ńũiya ar uniyakʼ bhor iạtepe ńamakatʼ apeakʼ khaṭao akan reakʼ kuṛại iạtepe rạskạkʼa.

^8-9 “Aperen Probhu Isor do sulukte girobasokʼ lạgitʼ okaṭakʼ sompottiye emape lạgidokʼkan onḍe do ńit hõ ạuripe seṭerokʼa. Ar ona disạmpe bololenre jãhãege acʼakʼ kusi sanaleka aloe kạmima.

¹⁰ Aperen Probhu Isor do sompotti lekate okaṭakʼ disạme emape lạgidokʼkan ar jordan gaḍa paromkate tinre onḍepe girobasokʼa unre uni do beṛhaeten bạiriko sãote lạṛhại khone jirạu ocopea, ar nirạite onḍepe girobasokʼa.

¹¹ Unre uni do acʼ sodorokʼ lạgitʼ okaṭakʼ ṭhạ̃i acʼ tahen lạgitʼe bachaojoṅ onḍege ape do oneń hukum akawatʼpe jotowakʼ jinisko idikate apeakʼ jeredokʼ samaṅokʼakʼ ar eṭakʼ janwar samaṅokʼakʼ, apeakʼ gel hạṭiń reakʼ mitʼ hạṭiń, tulokʼ samaṅokʼakʼ ar Probhu Isor ṭhenpe manotakatʼ reakʼ samaṅokʼakʼko uni ṭhenpe ạguiya.

¹² Ar onḍe aperen Probhu Isor samaṅre ape ar apren hoponko, hoponerako, aperen guti-kạ̃ṛmĩko, ato ar nagraharen Liwiko okoe do apnarakʼ mente jãhãn jaega-jumi se sompotti bạnukʼtako onko sanamko sãotepe rạskạ midokʼa.

¹³ Ńelpe, apepe kusiyakʼ jãhãn ṭhạ̃ire jeredokʼ samaṅokʼakʼ do alope samaṅa.

¹⁴ Aperen gusṭiko khon emakʼ okaṭakʼ ṭhạ̃i Probhu Isore bachao joṅ onḍege jeredokʼ samaṅokʼakʼpe samaṅa ar onḍege ińiń hukum akatʼ reakʼ jotowakʼpe kạmiya.

¹⁵ “Enḍekhan aperen Probhu Isor do apeye bhorapete okoeko janwarkoe emape onko do jãhãn atore se nagrahare gocʼkate apeakʼ kusileka jelpe jom daṛeakʼa, cetʼleka aperen sapha ar besapha sanam hoṛ selepʼ jel se jhaṅkaṛ jelpe jom daṛeako.

¹⁶ Menkhan mãyãm jom do baṅ ganaokʼtapea; ona do dakʼ leka otrepe dul giḍikakʼa.

¹⁷ Ona chaḍa apeakʼ, anaj, nãwã darkha rasa ar sunum reakʼ gel hạṭiń reakʼ mitʼ hạṭiń, ar ḍaṅgrako, bhiḍiko, meromkoren pạhil hoponko, apeakʼ manot akatʼakʼko, tulokʼ samaṅokʼakʼko ar kusiteakʼ danko do apeakʼ nij ato se nagrahakore jom do baṅ ganokʼtapea.

¹⁸ Aperen Probhu Isore bachao akatʼ ṭhạ̃ire uni samaṅre jojom hoyokʼtapea. Ape, aperen gidrạko, aperen guti-kạ̃ṛmĩko ar apeakʼ ato ar nagraharen Liwiko do onako joma ar apeakʼ khaṭaoakʼ reakʼ kuṛại iạte aperen Probhu Isor samaṅrepe rạskạ midokʼa.

¹⁹ Apeakʼ disạmre tinạkʼ dinpe girobasokʼ unạkʼ din ape do Liwikope ńel todarotkoa.

²⁰ “Aperen Probhu Isor do acʼakʼ gokʼakʼ lekate apeakʼ disạm reakʼ simạnakoe phaelao ocoytapere men, ‘jel jojom sanayetʼlea,’ unre apeakʼ kusi leka jelpe jom daṛeakʼa.

²¹ Aperen Probhu Isor do apnar sodorokʼ lạgitʼ okaṭakʼ ṭhạ̃iye bachao joṅ ar ape khon ona ḍherge sạṅgińokʼ khan, tobe iń emakʼ hukum lekate Probhu Isorre emakan aperen ḍaṅgra ar bheḍa do pal khon hataokatepe gur daṛeakoa ar apan ạpin ato ar nagrahakore apeakʼ sana leka jelpe jom daṛeakʼa.

²² Selepʼ ar jhaṅkaṛ jel lekage ape do jelpe joma. Sapha ar besapha sanamkoge ona dope jom daṛeakʼa.

²³ Menkhan sontor akae tahenpe mãyãm do alope joma, ente mãyãmkangea jiwi do, onate jel sãote jiwi hõ alope joma.

²⁴ Ona do alogepe joma, dakʼ leka otrepe dul giḍikakʼa.

²⁵ Ape ar ape tayom jemon aperen hopon ar hoponerakoakʼ bhạlại hoyokʼtako onate ape do mãyãm alope joma; inạ khan Probhu Isorakʼ mẽtʼãhã samaṅre ṭhikakʼ hoyokʼa.

²⁶ “Probhu Isore bachao akatʼ ṭhạ̃ire apeakʼ sonot jinisko ar manot akatʼakʼ jinisko idiy hoyokʼtapea.

²⁷ Aperen Probhu Isorakʼ pinḍ cetanre apeakʼ jeredokʼ samaṅokʼakʼ reakʼ jel ar mãyãmpe samaṅa. Aperen Probhu Isorakʼ pinḍre aperen samaṅicʼ janwarakʼ mãyãmpe dula, menkhan uniyakʼ jel dope jom daṛeakʼa.

²⁸ Ape ar aperen hoponko ar hoponerako jemon jao okte bhạlại hoyokʼtako onate iń emakʼ noako hukum joton salakʼ manaope, ente onape onkale khan aperen Probhu Isorakʼ mẽtʼre ṭhikakʼpe kạmiya.

^29-30 “Ar okoeko jạtrenko bedokholko lạgitʼpe calakʼkan aperen Probhu Isor do ape samaṅ khon onkoe marao utạrkoa. Menkhan onkope bedokholko tayom onkoakʼ disạmrepe girobasokʼa unre ape do sontorokʼ hoyokʼtapea jemon onkoren debotakoakʼ jhạlire alope paṛaokʼ ar alope kuliya, ‘noko jạtrenko do okaleka akoren debotako sewawako kan tahẽkana mente?’ Arpe men boteja, ‘abo hõ bon onkaea.’

³¹ Ape do aperen Probhu Isorakʼ dekʼwa sewa do onkoakʼ sewa leka alope onkaea, ente onko do debotakoko sewawakore joto lekanakʼ hirkhạwakʼko kạmikana one okaṭakʼ do Probhu Isore hirkhạwakʼkan. Onko do debotako ńutumte seṅgelre akoren gidrạkoko khadleyetʼkoa.

³² “Iń okakoń hukumatʼpe onako sanamakʼpe manaoa; ar noa sãote cetʼ hõ alope juṭucʼakʼa, ar niạ khon jãhãnakʼ hõ alope kaṭaoa.