Dosar Biboron 11 - সান্তালী বাইবেল

Probhu Isor dulạṛe ar uniyakʼ hukum manao reakʼ

¹ “Aperen Probhu Isor dulạṛepe ar uni okae khojkan ona baṛe kạmipe ar uniyakʼ niạmko, hukumko bataotaepe.

² Teheń disạ dohokakʼpe, noako katha do ape ṭhengeń meneda, aperen hoponko ṭhen do baṅa, ente onko do aperen Isorakʼ benao rakapʼakʼ reakʼ do bako baḍaea ar ńelhõ bako ńelakada. Onko do uniyakʼ ṭhonok ar uniyakʼ daṛeanakʼ tiạrakatʼ ti hõ bako ńel akatʼtaea.

³ Misor talare Misorren raj Pharao ar uniyakʼ goṭa disạm cetanre uni okako cinhạ kạmiye kạmiletʼ ar eṭakʼakʼkoe cekaletʼ onako hõ bako ńelakada.

⁴ Misorren palṭonko, onkoren sadomko ar gạḍiko cetanre Probhu Isor okae cekaletʼ ar onko tinre apeko khudạuletʼpere cetʼleka arakʼ doreão reakʼ dakʼreye unum ocoketʼko ar cetʼlekae maraoketʼko ona hõ bako ńelakada.

⁵ Ar nonḍe ạuripe seṭerokʼ hạbicʼ ape lạgitʼ hahaṅkarre uni okae cekaletʼ ona hõ aperen hopon ar hoponerako do bako ńelakada.

⁶ Uni do Ruben gusṭiren Eliabren hopon Dathan ar Abiram cetanre okae cekaletʼ, metakʼme cetʼleka Israelko samaṅre otre cahapʼ ocoketʼte unkin ar unkin gharońjren hoṛko, onkoakʼ tạmbuko ar onkoren sanam jiwiyankoe utʼ ocoketʼko ona hõ bako ńelakada.

⁷ Menkhan ape do Probhu Isorakʼ maraṅ maraṅakʼ kạmiko apnarakʼ nij mẽtʼtepe ńelakada.

^8-9 “Ar okaṭakʼ disạm dokhol lạgitʼ ape do jordan gaḍape parom lạgidokʼkan onḍe senkate jemon onape dokhol daṛeakʼ ar Probhu Isor aperen hapṛamko ṭhen toa ar dumur rasate perecʼ okaṭakʼ disạm emako reakʼe gokʼletʼ tahẽkana onḍe ḍher din jemon jiwetʼpe tahen onate teheń okań hukumapekan onape manaoa.

¹⁰ Ar okaṭakʼ disạm dokhol lạgitʼpe calakʼkan ona disạm do Misor leka do baṅkana one oka khonpe oḍok hecʼakan. Ape do onḍe itạpe eretʼ tahẽkana, ar anaj khetre cetʼleka dakʼ paṭao hoyokʼ onkage jaṅgate dakʼ arecʼ reakʼpe kạmikan tahẽkana.

¹¹ Menkhan jordan gaḍa paromkate oka disạm dokhol lạgitʼpe calakʼkan ona do buru boṭkocʼ ar sokṛa disạm kana; ona disạmre do serma khon dakʼ ńamokʼa.

¹² Ona disạm do Probhu Isorgeye ńel todarotetʼ kana. Bochor reakʼ ehopʼ khon mucạtʼ hạbicʼ uniyakʼ mẽtʼãhã do jao ghuṛi ona disạm cetanre menakʼtaea.

¹³ “Ape do aperen Probhu Isorpe dulạṛea ar goṭa mon ar ontorte uni sewawae reakʼ okaṭakʼ iń hukum akatʼpe ona pạtiạr salakʼpe manaoa.

¹⁴ Arpe onkae khan Probhu Isor do okte nạpitre, apeakʼ disạmre dakʼe kola ar onate ḍher anaj, darkha jo ar sunumpe ńama.

¹⁵ Probhu Isor do aperen palren janwarko lạgitʼ ghãsko ṭạnḍireye janam ocoya. Ona chaḍa ape hõ lacʼ bikʼpe joma.

¹⁶ “Menkhan sontor akae tahenpe, ar baṅ khan eṛeyakʼrepe paṛaokʼte Probhu Isor ṭhen khonpe pharakokʼa ar debotakope sewawakoa.

¹⁷ Onate Probhu Isor do ape cetanre edrete pit caṛhaokʼtaea ar serma reakʼ duạrkoe bond ocoya, onate dakʼ hõ bae kola ar jumire phosol hõ baṅ hoyokʼa. Ar okaṭakʼ mońj disạm Probhu Isorre emape lạgidokʼkan onḍe thoṛa dintegepe marao utạrokʼa.

¹⁸ Apeakʼ mon ar ontorre ińakʼ noako kathape rebetʼ dohokakʼa, ar disạ dohoy reakʼ cinhạ lekate tire hõpe tolkakʼa ar mạndạli leka cạndirepe dohoya.

¹⁹ Ar aperen hoponko onakope cetʼakoa. Oṛakʼre duṛupʼkokʼ oktere, calakʼ oktere, gitijokʼ oktere ar beredokʼ oktere noako reaṅpe galmaraoakoa.

²⁰ Apeakʼ oṛakʼ duạr reakʼ kapaṭre ar phaṭok duạrre onakope ol dohokakʼa.

²¹ Ar noakope onkae khan Probhu Isor okaṭakʼ disạm emokʼ lạgitʼ aperen hapṛamko ṭhene kiriạlen ona disạmre ape ar aperen hoponko do coṭ serma reakʼakʼko leka ḍher dinpe bahaokʼa.

²² “Ape do aperen Probhu Isor dulạṛepe, ar uniyakʼ horte calakʼpe ar unire sapʼ kajak akae tahente okako hukumiń emapekan ona joton salakʼ manaope.

²³ Ar ape onape onkae enḍekhan Probhu Isorge ape samaṅ khon onko jạtrenkoe oḍokkoa, ar ape do ape khon maraṅ ar daṛean jạtrenkope bhagaokoa.

²⁴ Dạkhin reakʼ hahaṅkar khon Lebanon hạbicʼ ar Phurạt gaḍa khon jalapuri hạbicʼ jãhãrege jaṅga talkape dohoy onage apeakʼ hoyokʼa.

²⁵ Jãhãn jạtrenge ape samaṅre bako teṅgo daram daṛeapea. Ar ona disạmre jãhãtegepe calakʼ aperen Probhu Isor do acʼakʼ gokʼakʼ lekate onḍenko hoṛkoakʼ monre ape reaṅ mitʼṭen botore caṛhao ocoytakoa.

²⁶ “Ńelpe, teheń ape samaṅre mitʼṭecʼ bhor ar mitʼṭecʼ sarapiń dohokeda.

²⁷ Teheń ape ṭhen aperen Probhu Isorakʼ oka hukumkoń ematʼpe onape manaotae, enḍekhan ona bhor do apere paṛaokʼa.

²⁸ Menkhan aperen Probhu Isorakʼ hukum bape bataotae ar oka horte calakʼ reakʼ hukumiń ematʼpe ona khonpe ghańjeṛokʼte debotakope pańjako, enḍekhan ape cetanre do sarap paṛaokʼa.

²⁹ Dokhol lạgitʼ ape okaṭakʼ disạmtepe bolo lạgidokʼkan ar aperen Probhu Isor tinre onḍeye idipea unre Gerisim buru cetan khon ona bhor reakʼ kathape lại sodora ar sarapakʼ katha do Ebal buru khonpe lạiya.

³⁰ Ape dope baḍaegea, jordan gaḍa pạchim senakʼ hor aṛe reakʼ Gilgal ar ona sor reakʼ Arabreko tahenkan Kananikoakʼ disạm talare More reakʼ Elon dareko ṭhen ona barea buru do menakʼ mente.

^31-32 Ape do aperen Probhu Isor okaṭakʼ disạme em lạgidokʼkan ona dokhol lạgitʼ jordan gaḍape paromokʼkana. Ar dokholkate tinre onḍepe girobasokʼa unre teheń okako niạm ar hukumkoń ematʼpe ona baṛe dohoype.