Dosar Biboron 10 - সান্তালী বাইবেল

Mose dosar dhao gel hukume hataoetʼkan

¹ “Ona jokhecʼ Probhu Isor doe metadiń tahẽkana, ‘barea dhiri cạktikin lahateakʼ leka rokʼ tearme ar buru coṭte iń ṭhen rakapʼ hijukʼme. Ar ona sãote kaṭ reakʼ mitʼṭen sinduk hõ benaokate ạgu daraeme.

² Lahateakʼ okaṭakʼ dhiri cạkti kinem rạputʼ giḍiakatʼ ar ona cetanre okaṭakʼ ol tahẽkan onage iń do niạkin dhiri cạktire hõń ola. Ar ona tayom do sindukre onakinem dohokakʼa.’

³ “Ona iạte iń do gabla kaṭte mitʼṭen sindukiń benao ocokeda ar lahate leka barea dhiri cạkti hõń benaokeda. Ar ona tayom do onakin hataokate buru coṭteń rakapʼena.

⁴ Probhu Isor do pạhilakʼ dhiri paṭakinre okae olletʼ tahẽkan niạ banar cetanrehõ onage olkate ińe emadińạ. Ona kathako do hoyokʼ kana uniyakʼ gel hukum okaṭakʼ do burure mitʼ ṭhenpe jarwalenre seṅgel tala khone sodorletʼ.

⁵ Ona tayom Probhu Isorakʼ hukum leka iń do buru khon latarte pheḍkate oneń benaoletʼ sindukre onakin dhiri cạktiń dohokada. Ar onakin do ńithõ onḍege menakʼa.”

⁶ Ar Israel hoponko do Be-erot Bene-jakan khon mohnḍakate Moserotreko seṭerena. Onḍege Aron doe gocʼena ar uni doe topa ocoyena. Uniren hopon Eleasar do uni bodolte maraṅ naekeye hoyena.

⁷ Ona tayom Israelko do Gudgodateko senena ar onḍe khon Jotbathateko seṭerena. Jotbathare do huḍiń dakʼ soḍokʼko tahẽkana.

⁸ Unre Probhu Isor do acʼakʼ bondobos sinduk gokʼ idiy lạgitʼ ar sekʼwa kạmi ńutumte uni samaṅre teṅgokʼ lạgitʼ ar acʼakʼ ńutumte bhorako lạgitʼ Liwikoe bachaoletʼkoa. Ar onko do teheń hạbicʼko kạmikana.

⁹ Ona iạte Liwiko do akoren Israel boehako talare sompotti reakʼ jãhãn hạṭiń se ạidạri do bako ńamleda; aperen Probhu Isorakʼ katha leka Isorge onkoren sompottiye tahẽkana.

¹⁰ “Lahate leka iń do niạ dhao hõ pongel siń ar pongel ńindạ buru cetanreń tahẽkana ar Probhu Isor do ińakʼ kathae ańjomketʼtińạ. Ar ape maraope reakʼ sana do baṅ tahẽkantaea.

¹¹ Probhu Isor doe metadiń tahẽkana, ‘onko ạyur idikom, jemon onkoren hapṛamko ṭhen okaṭakʼ disạm emako lạgitʼ iń gokʼletʼ senkate onako ạidạri daṛeakʼ.’

Hukum manao reakʼ

^12-13 “E Israel, amren Probhu Isor do am ṭhen khon ńit cetʼe khojkana? Uni doe khojkana jemon amren Isorem botorae ar uniyakʼ sanamakʼ hortem taṛam, unim dulạṛe ar amakʼ goṭa monte ar amakʼ goṭa jiwite unim sewawae, ar amakʼ bhạlại lạgitʼ teheń am ṭhen Probhu Isorakʼ okako hukum ar niạmiń emokʼkan ona baṛe dohoyme.

¹⁴ “Serma ar ona cetan reakʼ sanamakʼko ar ot ar ona reakʼ sanamakʼko jotoge aperen Probhu Isorakʼ kana.

¹⁵ Enhõ uni do aperen hapṛamkoe bạsutatʼkote apeye dulạṛketʼpea. Uni do sanam jạtrenko tala khon onkoren bõsko, metakʼme apeye dulạṛketʼpea ar teheń hõ uniren bachao akan jạtrenkoge menakʼpea.

¹⁶ Ona iạte apeakʼ ontorre baṛe khatnakʼpe; menkan keṭecʼ hoṭokʼanko do ar alope hoyokʼa.

¹⁷ Aperen Probhu Isor do sanam isorkoren Isor ar sanam probhu koren Probhu kanae. Uni do maraṅ utạricʼ, daṛeanicʼ ar botoranicʼ Isor kanae. Uni do okoeyakʼ mẽtʼãhã hõ bae beṅgetʼakʼa ar ghushõ bae hataoa.

¹⁸ Uni do ṭũạr amar ar rạnḍikoakʼ hoke chinḍạuetʼtakoa ar ape talareko girobasokʼkan por jạtrenko hõe jom ocoyetʼkote acʼakʼ dulạṛe sodoreda. Are horokʼ bande ocoyetʼkoa.

¹⁹ Apehõ por jạtrenko dulạṛkope, ente Misorre apehõ por jạtrenkope tahẽkana.

²⁰ Ape do aperen Probhu Isor ḍobokʼaepe ar unige sewawaepe; unirege jamaṛ akan tahenpe ar uni ńutumtege kiriạkʼpe.

²¹ Unikangea aperen ṭhonok ar unige aperen Isor do. Ape do apeakʼ mẽtʼte oka maraṅ ar botoranakʼ hahaṛa kạmikope ńelakatʼtae ona do ape lạgitʼgeye onka akada.

²² Aperen okoeko hapṛam do Misorteko senlen onko do lekhare eken eae gel hoṛko tahẽkana ar ńitokʼ aperen Isor do sermaren ipilko lekae saṅge ocoakatʼpea.