Daniel 8 - সান্তালী বাইবেল

Bhiḍi ar meromko reaṅ dorson

¹ Beltsasar rajakʼ rajokʼ tesarakʼ bochorre iń Daniel do ar mitʼṭecʼ dorsoniń ńelkeda.

² Ona dorsonre iń do Elem Prodes reakʼ Susan gaṛiń ńelkeda. Ona dorson talare iń do Ulại gaḍa aṛereń tahẽkana.

³ Iń do gaḍa aṛere mitʼṭen bheḍa teṅgo akaniń ńelkedea. Uniyakʼ do barea jeleń dereń tahẽkantaea. Mitʼṭecʼ dereń do eṭakʼakʼ khon jeleńge tahẽkana ar ona do hara rakabokʼkan tahẽkana.

⁴ Iń doń ńelkeda Bheḍa do pạchim, utạr ar dạkhin secʼe uṭicʼetʼ kana. Uni samaṅre cele janwarge bako ṭikạu daṛeada ar uni khon bańcaoko leka do celege bako tahẽkana. Uni do acʼakʼ kusi lekae cekayetʼ tahẽkana are daṛe idiyena.

⁵ Iń do noa reaṅ tinreń hudisokʼkan tahẽkana unre ackage pạchim secʼ khon mitʼṭen merom do ot begor jakʼte onḍeye dạṛ ạgukeda; uniyakʼ banar mẽtʼ talare mitʼṭecʼ huḍiń dereń tahẽkana.

⁶ Ar barea dereńan okoeṭakʼ bheḍa gaḍa aṛere teṅgo akaniń ńellede uni secʼ merom do botorokʼ salakʼe dạṛ idikeda.

⁷ Ińiń ńelkeda merom do uni bheḍaye tińkedea ar uniyakʼ banar dereńe rạputʼketʼtaea. Uni samaṅre bheḍa do baṅgeye teṅgo ṭarhao daṛeada; merom do uniye tiń bhinḍạṛkede khan jaṅgate lebedeye ehopʼena. Unre uni khon jãhãe bheḍaye bańcaoe nonkan celege bako tahẽkana.

⁸ Merom do ạḍiye daṛe idiyena, menkhan uni do tinre acʼakʼ mucạtʼ daṛereye hoyena unre uniyakʼ lạṭu dereń do rạputʼentaea ar ona jaega beṛhaete ponea ńel ńamokʼ leka dereń rakapʼena.

⁹ Ar onako dereń reakʼ mitʼṭecʼ khon ar mitʼṭecʼ dereń janamena; ona do pạhilre huḍińge tahẽkana menkhan tayomte do dạkhin, purub ar ṭhonok disạm secʼ hara idiyena.

¹⁰ Ona do hara harate sermaren ipilko hạbicʼ seṭerena ar adom ipil do otreye ńurhạketʼkoa ar jaṅgateye lebetʼ gańjaoketʼkoa.

¹¹ Ar acʼtetʼ do onko ipilren mạlik soman kanae menteye udukʼena. Uni ńutumte din hilokʼ reakʼ samaṅokʼakʼ porob uni doe bondkeda ar koejoṅ oṛakʼ hõe besonotkeda.

¹² Uniyakʼ kại iạte onko ipilko ar din hilokʼ reakʼ samaṅokʼakʼ porob do uniyakʼ tire calaoena. Ar sạri dhorom do otreye giḍikada ar okaṭakʼe cekaketʼ onaregeye jo bahayena.

¹³ Ona tayom mitʼṭen serma goḍet do katha roroṛkaniń ańjomkedea ar armitʼṭen sonot serma goḍet do uniye kulikedea, “Niạ dorsonre oka udukʼen ona do ar tinạkʼ din hạbicʼ calakʼa? Ar tin hạbicʼ din hilokʼ reakʼ samaṅokʼakʼ porob bodolte ujạṛakʼ kại reakʼ jinis do tahena? Ar tinạkʼ din koejoṅ oṛakʼ ar ipilko do jaṅgateko lebetʼ gańjao ocokʼa?”

¹⁴ Uniye menkeda, “Bar hajar pe sae ńindạ ar setakʼ hạbicʼ noa do calakʼa. Ona tayom koejoṅ oṛakʼ do arhõ sapha ocokʼa.”

Dorson reakʼ bhed bhaṅgaokʼkan

¹⁵ Ar iń Daniel do tinre dorson reakʼ bujhạu lạgitʼ iń kurumuṭuyetʼ tahẽkana unre manwa leka ńelokʼ mitʼ hoṛ do iń samaṅre hecʼkateye teṅgoyena.

¹⁶ Iń do mitʼṭen manwawakʼ aṛaṅiń ańjomkeda; ona aṛaṅ do Ulại gaḍa khon hohoateye menkeda, “Gabriel, noa dorson reakʼ mane do nui hoṛ bujhạuaeme.”

¹⁷ Iń okareń teṅgo akan tahẽkan ona ṭhạ̃ireye hecʼen khan iń do botorte otreń bhindạṛena. Uni do ińe metadińạ, “E manwa hopon, noa dorson je ses dinko babot reakʼkan ona baṛe bujhạume.”

¹⁸ Uni do tinre iń sãote kathae roroṛkan tahẽkana unre iń do acetiń taber akan tahẽkana. Uni do ińe sapʼ rakapʼ kedeńteye teṅgokedińa.

¹⁹ Uni doe menkeda, “Edre okte reakʼ mucạtʼ dinkore oka hoyokʼ ona do amiń lạiyam kana, ente dorson do hoyokʼkana mucạtʼ dinko reakʼ niṭ akatʼ okte reaṅ.

²⁰ Barea dereńan okoeṭakʼ bheḍam ńellede onakin do hoyokʼkana Madae ar Parasren rajkin.

²¹ Uni upʼan merom doe hoyokʼkana Junạn reakʼ rajosṭi ar uniyakʼ banar mẽtʼkin tala reakʼ maraṅakʼ dereń do hoyokʼ kana ona rajosṭiren pạhilicʼ raj.

²² Rạputʼ akan dereń reakʼ jaegare ona ponea dereń do hoyokʼ kana ponea rajosṭi one onko do jạtrenko tala khonko oḍok hijukʼa menkhan ona rajosṭikoren rapajko do pạhil rapaj leka ektiạri do baṅ tahentakoa.

²³ “Onkoakʼ rajokʼ sesa sesi dinkore ghạghạṭkoakʼ kạmi coṛaṅlentakore mitʼṭen kurmutạha ar phorphundiyicʼ raje teṅgokʼa.

²⁴ Uni do ạḍi daṛeanicʼe hoyokʼa, menkhan apnarakʼ daṛete do baṅ. Uni doe marao utạra ar jãhãnakʼgeye cekae onaregeye jo bahakʼa. Uni do daṛean hoṛko ar Isorren hoṛkoe maraokoa.

²⁵ Uniyakʼ phorphundi iạte uni do eṛekateye jo bahakʼa ar jotoko khon maraṅe hudisokʼa. Ar hoṛko do tinre nirdạndiko hudisokʼa unre uni do ḍher hoṛe maraokoa ar disạm cakʼlaokoren mukhiyạko upạrteye teṅgona. Ar mucạtʼre uni doe marao ocokʼa, menkhan manwawakʼ daṛete do baṅa.

²⁶ “Am do ńindạ ar setakʼ reakʼ samaṅokʼ reaṅ okaṭakʼ dorsonem ńel ocoyen ona do sạrikana, menkhan noa dorson do chapkate dohokakʼme, ente ona do tayom daram dinre hoyokʼa.”

²⁷ Iń Daniel doń laṅgayena ariń ruạyente thoṛa din giticʼ iń tahẽyena. Ona tayomiń beretʼena ar rajakʼ kạmi lạgitʼ iń senena. Iń do ona dorson ńelkate ạḍiń cintạyena, ente ona dorson reakʼ mane do bạń bujhạuleda.