Daniel 6 - সান্তালী বাইবেল

Daniel do dhạcri kulkoakʼ khandṛaṅre

¹ Darjawes do acʼakʼ rajosṭi reakʼ sanam disạmko cetanre mitʼsae bargel cakʼlaoko bahalko do jute metatʼa.

² Onko cetanre pea do rajren ạkʼyurkoko tahẽkana. Noko pe hoṛ modre Daniel hõe tahẽkana. Noko pe hoṛ ṭhenge onko subedarko do hisạb emokʼ hoyokʼkan tahẽkantakoa jemon maharajakʼ jãhãnakʼ loksan alo hoyokʼtae.

³ Daniel do acʼakʼ gun iạte eṭakʼ raj-ạkʼyurko ar disạmren cakʼlaoko khon arhõ bhage utạricʼ menteye sạbudena. Ona iạte maharaj do goṭa rajosṭi cetanre bahale reakʼe monejoṅana.

⁴ Onate onko raj-ạkʼyurko ar onko disạm cakʼlaoko do sorkari kạmi babotre Danielakʼ dos ńam baṛaeko ehopʼena, menkhan bako daṛeada. Unire onko do jãhãn dosge bako ńam daṛeada, ente uni do pạtiạrgeye tahẽkana, jãhãn dos se bhul do unire baṅ tahẽkana.

⁵ Mucạtʼre onko hoṛko menkeda, “Daniel dusire paṛao ocoye lạgitʼ jãhãnakʼ cetʼge babon ńam daṛeakʼa, eken Isorakʼ ạn ạrite unire jãhãnakʼge bon ńam khan.”

⁶ Unre raj-cakʼlaoko ar disạm cakʼlaoko do mitʼ dhaote raj ṭhen senkateko menkeda, “Maharaj Darjawes, jaejug jiwetʼ baṛe tahenme.

⁷ Sanam raj-cakʼlaoko, disạm cakʼlaoko ar subedarko, sopolhako ar bibhagren cakʼlaoko onko sanamkoge mitʼ kathareko rạjiyena je, maharaj do mitʼṭecʼ kajak hukum jemone emokʼ. Ar ona hukum do hoyokʼ kana, jãhãe hoṛ pegel din hạbicʼ E maharaj, am chaḍa eṭakʼ debotako se manwa ṭhene koejoṅ enḍekhan uni do dhạcri kulakʼ ghaḍlakʼre giḍikae hoyokʼa.

⁸ Onate E maharaj, ńitokʼ ona hukum olakʼ lekate emokʼme jemon Madae ar Parasrenkoakʼ arhõ mitʼṭecʼ ạn hoyokʼte tishõ ona do baṅ bodolokʼ.”

⁹ Unre Darjawes raj do ona olakʼ hukumreye suhikeda.

¹⁰ Daniel do rajakʼ hukumre suhi akana menteye ańjomketʼ khan acʼakʼ koṭha kandhateye rakapʼena; ona oṛakʼ reakʼ jalna do Jerusalem secʼge jhicʼ tahẽkana. Uni do acʼakʼ hewa leka dinre pe dhao ikhṛumkateye koejoṅana ar acʼren Isore gun manao joharadea.

¹¹ Unre onko do mitʼ dhaote onḍe senkate Daniel Isor ṭhen koejoṅ ar nehõrokʼkanko ńelkedea.

¹² Onate onko do raj ṭhen ruạṛ senkate uniyakʼ hukum reakʼ kathako disạ ocokedea arko metadea, “E maharaj, am do cetʼ noa hukum bam emlena, jãhãe hoṛ pe gel dinre am chaḍa eṭakʼ debota se manwa ṭhene koejoṅ enḍekhan uni do dhạcri kulakʼ ghaḍlakʼreye giḍi ocokʼa mente?” Raj doe roṛ ruạṛkeda, “Madae ar Parasrenkoakʼ ạn lekate noa hukum do ṭikạu menakʼa, ente ona ạn do baṅ bodolokʼa.”

¹³ Unre onko do rajko metadea, “E maharaj, Daniel ńutuman Jihudạ disạmren bondiko modren mitʼṭecʼ hoṛ do amakʼ katha se am oka hukumem emakan ona bae luturakʼ kana. Uni do ńithõ dinre pe dhaogeye koejoṅ kana.”

¹⁴ Raj do niạ katha ańjomkate ạḍiye dukena; ar Daniele rukhiyạyea mente monreye goṭawana ar uni bańcaoe lạgitʼ siń cando ạuriye hạsurokʼ hạbicʼ joto lekanakʼe kurumuṭukeda.

¹⁵ Unre onko hoṛ do arhõ mitʼ dhaote hecʼkate rajko metadea, “E maharaj, disạime baṛe, Madae ar Parasrenkoakʼ ạn lekate raj okaṭakʼ hukume emokʼ ona do tishõ baṅ bodolokʼa.”

¹⁶ Sesre raj doe hukumkeda ar hoṛ do senkate Danielko sapʼkedea ar dhạcri kulakʼ khandṛaṅreko khadlekedea. Unre raj do Daniele metadea, “Jaoge amren okoeṭakʼ Isorem sewawae kan unige am doe rukhiyạmema.”

¹⁷ Ar mitʼṭecʼ dhiri ạgukate ona ghaḍlakʼ reakʼ moca ṭhenko dohokada. Raj do acʼ ar mukhiyạ hoṛkoakʼ chapakʼ mundạmte onae chapada jemon Daniel lạgitʼ eṭakʼ jãhãn bebosta alo hoyokʼ.

¹⁸ Ar raj do acʼakʼ doṅgolte ruạṛkate mitʼ ńindại upạs aṅgakeda; ar mon hulạsokʼtae lạgitʼ jãhãnakʼ hõ bako ạguadea; uni do jạpitʼ hõ bae jạpitʼ daṛeada.

¹⁹ Ar raj do aṅga marsalokʼ sãote beretʼkate usạra ona dhạcri kulkoakʼ khandṛaṅ ṭhene calaoena.

²⁰ Ar ona khandṛaṅ ṭhen senkate botorokʼ salakʼ Daniele hohoadea, “E jiwetʼ Isorren guti Daniel, jao okte okoeyem sewawae kan uni amren Isor do cetʼ dhạcri kulkoakʼ moca khone rukhiyạ akatʼmea?”

²¹ Daniele roṛ ruạṛkeda, “E maharaj, jaejug jiwetʼ baṛe tahenme.

²² Ińren Isor do acʼren dutkoe kolketʼkote dhạcri kulkoakʼ mocae bondketʼtakoa. Onko do bako ghạl akadińạ, ente Isorakʼ mẽtʼãhãre bin dusạniń tahẽkana. E maharaj, am ṭhen hõ jãhãnakʼ do bạń dosakada.”

²³ Unre raj do ạḍiye kusiyena ar ona khandṛaṅ khon Daniel rakabe lạgitʼe hukumkeda. Daniele rakapʼ ocoyen khan uniyakʼ hoṛmore ghạl reakʼ jãhãn cinhạge baṅ ńellena, ente uni do acʼren Isor cetanre bhorsa akane tahẽkana.

²⁴ Okoeko hoṛ do hiskạte Danielko dusilede onko do rajakʼ hukum iạteko ạgu ocoyena ar onkoren bạhuko gidrạko sudhạ ona dhạcri kulkoakʼ khandṛaṅreko khalde ocoyena. Ar onḍe ạuriko ńurokʼrege dhạcri kulko do onkore jhãpko emkeda ar onkoakʼ jaṅko rạputʼ gejerketʼtakoa.

²⁵ Inạ tayom Darjawes raj do sanam jạtrenko, disạmrenko ar pạrsiren hoṛko ṭhen niạ kathae olkeda: “Apeakʼ bhạlại hoyokʼtape ma!

²⁶ Ińiń hukumetʼ kana, ińakʼ rajosṭiren sanam hoṛ do jemon Danielren Isorko botorae arko ḍobokʼaema, ente uni kangeae jiwetʼ ar jaejugicʼ Isor do. Uniyakʼ rajosṭi do tishõ baṅ maraokʼtaea, ar uniyakʼ ạidạri do tishõ baṅ mucạdokʼtaea.

²⁷ Uni do rurukhiyạ are babańcaoa; uni do sermare ar dhạrtire hõ cinhạ lekate ạḍi lekan hahaṛa kạmikoe kạmikana. Uni do dhạcri kulkoakʼ moca khon Daniele rukhiyạ akadea.”

²⁸ Nonkate Darjawes ar Parasren raj Koresakʼ rajokʼ oktere Daniel do pạtiạr ar manote ńam idikeda.