Daniel 5 - সান্তালী বাইবেল

Bhitre olakʼ

¹ Beltsasar raj do acʼren hajar napṛakʼ napṛakʼ hoṛko lạgitʼ mitʼṭecʼ maraṅ okocʼe khelodkeda, ar onko hajarko samaṅre darkha rasae ńũkeda.

² Darkha rasako ńũńũkan tahẽkanre Beltsasar doe hukumkeda, sona ar rupạ reakʼ bhajanko ạgui lạgitʼ one oka uniren apat Nebukadnesar do Jerusalem reakʼ mundil khone oḍok ạguakatʼ tahẽkan, jemon onakore uniren napṛakʼ napṛakʼko, uniren erako ar chuṭki erakoko ńũ daṛeakʼ.

³ Unre Isorakʼ oṛakʼ khon sona reakʼ okako bhajan ạgu hoylen onako oḍok ạguketʼ khan raj do, acʼren mukhiyạko, uniren bạhuko ar chuṭki erako onare darkha rasako ńũkeda.

⁴ Onko do darkha rasa ńũńũkan tulucʼ sona, rupạ, tama, mẽṛhẽtʼ, kaṭ ar dhiriren debotakoko sarhaoketʼkoa.

⁵ Unre acʼkage manwawakʼ mitʼṭen ti do hecʼkate raj oṛakʼ reakʼ diuhe dohowakʼ ṭhen bhit cetanre okʼolkan ńel ńamena. Ar olokʼkan jokhecʼ raj do ona tiye ńel ńamkeda.

⁶ Ar onate uniyakʼ mẽtʼãhã do keklesetʼentaea ar nunạkʼ botor caṛhaoadea, uniyakʼ ḍanḍa do lạbṛucʼentaea ar gunṭhi kin hõ thar tharaokʼ ehopʼentaea.

⁷ Unre raj do ãṭ aṛaṅte hohoate gonokko, gunidarko, kạldiko ạguko lạgitʼe hukumkeda. Uni do Babelren ạkilankoe metatʼkoa, “Jãhãege noa olakʼ paṛhaokate ona reakʼ bhede lại daṛeạń enḍekhan uni do beguni kicricʼ ar hoṭokʼre sona reakʼ mala hõe emocokʼa ar rajosṭiren pea rajko modre uni hõ mitʼṭecʼ hudại emocokʼa.”

⁸ Rajren sanam ạkilan hoṛ do hecʼkate bhitriteko boloyena menkhan okoege ona do bako paṛhao daṛeada se raj hõ ona reakʼ mane do bako lại daṛeadea,

⁹ Unre Beltsasar raj do arhõ botor caṛhaoadea ar uniyakʼ mẽtʼãhã do mirluṅentaea. Ar uniren mukhiyạko hõko as basaoena.

¹⁰ Raj ar uniren mukhiyạkoakʼ katha ańjomkate rajren eṅgattetʼ do bhoj oṛakʼre hecʼkateye menkeda, “E maharaj, jaejug jiwetʼ baṛe tahenme. Am do alom botorokʼa ar amakʼ mẽtʼãhã do alom mirluṅ ocoytama.

¹¹ Amakʼ rajosṭi talare nonkan mitʼ hoṛ menaea ar unire nonkan sonotakʼ menakʼa oka do noa dhạrti reakʼ baṅkan. Am baba bidạlre marsal ar bud ar ạkil, debotako reakʼ ạkil lekanakʼge unire ńamokʼkan tahẽkana. Ar am baba Nebukadnesar maharaj do gonokko, muhnidarko, Kạldiko ar sạkʼgunkoren mukhiyạ menkateye bahalledea.

¹² Daniel ńutuman nui hoṛ do Beltesasar mente hõe bahnaledea. Unire do mitʼṭen soros utạr jiue menaea, uni do bidiạ ar buj ar kukmũ reakʼ bhede bhaṅgao daṛeakʼkan tahẽkan ar kudumko ar muskilakʼko reakʼ hõe bhoṅ daṛeakʼkan tahẽkan. Am do uni Daniel hoho ạguiyem; unige noa olakʼ reakʼ bhede lạiyama.”

¹³ Unre Daniel do raj samaṅreye ạgu ocoyena, ar raj do uniye metadea, “Am do cetʼ uni Daniel kanam onko Jihudikoren mitʼ hoṛ okoe do iń baba Jihudạ disạm khon bondikateye ạguletʼko?

¹⁴ Ińiń ańjomakada amre nonkanakʼko menakʼa oka do noa dhạrti reakʼ baṅkan, ar amre bujhạu reakʼ daṛe, bud ar bises ạkil hõ menakʼa.

¹⁵ Noa olakʼ paṛhaokate ona reakʼ bhed lạiyạń lạgitʼ muhnidarko ar eṭakʼ sopolhako iń ṭhenko ạgu ocolena, menkhan noa reakʼ mane do bako lại daṛeada,

¹⁶ Ińiń ańjomkeda, am do okoakʼko reaṅ manekom lại daṛeakʼa ar muskilakʼko hõm alga daṛeakʼa. Am do ńitokʼ noa ol akanakʼem paṛhao daṛeakʼ ar ona reakʼ bhedem bhaṅgao daṛeạń enḍekhan am do beguni kicricʼem horokʼ ocokʼa ar hoṭokʼre sona reakʼ mala hõm ńama ar rajosṭiren pea rapajko modre am hõ mitʼṭecʼ hudạm ńama.”

¹⁷ Unre Daniel do raje roṛ ruạṛadea, “Amakʼ puruskar do amakʼge baṛe tahenma ar baṅkhan eṭakʼ jãhãe hoṛ emakom. Menkhan iń do maharaj ṭhen ol akanakʼ iń paṛhaoa ar ona reakʼ bhediń bhaṅgaoaea.

¹⁸ E Maharaj, maraṅ Isor do am baba, metakʼme Nebukadnesar do rajosṭi, ar ṭhonoke emade tahẽkana.

¹⁹ Uni do daṛeye emocoyen khan sanam jạtrenko, disạmrenko ar pạrsirenko do uni samaṅre botorteko thar tharaokʼkan tahẽkana. Uni do acʼakʼ kusi lekae gocʼetʼko tahẽkana ar acʼakʼ kusi leka jiwetʼe dohoyetʼko tahẽkana ar jãhãege moneyae unige cetan hudại emaekan tahẽkana ar jãhãege moneyae unigeye copotʼede tahẽkana.

²⁰ Menkhan tinre uniyakʼ ontor do usulokʼ ehopʼentaea ar gorboteye perecʼena unre uni do raj siṅghạson khone pheḍ ocoyena ar uniyakʼ ṭhonok do recʼ ocoyena.

²¹ Uni do manwa tala khone laga ńir ocoyente mitʼṭecʼ janwarakʼ sobhabe em ocoyena. Ar tinạkʼ din bae aṅgocletʼ, maraṅ Isorge manwakoakʼ rajosṭiko cetanren mạlik kanae ar uni okoeye kusiyae unige rajosṭiko cetanreye duṛupʼede kana, unạkʼ din uni do gadhako sãoteye girobas akan tahẽkana ar ḍaṅgra leka ghãskoe jometʼ tahẽkana ar coṭ reakʼ sisirdakʼteye lohodokʼ kan tahẽkana.

²² “Menkhan E Beltsasar, am do uniren hopon kanam; ar jotowakʼ baḍaekatere hõ cedakʼ am do bam nindhạnokʼ kana.

²³ Menkhan ona bodolte amge sermaren Probhu Isor upạrtem teṅgon akana. Am do uniyakʼ oṛakʼ khon ạguwakʼ bạṭikom oḍok ạgu ocoakada, ar onakore am ar amren mukhiyạko, amren bạhuko ar chuṭki erako ape do darkha rasape ńũ akada. Ar am do sonaren, rupạren, pitạlren, mẽṛhẽtʼren, kaṭren ar dhiriren benao akatʼko debotako okoe do ńeńelhõ bako ńeńel ar ańjom hõ bako ańjom ar bujhạu hõ bako bujhạu onkom sarhaoetʼkoa. Menkhan Isor do bam sarhaoede kana, one uniyakʼ tire amakʼ jiwi ar amakʼ goṭa horge menakʼtam.

²⁴ Ona iạte uni do ona ti kolkate noa kathae ol akada.

²⁵ “Ona ol do hoyokʼkana: ‘MENE MENE TEKEL UPHARSIN.’

²⁶ “Ona katha reakʼ mane do hoyena: MENE, metakʼme Isor do amakʼ rajosṭi reakʼ dinkoe lekha akada ar ona doe sạt akada.

²⁷ TEKEL, metakʼme sosoṅakʼ tulạre am doe soṅakatʼmea ar am dom komaogea.

²⁸ UPHARSIN, metakʼme, hạṭińena, amakʼ rajosṭi do hạṭińena ona do Madae ar Parasrenko ṭhen emocoyena.”

²⁹ Unre Beltsasarakʼ hukum leka Daniel do beguni kicricʼko horokʼadea ar uniyakʼ hoṭokʼre sona reakʼ mala hõ. Ar rajosṭiren pea rajko talare mitʼ hoṛakʼ hudạ emae reakʼ hõ lại sodorena.

³⁰ Ar enhilokʼ ńindạge Babelren raj Beltsasar doe makʼ gocʼ ocoyena,

³¹ Ar Madae Darjawes do turuigel bar bochor umerre rajosṭi reakʼ bhare hataokeda.