Daniel 4 - সান্তালী বাইবেল

Nebukadnesarakʼ dosar kukmũ

¹ Nebukadnesar raj do dhạrtiren sanam jạtrenko, disạmrenko ar pạrsiren hoṛko ṭhen noa sombate kolkeda: Apeakʼ bhạlại hoyokʼtapema.

² Maraṅ Isor iń lạgitʼ okako cinhạ ar hahaṛawakʼkoe kạmi akatʼ ona do kusite apeń baḍae ocoyetʼpea.

³ Uniyakʼ cinhạko do maraṅgea, uniyakʼ hahaṛa kạmiko do heṛan daṛeana! Uniyakʼ rajosṭi do jaejug reakʼ rajosṭi kana, ar uniyakʼ raj do piṛhi cetan piṛhige.

⁴ Iń Nebukadnesar do ińakʼ oṛakʼre nirạiteń tahenkan tahẽkana ar ińakʼ raj dolanre iń do ḍag ḍagiń sahrekʼkan tahẽkana.

⁵ Ar tinre ińakʼ aṭetʼreń giticʼ akan tahẽkana unre mitʼṭecʼ kukmũ ńelteń botorena; kukmũte okakoń ńelketʼ ona do ińakʼ monre botore caṛhaoạdińa.

⁶ Ona iạte ińakʼ kukmũ reakʼ bhed bhaṅgao lạgitʼ iń do Babelren sanam ạkilanko iń samaṅre ạguko lạgitʼ iń hukumkeda.

⁷ Khan gunidarko, muhnidarko, kạldiko ar gonokko iń ṭhenko hecʼen khan onko ṭhen kukmũ reakʼ iń lạikeda, menkhan onko do ona reakʼ bhed bako bhaṅgao daṛeadeńa.

⁸ Mucạtʼre Daniel do iń ṭhene hecʼen khan iń do mitʼṭecʼ kukmũń lạiyadea. Ińren debotawakʼ ńutum lekate uni do Beltesasare ńutum ocoyena. Unire nonkan sonotakʼ tahẽkana one ona do dhạrti reakʼ baṅkan.

⁹ Ińiń menkeda, “E gunidarkoren mukhiyạ Beltesasar, ińiń baḍaea amre nonkan sonotakʼ menakʼa one ona do noa dhạrti reakʼ baṅkan ar jãhãn danaṅakʼko hõ am ṭhen muskilakʼ do baṅkana. Ińakʼ noa kukmũ reakʼ bhed baṛe bhaṅgaoạńme.

¹⁰ Aṭetʼre giticʼkate iń do noa dorsoniń ńelleda. Iń do beṅgetʼkateń ńelkeda dhạrti talare mitʼṭecʼ dare do teṅgo akana; ona do ạḍi usulge tahẽkana.

¹¹ Dare do hara idiyente ạḍi maraṅ ar daṛeanakʼ hoyena ar ona reakʼ coṭ agal do serma hạbicʼ rakapʼena; dhạrti reakʼ ses simạ khon hõ ona dare do ńel ńamokʼkan tahẽkana.

¹² Ona reakʼ sakamko do ạḍi napae tahẽkana ar jo hõ ạḍi ḍher tahẽkana ar ona khon sanamkoge jomakʼko ńametʼ tahẽkana. Ona latarre do ṭạnḍiren janwarko ḍerakʼkan tahẽkana ar coṭren cẽṛẽko hõ ona reakʼ ḍạrkoreko tukạyetʼ tahẽkana; ar sanam jiwiyankoge ona khon jomakʼko ńametʼ tahẽkana.

¹³ “Aṭetʼre giticʼkatege ona dorsonre beṅgetʼkateń ńelkeda, mitʼṭen sonot pahradar do serma khone pheḍ hecʼena.

¹⁴ Uni do ãṭ aṛaṅteye menkeda, ‘dare do makʼ bhindạṛpe ar ona reakʼ ḍạrko hese giḍipe; ona reakʼ sakamko hotʼ giḍikakʼpe ar ona reakʼ joko chiṭiạu giḍikakʼpe. Ar ona dare buṭạ khon janwarko ar ḍạrko khon cẽṛẽko ńir joṅma,

¹⁵ Menkhan ona reakʼ gonḍa ar rehetʼko do mẽṛhẽtʼ ar pitạlte tol akan ot reakʼ ghãskore tahenma. Ar sisir dakʼte ona do lohodokʼma ar dhạrti reakʼ dareko talare ar janwarko sãote uni doe girobasokʼ ma.

¹⁶ Unire manwa sobhab do alo tahenma ar eae bochor hạbicʼ uni do janwarakʼ sobhabe em ocokʼma.

¹⁷ “ ‘Noa hukum do hohorhokoakʼ niṭakʼ lekateakʼ kana, sonotkoakʼ kathatege noa khojgokʼ do, jemon jiwetʼko doko baḍae daṛeakʼ, Coṭ utạricʼ do manwakoakʼ rajosṭiye calaoeda mente; ar jãhãegeye kusiyaekan unige rajosṭi doe danae kana ar manwa talare sanam khon nicạṛicʼge cetanreye duṛupʼede kana.’

¹⁸ “Noa kukmũge iń Nebukadnesar raj doń kukmũkeda. Ńitokʼ do E Beltesasar, ma lạiyạńme noa reakʼ mane do cetʼkana? Ińakʼ rajren okoe ạkilanko hõ noa reakʼ mane do bako lại daṛeadińa; menkhan am dom daṛeakʼa, ente amre sonot nonkanakʼ menakʼa one ona do niạ dhạrti reakʼ baṅkan.”

Daniel do kukmũ reakʼ bhede bhaṅgaoetʼ kan

¹⁹ Unre Daniel, metakʼme Beltesasar do kukmũ reakʼ katha hudiskateye botorena ar thoṛa okte lạgitʼe asbasoena. Onate raj doe menkeda, “E Beltesasar, kukmũ se ona reakʼ bhed do alo baṛeye cintạ ocomema.” Beltesasar doe roṛ ruạṛkeda, “E maharaj, niạ kukmũ ar niạ reakʼ bhed do amren bạiriko cetanre baṛe paṛaokʼma.”

²⁰ Am okaṭakʼ darem ńelletʼ, oka do maraṅ ar daṛe idikʼkan tahẽkan, okaṭakʼ reakʼ coṭ agal do serma hạbicʼ senakan tahẽkan ar oka do dhạrtiren sanam hoṛko ńelńametʼ tahẽkan,

²¹ one onare mońj sakam ar ḍher joko tahẽkan, oka do sanamkoakʼ jomakʼe jogaṛetʼ tahẽkan, oka do janwarko asraye emako kan tahẽkan ar ḍạrkore coṭren cẽṛẽko hõko tahenkan tahẽkan.

²² E maharaj, am kangeam ona dare do. Am do maraṅ ar daṛeanem hoyakana; amakʼ daṛe do ḍher akante serma hạbicʼem tiyokʼ akada ar amakʼ rajosṭi do dhạrti reakʼ ses simạna hạbicʼ seṭer akana.

²³ E Maharaj, mitʼṭen sonot hohorhoyicʼ do serma khon pheḍ hijukʼkanem ńelkedea. Uni doe menleda, ‘dare do makʼ bhindạṛpe, menkhan ona reakʼ gonḍa ar rehetʼko do mẽṛhẽtʼ ar pitạlte tolkate ot reakʼ ghãsre giḍikakʼpe. Ona do serma reakʼ sisir dakʼte lohodokʼma; ar uniyakʼ bakhra do eae bochor hạbicʼ janwarko tulucʼ tahentaema.’

²⁴ “E maharaj, ńitokʼ okań menetʼkan ona do ińren kisạ̃ṛ maharajakʼ kukmũ reakʼ bhedkana. Noa do Coṭ utạricʼakʼ hukum kangea.

²⁵ Am do hoṛko tala khonem laga ńir ocokʼa ar janwarko sãotem tahena; am do ḍaṅgra leka ghãsem joma ar serma reakʼ sisirdakʼtem lohodokʼa. Nonkate eae bochor hạbicʼ calakʼa, one tin hạbicʼ bam aṅgocʼ manwakoakʼ rajosṭi cetanre maraṅ Isorgeye rajokʼkana mente ar onako rajosṭi do acʼ okoeye kusiyae unigeye emaekana.

²⁶ Rehetʼ sudhạ dare reakʼ gonḍa dohokakʼ reakʼ hukum do hoyokʼ kana, am do tinrem aṅgoca sermaren Isorgeye rajokʼkana unre amakʼ rajosṭi do amgem em ruạṛ ocokʼa.

²⁷ Onate E maharaj, am do ińakʼ solha ańjomme. Am do bhageakʼ kạmime ar reṅgecʼ-orecʼko dayawakome ar amakʼ behokakʼ ar kại reakʼ kạmiko do bạgime; pasere pase amakʼ nirại dinko do jhạl idikʼtamge.”

^28-30 Noako sanam do Nebukadnesar raj cetanre paṛaoena. Ar gelbar cando tayom tinre uni do Babelre raj doṅgol reakʼ chatreye dãṛãbaṛae kan tahẽkana unreye menkeda, “Ińakʼ maraṅ daṛe hotete ar ińakʼ ṭhonok sodorokʼ lạgitʼ raj naṅgraha lekate okań benao akatʼ ona do cetʼ noa maraṅ Babel do baṅkana?”

³¹ Uni do katha ạuriye mucạdrege serma khon okoe coṅe menkeda, “E Nebukadnesar raj, am dom men ocoakana je, amakʼ rajosṭi do am khon recʼ hatao akana.

³² Am do hoṛko tala khonem laga ńir ocokʼa ar janwarko sãotem tahena; ar ḍaṅgra leka ghãskom joma. Ar tin hạbicʼ bam aṅgoc maraṅ Isor do manwakoakʼ rajosṭiko cetanreye rajokʼkana ar onako rajosṭi do acʼakʼ kusi lekae em akokana unhạbicʼte eae bochor do parom calakʼa”

³³ Nebukadnesar reaṅ oka roṛlen unrege ona do purạuena. Manwako tala khon uni doe laga ńir ocoyena ar ḍaṅgra leka ghãs jojome ehopʼena. Ar uniyakʼ hoṛmo do sisirdakʼte lohodokʼ ehopʼentaea; uniyakʼ upʼko do pajhaṛ cẽṛẽakʼ il leka ar ramako do cẽṛẽkoakʼ rama leka hoyentaea.

³⁴ Ona okte purạuen khan iń Nebukadnesar do serma secʼ iń beṅgetʼkeda ar ińakʼ bud do ruạṛ hecʼadińạ. Unre iń do Coṭ utạrricʼ iń sarhaokedea; okoe do jaejug jiwetʼ menae uniń ḍobokʼadea ariń sarhaokedea. Ińiń menkeda, “Isorakʼ rajosṭi do jaejug hạbicʼ reakʼ rajosṭikana; uniyakʼ rajosṭi do piṛhike piṛhi tahena.

³⁵ Dhạrtiren sanam hoṛ uni ṭhen do cele hõko baṅkana. Uni do serma goḍetko ar dhạrtiren hoṛkoante acʼakʼ kusi sana lekae kạmikana. Nonkan celege bạnukʼkoa, uniyakʼ tiko thir ocodaṛeataea arko men daṛeaea, ‘cetʼem ceka kana am do?’

³⁶ Tinre ińakʼ mon bogeyentińạ unre ińakʼ rajosṭi reakʼ manot lạgitʼ ińakʼ ṭhonok do ińiń em ruạṛ ocoyena. Ińren montriko ar mukhiyạko do ińko sendra ńamkedińạ ar siṅghạsonre arhõko duṛupʼkedińa ar iń do laha khon arhõ maraṅiń hoyena.

³⁷ Ńitokʼ iń Nebukadnesar do uni sermaren raj sarhao, manot ar ṭhonokiń emaekana, ente uni okaṭakʼe cekae ona do ṭhikakʼgeye onkayeda, ar uniyakʼ jotowakʼ horge dhoromte perecʼgetaea. Ar okoe bạḍạiteko perecʼge uni do onkoe copotʼkoa.