Daniel 3 - সান্তালী বাইবেল

Sonaren boṅga murhutʼ ar seṅgel reakʼ culhạ

¹ Nebukadnesar raj do turuigel moka usul ar turui moka osar sonaren mitʼṭecʼ boṅga murhutʼe benaokedete Babel disạm reakʼ Dura bilạn ṭạnḍireye dohokedea.

² Ona tayom uni boṅga murhutʼ reakʼ uḍhạu porobre hijukʼ lạgitʼ Prodes ren cakʼlaoko ar mukhiyạ ạkʼyurko, bibhagren ạkʼyurko, muntriko, khajańciko, maraṅ bikʼcạrko, hạkimko ar eṭakʼ eṭakʼ maraṅ hudạren sanam kạmiyạkoe neotaketʼkoa.

³ Unre onko joto do Nebukadnesarre benao akade boṅga murhutʼ reakʼ uḍhạu porob manao lạgitʼko hecʼ jarwayena ar uni boṅga murhutʼ samaṅreko teṅgoyena.

⁴ Unre roṛ saḍeyicʼ do ãṭ aṛaṅte noa kathae lại saḍekeda, “E eṭakʼ eṭakʼ jạtrenko, disạm ar pạrsirenko, ape do noa hukumpe emocokʼ kana,

⁵ tinre sakwa, tiriạ, binạ banam, peṛesaṅ, taranakʼ banamko, joṛa murli ar sanam lekan bajnako reakʼ saḍepe ańjoma unre ape joto hoṛ do otre ombakʼkate Nebukadnesar rajren bekʼnaoicʼ uni sonaren murhutʼpe sewawaea.

⁶ Ar jãhãege ombakʼkate bae sewae uni do unrege ona jolokʼkan culhạreye khadle ocokʼa.”

⁷ Onate hoṛko do tinre onako bajna reakʼ saḍeko ańjomkeda unrege sanam jạtrenko, disạmrenko ar pạrsiren hoṛko do otre ombakʼkate Nebukadnesare benao akade murhutʼko ḍobokʼadea.

⁸ Inạ oktere adom kạldi hoṛko do hecʼkate Jihudiko dusiketʼkoa.

⁹ Onko do rajko metadea, “E maharaj, jaejug jiwetʼ baṛem tahenma.

¹⁰ Am do mitʼṭecʼem hukumleda, hoṛko tinre sakwa, tiriạ, binạ banam, peṛesaṅ, taranakʼ banam, joṛa murli ar sanam lekan bajna reakʼ saḍeko ańjoma unre onko do jemon otre ombakʼkate sonaren uni murhutʼko ḍobokʼaea;

¹¹ menkhan okoe ombakʼkate bae ḍobog uni do jolokʼkan culhạreye khadle ocokʼa.

¹² E maharaj, adom Jihudiko menakʼkoa okoe do Babel Prodes reakʼ rajkạmiyạrem dohoakatʼko; onko doko hoyokʼkana, Sedrok, Mesak ar Abed-nego. Onko do amakʼ hukum bako lutur akawada. Am okoeṭakʼ debotam sewawae kan onko do uni bako sewawae kana ar am okoeṭakʼ sonaren muhurtʼem benao akade uni hõ bako ḍobokʼae kana.”

¹³ Noa katha ańjomkate Nebukadnesar raj do edreteye seṅgelena ar Sedrok, Mesak ar Abed-nego teko hoho ạguko lạgitʼ hoṛe kolketʼkoa. Ar onko do raj samaṅreko ạgu ocoyena.

¹⁴ Nebukadnesar do onkoe metatʼkoa, “E Sedrok, Mesak ar Abed-nego, noa do cetʼ sạrikana, ińren debota bape sapʼsorae kana, ar iń okoeṭakʼ sonaren murhutʼ iń benao akade uni hõ bape sewawae kana?

¹⁵ Ńitokʼ ape do sakwa, tiriạ, binạ banam, peṛesaṅ, taranakʼ banam, joṛa murli ar sanam lekan bajna reakʼ saḍe ańjomkate ińren bekʼnaoicʼ murhutʼ ḍobokʼae lạgitʼ sapṛao akaepe tahen enḍekhan ma bhagege. Ar jodi bape ḍobog enḍekhan jolokʼkan bhaṭare unregepe khadle ocokʼa. Unre cele debota hõ ińakʼ ti khon do bako bańcao daṛeapea?”

¹⁶ Unre Sedrok, Mesak ar Abed-nego tako do rajko metadea, “E maharaj Nebukadnesar, niạ babotre am roṛ ruạṛam reakʼ jãhãn jạruṛge bale bujhạueda.

¹⁷ Ale okoe Isorle sewawae kan uniye khoj khan tobe do ona jolokʼkan bhaṭa khon acʼakʼ titeye bańcaolea.

¹⁸ Menkhan E maharaj, ar uni bae onkaere hõ ale do amren debota do bale sewawaea se amem benao akade sonaren murhutʼ hõ bale ḍobokʼaea.”

¹⁹ Unre Sedrok, Mesak ar Abed-nego cetanre Nebukadnesar do ạḍiye raṅgaoena ar uniyakʼ mẽtʼãhã reakʼ boron hõ pheraoentaea. Uni doe hukumkeda jemon bhaṭa do nindarako jol khon eae dobṛa bạ̃ṛtiko jol ocoy.

²⁰ Uni do acʼren lạṛhại phạdrenko khon adom daṛean palṭonkoe hukumatʼkoa onko do jemon Sedrok, Mesak ar Abed-nego takoko tolko ar jolokʼkan bhaṭareko khadleko.

²¹ Khange onko pene hoṛ do akoakʼ ḍeṅganakʼko, akoakʼ aṅgropko, akoakʼ dạhṛiko ar akoakʼ eṭakʼ kicricʼ horokʼ akatʼgeko tol ocoyena ar jolokʼkan bhaṭareko khadlekatʼkoa.

²² Rajakʼ hukum do ãṭge tahẽkante ar bhaṭa hõ ạḍi lologe tahẽkante seṅgel lepʼ do onko hoṛkoe gocʼketʼkoa okoe do Sedrok, Mesak ar Abed-nego takoko kuṭuṅ idiletʼko.

²³ Menkhan onko pene hoṛ do tol akaege jolokʼkan bhaṭa seṅgelreko khadle ocoyena.

²⁴ Unre Nebukadnesar raj doe hahaṛayena ar don beretʼenteye teṅgoyena ar acʼren ạkilankoe metatʼkoa, “Abo do cetʼ pe hoṛge tolkate seṅgelre babon khadleletʼkoa? ” Onkoko roṛ ruạṛkeda, “Hẽ maharaj.”

²⁵ Uniye menkeda, “Enḍekhan iń do pon hoṛ seṅgelre dãṛãbaṛae kaniń ńeletʼkoa. Onko do raṛage menakʼkoa ar jãhãnakʼge baṅ hạ̃n akantakoa, ar ponicʼ hoṛ do ńelokʼte debota lekae ńelokʼkana.”

²⁶ Unre Nebukadnesar do jolokʼkan bhaṭa reakʼ duạr ṭhen senkate ãṭ aṛaṅteye menkeda, “E maraṅ Isorren guti Sedrok, Mesak ar Abed-nego, dela oḍok hijukʼpe.” Ar onate Sedrok, Mesak ar Abed-nego do jolokʼkan seṅgel tala khonko oḍok hecʼena.

²⁷ Unre disạm cakʼlaoko ar ạkʼyurko, bibhagren cakʼlaoko ar eṭakʼ sanam usul hudạren kạmiyạko do onko ṭhen hecʼkateko bhiṛkeda. Onko doko ńelkeda seṅgel do onkoakʼ hoṛmo reakʼ jãhãnakʼ cetʼge bae hạ̃n akatʼtakoa, onkoakʼ bohokʼ reakʼ mitʼṭecʼ upʼ hõ baṅ lo akantakoa, kicricʼ hõ baṅ nosṭo akana ar onkoakʼ hoṛmore seṅgel reakʼ so hõ bạnukʼa.

²⁸ Unre Nebukadnesar doe menkeda, “Sedrok, Mesak ar Abed-negoren Isorakʼge sarhao hoyokʼtae ma, okoe do acʼren serma goḍetko kolkate acʼren gutikoe bańcaoketʼkoa. Noko do uni cetanre biswạskatege rajakʼ hukumko bebataoleda ar akoren Isor chaḍa ar jãhãn debota sewawako bodolte gujukʼ hõ rạjigeko tahẽkana.

²⁹ Ona iạte iń do noań hukumiń emetʼkana, jãhãn jạtren, disạmren se pạrsiren hoṛ jodi Sedrok, Mesak ar Abed-nego takoren Isor upạrte jãhãe jãhãnakʼe roṛ enḍekhan uni doe makʼ khanḍa khunḍi ocokʼa ar uniyakʼ oṛakʼ-duạr do guricʼ mande leka hoyokʼtaea, ente nonka do cele debotage bako babańcaoa.”

³⁰ Inạ tayom raj do Sedrok, Mesak ar Abed-nego tako Babel disạm talare arhõ maraṅ hudạreye dohoketʼkoa.