Kolossiko lạgitʼ Pạul Apostolakʼ ciṭhi 4 - সান্তালী বাইবেল

¹ E kisạ̃ṛko, sermare aperen hõ mitʼṭen kisạ̃ṛ menaea ar ona baḍaekate aperen golamko sãote bhage ar hok reakʼ beoharpe.

Mucạtʼ sopolha

² Koejoṅre jamaṛ akan ar gun manao johar salakʼ jagwar akae tahenpe;

³ Ona sãote ale lạgitʼ hõ koejoṅpe jemon Mạsi reaṅ sạri okoakʼ reakʼ katha porcar lạgitʼ Isor do ạte emabon. Ar ona sạri okoakʼ lạgitʼge iń doń bondi ocoakana.

⁴ Cetʼ leka pusṭạute noa reaṅ lại pasnao lek kan, koejoṅre disạyińpe jemon iń do onkageń roṛ daṛeakʼ.

⁵ Okoe Isorren hoṛko baṅkan onko tulucʼ do akel salakʼ colonpe ar Mạsi reaṅ goha em reakʼ ạtko kạmire lagaope.

⁶ Apeakʼ roṛ do siń sạṭupʼ dayateakʼ baṛe hoyokʼma, buluṅte adawakʼ leka, jemonpe baḍae daṛeakʼ okoe okaleka roṛ ruạṛako lektapea mente.

Johar katha

⁷ Aboren dulạṛiạ boeha ar pạtiạr sapʼ dapʼicʼ ar Probhu Isorakʼ kạmire abo sãoten golam Tukhikus do ińakʼ sanamakʼe baḍae ocopea.

⁸ Ale reaṅakʼkope baḍaete uni do jemon udgạue emdaṛeape onate ape ṭheniń kolkedea.

⁹ Tukhikus sãote iń do aboren pạtiạricʼ ar dulạṛiạ boeha Onesimus hõń kolkedea. Uni do ape modrenge mitʼ hoṛ kanae. Unkin do nonḍenakʼ jotowakʼge apekin baḍae ocopea.

¹⁰ Iń soṅgete kạidi akan Aristarkhus ar Barnabasren mamo hatom boeha Mark hõ joharkin emapekana. Mark reaṅ ma laharege hukumpe ńamakatʼ baṅma, ape ṭhene senlenre dulạṛ salakʼ ataṅ daramete jemonpe sapʼsorae.

¹¹ Ar Justusko metae Jisu hõ apeye joharape kana. Jihudiko mod khon eken noko pene hoṛge Isorakʼ rajosṭi lạgitʼ iń tulucʼko kạmikana. Onko do monre ạḍi uskurko dan akawạdińa.

¹² Epaphrase hõe joharape kana. Uni do aperen hoṛko modren mitʼ hoṛkanae ar uni do Jisu Mạsiren golamge. Uni do siń sạṭupʼ ape lạgitʼe koeyeda jemonpe sạbit utạrokʼ ar jotowakʼre Isorakʼ monejoṅakʼ baḍaekate khạṭi akanpe teṅgo ṭarhao daṛeakʼ.

¹³ Epaphrase reaṅ do noa gohań meneda, ape lạgitʼ ar okoe do Laodikiạ ar Hierapolis reakʼ nagrahare menakʼko onko lạgitʼ uni do ạḍiye khaṭao akana.

¹⁴ Ar dulạṛiạ raranicʼ Luk ar Demas do joharkin emapekana.

¹⁵ Laodikiạren biswạsi boehako ar Numphạ ar uniyakʼ oṛakʼreko jarwakʼkan manḍerrenko hõ johar emakope.

¹⁶ Ape ṭhen noa ciṭhipe paṛhao sạt lekhan Laoidikiạ reakʼ manḍerre hõ noa ciṭhi paṛhao ocoakope, ar Laodikiạ manḍerre lạgitʼ okaṭakʼ ciṭhi kologokʼ ona hõ ape do paṛhao ańjom joṅpe.

¹⁷ Arkippus do noa katha lạiyaepe, “Probhu Isorakʼ sapʼdapʼ reakʼ okaṭakʼ kạmi emakawatʼme ona purạu lạgitʼ moneyakʼme.”

¹⁸ Iń Pạul do ińakʼ tite noa johar kathań oleda. Disạipe iń doń kạidi kana. Isore dayawape ma.