Kolossiko lạgitʼ Pạul Apostolakʼ ciṭhi 3 - সান্তালী বাইবেল

¹ Mạsi tulucʼ gocʼko khonpe jiwetʼ beretʼ ocoyen khan, enḍekhan Mạsi one sermare Isorakʼ jojomsa aṛereye duṛupʼ akan ona coṭ reakʼakʼko baṛe ńam baṛaepe.

² Ot reakʼko do baṅ bickom coṭ reakʼakʼkoge moneyakʼpe.

³ Ente ape dope gocʼena ar apeakʼ jion do Mạsi tulucʼ Isorre oko menakʼa.

⁴ Okoe doe aperen jionkan uni Mạsiye sodorlenre ape hõ uni tulucʼ uniyakʼ ṭhonokren bhạgiyạdarko mentepe sodorokʼa.

⁵ Onate apeakʼ jel reakʼ sana oka menakʼ ona marao giḍikakʼpe. Ente onare joto lekan loṭghuṭi, bin napaeakʼ, bạṛicʼ sana, laloc ar dhon lalocko menakʼa, one oka do boṅga sewawakʼ lekakan.

⁶ Ar okoe doko bebataoko kan onko do ona iạtege Isorakʼ sạjại hecʼ paṛao akokana.

⁷ Ape hõ pạhil do onkagepe colonetʼ tahẽkana,

⁸ menkhan ńitokʼ do edre, raṅgao, dusṭạmi, opoman, ar nilạjiạ roṛ ape khon baṛe sahaṛokʼma.

^9-10 Alope eṛea, ente aperen “Mare hoṛtetʼpe” oḍok giḍi akadea ar uniyakʼ kạmiko sudhạ kicricʼ lekape totʼ giḍi akadea ar “Nãwã hoṛtetʼpe” horokʼ akawana. Uni “Nãwã hoṛtetʼ ” do arhõe nãwã arokʼkante acʼren sisirjạuicʼ lekae hoyokʼ kana jemon uni sisirjạuicʼ do purạtepe baḍae orom daṛeae.

¹¹ Nonkate boṅgan hoṛ jạtrenko talare se Jihudiko talare, khatna se bin khatna ocoakanko talare, osobbho, nicạṛ jạtrenko, golam se sạdhinko talare jãhãn begar do bạnukʼa; onḍe do Mạsigeye asolicʼ kana ar uni do sanamko talare menaea.

¹² Onate Isor okoekoe bachao akawan onko sonotko ar dulạṛiạko lekate mãyãkʼ mon, dulạṛ, mạ̃hir, nindhạn ar soborite apnar sajokʼpe.

¹³ Ape apere sapahaokʼpe ar jãhãe upạrte apeakʼ jãhãn dos reakʼ menakʼtae khan uni do ikạkaepe. Probhu Isor cetʼlekae ikạ akatʼpe onkage ape hõ eṭakʼko ikạkako lek kantapea.

¹⁴ Ar onako sanamakʼ cetanre dulạṛte sajokʼpe. Ente dulạṛ do sạbit utạrokʼ reakʼ tonol kana.

¹⁵ Mạsi okaṭakʼ suluke emokʼkan ona sulukge apeakʼ ontorre tahente ape mimitʼkoe ạyurpema. Sulukre tahen lạgitʼge coṅ sanamko mitʼ hoṛmorepe hoho ocoakana. Ar ape do gun manaoko baṛe hoyokʼpe.

¹⁶ Mạsiyakʼ katha apeakʼ ontorre purạte girobas ocowakʼpe. Isorakʼ akelte lại cecetʼ ar sipikhạukʼpe, sereńko, sarhao sereńko ar Jiuteakʼ õṛhẽyakʼkote apeakʼ ontorre Isor gun manao tulucʼ sereńaepe.

¹⁷ Jãhãnakʼgepe roṛ ar jãhãnakʼgepe cekae ona do Probhu Jisu ńutumtege kạmipe ar uni hotete Isor Baba hõ gun manao joharaepe.

Khristan gharońjrenko lạgitʼ sikhạuna

¹⁸ E bạhuko aperen jãwãeko tabere tahenpe, ente Probhu Isorren hoṛ lekate noa do lek kangea.

¹⁹ E jãwãeko, apnar bạhuko dulạṛkope, ar alope haṛhatʼakoa.

²⁰ E gidrạko, sanamakʼre aperen gogo-babawakʼ bataotakope, ente noa do Probhu Isore kusiyakʼa.

²¹ E babako, aperen gidrạko alope edre ạṛis ocokoa. Jemon onko do aloko hulạs bhaṅgaokʼ.

²² E golamko ape do jotowakʼre noa dhạrtiren kisạ̃ṛko ṭhen tabe akan tahenpe. Eken mẽtʼ samaṅre golam khaṭaokʼte hoṛ kusi ocoko leka do alo, menkhan khạṭi monte Probhu Isor botorae tulucʼ onkore tabe akan tahenpe.

²³ Jãhãnakʼgepe cekae, manwako lạgitʼ do alo, bickom Probhu Isor lạgitʼpe onkayetʼte mon ar ontorte kạmipe,

²⁴ entepe baḍaegea, Probhu Isor do acʼren hoṛko lạgitʼ okae dohoakatʼ onage kuṛại lekate uni ṭhen khonpe ńama. Ar ape okoe ṭhenpe khaṭaokʼkan uni doe Probhu Jisu kana.

²⁵ Ente behokicʼ do acʼe behokakatʼ reakʼ kuṛạiye ńam ruạṛa; Probhu Isor ṭhen mẽtʼãhã beṅgetʼakʼ do bạnukʼ anaṅ.