Bikʼcạrko 9 - সান্তালী বাইবেল

Abimelek reaṅ

¹ Jerubakʼalren hopon Abimelek do Sikemre acʼ mamottetʼtako ṭhen senkate onko ar acʼ eṅgattetʼren eṭakʼ sanam bõskoe metatʼkoa,

² “Sikemren sanam hoṛko kulikope onko lạgitʼ bhageakʼ do okaṭakʼ hoyokʼa- Jerubakʼalren eaegel hoponge disạm cakʼlaokoko hoyokʼ bhage hoyokʼa, se mitʼ hoṛ hoyokʼge bhage hoyokʼa? Alope hiṛińa ińhõ apeakʼ mãyãm ar jelren kangeạń.”

³ Abimelekren mamottetʼtako do Sikemren hoṛko noako lạiyatʼko khan onko do Abimelek secʼ tahengeko kusiyena. Onkoko menkeda, Abimelek do aboren peṛakanae.

⁴ Ar onko do Bakʼal- Beritakʼ mundil khon eaegel goṭecʼ rupạko emadea. Onate Abimelek do bhạṅguạ ar bạṛicʼ hoṛkoe bhaṛaketʼkoa. Onko do uni soṅgeren hoṛko hoyena.

⁵ Uni do Ophrare acʼ apatakʼ oṛakʼte senkate acʼren eaegel boehako, metakʼme Jerubakʼalren sanam hoponko inạ mitʼ dhiri cetanregeye gocʼketʼkoa. Menkhan Jerubakʼalren joto khon huḍiń utạricʼ hopon Jotham do okoreye tahẽkanteye bańcaoena.

⁶ Ona tayom Sikem ar Bet-Miloren sanam hoṛko mitʼente Sikem reakʼ khunṭi ṭhen Elon dare aṛere senkate Abimelekko rajkedea.

⁷ Ar Jotham do noa kathako lạiyade khan uni do Gerisim buruteye rakapʼente ãṭ aṛaṅte hoṛkoe metatʼkoa, “Sikemren hoṛko, ińakʼ katha ańjompe, inạkhan Isor hõ apeakʼ kathae ańjoma.

⁸ Dareko do mitʼdin ako cetanre mitʼṭen rajko teṅgoyea menteko oḍok calaoena. Onko do jạitun dareko metadea, ‘am do aleren raj baṛe hoyokʼme.’

⁹ Menkhan jạitun dare doe metatʼkoa, ‘ińakʼ oka sunumte Isor ar manwako manotokʼkan onako bạgikate cetʼ iń do sanam dareko cetanreń lewer kodorokʼa?

¹⁰ Inạ tayom dareko do Loa dareko metadea, ‘am do aleren raj hoyokʼme.’

¹¹ Menkhan Loa dareye roṛ ruạṛkeda, ‘iń do ińakʼ bhage ar heṛem jo emokʼ baṅkate cetʼ sanam dareko cetanreń lewer kodorokʼa?’

¹² Inạ tayom dareko do darkha nạ̃ṛĩko metadea, ‘am do aleren raj hoyokʼme.’

¹³ Menkhan darkha nạ̃ṛĩ hõe roṛ ruạṛkeda, ‘ińakʼ jo reakʼ oka rasate Isor ar manwako rạskạkʼkan ona baṅkate cetʼ iń do sanam dareko cetanreń lewer kodorokʼa?’

¹⁴ Mucạtʼre joto dareko do jạnumanakʼ dareko metadea, ‘amge aleren raj baṛe hoyokʼme.’

¹⁵ Unre jạnumanakʼ dare do onkoe metatʼkoa, ‘Aperen raj mente sạrigepe teṅgoyiń khan enḍekhan dela hijukʼte ińakʼ umulre asray hataope. Ar bape onkae khan enḍekhan jạnum jhạuạ khon seṅgel oḍok hijukʼte Lebanon reakʼ debdạru darekoe joma.’

¹⁶ “Enḍekhan ańjompe, Abimelek raj benaokate ape do cetʼ biswạsteakʼ ar bhageakʼ kạmipe kạmi akada? Ape do cetʼ Jerubakʼal ar uniyakʼ gharońjrenko upạrte bhageakʼ ar oka lek reakʼ kan onape onka akada?

¹⁷ Iń baba do acʼakʼ jiwi alaekate ape lạgitʼe lạṛhạilena ar Midiạnrenkoakʼ ti khone rukhiyạketʼpea.

¹⁸ Menkhan teheń ape do uniyakʼ gharońjrenko upạrtepe huletʼkana. Inạ mitʼ dhiri cetanre uniren eaegel hoponkope khũn akatʼkoa ar uniren kạ̃ṛmĩren hopon Abimelek do Sikemren hoṛko cetanre rajpe benao akadea, ente uni doe aperen peṛakana.

¹⁹ Menkhan teheń Jerubakʼal ar uni gharońjrenko lạgitʼ pạtiạr ar bhageakʼ reakʼpe kạmi akatʼ khan Abimelek do aperen rạskạwạnicʼe hoyokʼma ar ape hõ uniren rạskạwanko baṛe hoyokʼpe!

²⁰ Menkhan bape onka akatʼ khan Abimelek bhitri khon seṅgel oḍokʼ hijukʼte apeko, metakʼme Sikemren ar Bet-Miloren hoṛkoe atarpea; metakʼme Sikemren ar Bet-Miloren hoṛko khon hõ seṅgel oḍok hijukʼte Abimeleke lo torojea.”

²¹ Ona tayom Jotham do Ber ńutumanakʼ mitʼṭecʼ jaegateye dạṛkeda. Uni do acʼren boeha Abimelek botorte onḍege girobasokʼe ehopʼena.

²² Abimelek do pe bochor Israelko cetanre raje calaokeda.

²³ Inạ tayom Isor do Abimelek ar Sikemren hoṛko talare mitʼṭen bạṛicʼ jiue kolkedea. Onate Sikemren hoṛko do Abimelek sãote bepạtiạrko kạmikeda.

²⁴ Isorgeye nonkakeda jemon Jerubakʼalren eaegel hoponkoakʼ mãyãm cetanre oka behokakʼ hoyakan ona iạte onkoren boeha Abimelek cetanre ar gogocʼ kạmire okoeko gokʼṛokoko tahẽkan onko Sikemren hoṛko cetanre hala ruạṛokʼ.

²⁵ Sikemren hoṛko do Abimelek upạrte buru cetanre thoṛa hoṛko dohoketʼkoa, ar onko do danaṅre tahẽkate ona horte calakʼkan hoṛko cetanreko luṭetʼ tahẽkana. Ar ona katha do Abimelek hõko baḍae ocokedea.

²⁶ Onako dinre Ebedren hopon Gakʼal do acʼren boehako soṅgekate Sikemteye hecʼena ar Sikemren hoṛko do unireko pạtiạuena.

²⁷ Onko do akoakʼ khetre senkate darkha joko lenkeda arko porobena. Onko do akoren debotawakʼ mundilte senkateko jom-nũkeda ar Abimelekko sarapadea.

²⁸ Ebedren hopon Gakʼal doe menkeda, “Abimelek doe okoekante Sikemren hoṛ do uni gobolre bon tahena? Uni do cetʼ Jerubakʼalren hopon doe baṅkana? Ar Sebul do cetʼ uniren subedar doe baṅkana? Ape do bickom Sikemren apattetʼ Hamorren bõsko gobolre tahenpe. Cedakʼ abo do Abimelek gobolre bon tahena?

²⁹ Jodi hoṛko ińakʼ hukumko manao enḍekhan iń do Abimelekiń ocogea. Ariń menkea, ‘amren lạṛhại phạdante dela oḍok hijukʼme.’ ”

³⁰ Ebedren hopon Gakʼalakʼ ona katha Sikemren mukhiyạ Sebul do onae ańjomketʼ khan ạḍiye raṅgaoena.

³¹ Uni do hape hapete Abimelek niạ kathae baḍae ocokedea, “Ebedren hopon Gakʼal ar uniren boehako do Sikemre hecʼkate am upạrte hoṛkin uskuretʼkoa.

³² Onate am ar amren hoṛko do ạyupʼ jokhecʼ hecʼkate horre tãṛãkʼ akan tahenpe.

³³ Ar setakʼ siń candoe rakabokʼ jokhecʼ am do nagraha upạrtem laha idikʼa. Ar Gakʼal ar uniren hoṛko do tinre am upạrteko oḍok hijukʼa unre am do oka cekaeyem menetʼkan onam onkaea.”

³⁴ Onate Abimelek ar uniren sanam lạṛhại phạdko do ńindạ jokhecʼko oḍokente pon hạṭińteko hạṭińena ar Sikem ṭhenko oko tahẽyena.

³⁵ Ebedren hopon Gakʼal do nagraha khon oḍokkate tinre phaṭok-duạr ṭhene teṅgo akan tahẽkana. Unre Abimelek ar uniren lạṛhại phạdko do oko akan jaega khonko oḍok hecʼena.

³⁶ Gakʼal do onko ńelte Sebule metadea, “Ńelkom, buru cetan khon tinạkʼ hoṛko pheḍ hijukʼ kana.” Sebule roṛ ruạṛkeda, “Am do buru reakʼ umulkoge hoṛkom metakokana.”

³⁷ Menkhan Gakʼal do arhõe menkeda, “Ńelkom, usul utạrakʼ buru khon hoṛko pheḍ hijukʼkana, ar mitʼ dol do gonokkoakʼ dare secʼ khonko hijukʼkana.”

³⁸ Unre Sebul do uniye metadea, “Ńitokʼ do okayentama mocatem roṛletʼ maraṅ maraṅakʼ katha do? Amem menakada, ‘Abimelek doe cele kante uniyakʼ gobolre bon tahena? Noko hoṛko ma bacom puchạuletʼko. Ńitokʼ do oḍokokʼte onko sãote lạṛhạime.”

³⁹ Unre Gakʼal do Sikemren hoṛkoe ạyur idiketʼkote Abimelek sãoteye lạṛhạiyena.

⁴⁰ Abimelek do Gakʼale khudạu idikedea, onate uni doe dạṛ pạnḍucʼkeda. Ar ńir paskaokʼ jokhecʼ uni dolren ḍher hoṛgeko ńẽtʼ ocoyente nagraha reakʼ phaṭokʼ hạbicʼ goṭa horko giḍi tahẽyena.

⁴¹ Ar Abimelek do Arumareye tahẽyena ar Sebul do Sikem khon Gakʼal ar uniren boehakoe laga oḍokketʼkoa.

⁴² Dosar hilokʼ Sikemren hoṛko do tinre bilạn ṭạnḍi secʼko oḍok calakʼkan tahẽkana unre ona sombat do Abimelekko baḍae ocokedea.

⁴³ Khan Abimelek do acʼren hoṛko pe hạṭińteye hạṭińketʼkoa ar onko do bilạn ṭạnḍire tãṛãkʼ akaeko tahẽyena. Ar Nagraha khon hoṛko oḍokʼ hijukʼe ńelketʼko khan uni do onkoe ńẽtʼketʼkoa.

⁴⁴ Abimelek ar uni dolren hoṛko do samaṅ secʼko ńir calaoente nagraha bolokʼ reakʼ horreko teṅgoyena. Ar bilạn ṭạnḍire okoeko tahẽkan onko eṭakʼ bar dol do onko cetanre jhãpko emkeda arko gocʼketʼkoa.

⁴⁵ Goṭa dinko ńẽtʼketʼkote Abimelek do nagrahae hatkeda ar onḍenko hoṛkoe gocʼketʼkoa. Ona tayom nagrahae ḍahao maraoketʼte onare buluṅe chiṭiạuada.

⁴⁶ Niạ sombat ańjomkate Sikem gaṛren hoṛko do El-Berit debotawakʼ mundil reakʼ bhitri oṛakʼreko boloyena.

^47-48 Ar Abimelek do tinreye ańjomkeda, hoṛko do onḍe senkateko jarwa akana unre uni do acʼren hoṛkoante Salmon buruteye rakapʼena. Uni do ṭeṅgocʼe hataokeda ar dare khon mitʼṭecʼ ḍạre makʼ ạgukeda. Ona tayom acʼren hoṛkoe hukumatʼkoa, “Okań cekaketʼpe ńelkedeń ape hõ usạra onkaepe.”

⁴⁹ Onate sanamkoge dare khon ḍạrko makʼ ạguketʼte Abimelek tayomteko mohnḍayena. Ar ona tayom do ona bhitri oṛakʼ cetanreko ladekeda ar seṅgelko jeretʼada. Onate Sikem gaṛren sanam hoṛ doko atar cabayena. Onḍe do mitʼ hajar herel hoṛ ar maejiuko tahẽkana.

⁵⁰ Inạ tayom Abimelek do Tebeste senkate onae hatkeda.

⁵¹ Nagraha bhitrire mitʼṭecʼ gaṛ tahẽkana; ar nagraharen sanam herel ar maejiu do onḍeko ńir okoyena. Onko do gaṛte bolokate onḍenakʼ duạrko siń esetʼketʼte chadteko rakapʼena.

⁵² Abimelek do ona gaṛ ṭhen senkate onae akromonkeda; ar gaṛre seṅgel jeretʼakʼ lạgitʼ gaṛ reakʼ duạr secʼe laha idiyena,

⁵³ unre mitʼṭen maejiu do jante dhiri reakʼ cetanakʼ hĩse hataoketʼte Abimelekakʼ bohokʼreye giḍiwadea ar uniyakʼ bohokʼe paṛakʼketʼtaea.

⁵⁴ Unre Abimelek do usạrate acʼakʼ khanḍa bhanḍa asenicʼ koṛae metadea, “Amakʼ tarwaṛe oḍokkate gojeńme jemon onko aloko men daṛeakʼ, ‘mitʼṭen maejiuakʼ tite uni doe gocʼ ocoakana mente.’ ” Ar onate uni koṛa do tarwaṛeteye phạṛikedea are gocʼena.

⁵⁵ Abimeleke gocʼena menteko ńelkede khan Israelko do oṛakʼteko ruạṛ calaoena.

⁵⁶ Abimelek do eaegel boehakoe gocʼletʼkote apattetʼ cetanre okae behokletʼ onkage Isor do uniyakʼ paona sạjạiye emkatʼtaea.

⁵⁷ Sekemren hoṛko okaṭakʼko behokletʼ Isor do ona reakʼ paona sạjại onko hõe ematʼkoa. Ar nonkate Jerubakʼalren hopon Jothamakʼ sarap do uni cetanre paṛaoena.