Bikʼcạrko 8 - সান্তালী বাইবেল

Seyeb ar Salmuna

¹ “Ephrayimren hoṛ do Gideonko kulikedea, “Ale tulucʼ nonka do cedakʼem beoharkeda? Midiạnrenko sãote lạṛhại lạgitʼ oḍokʼ calakʼ jokhecʼ cedakʼ bam hohoatʼlea?” Ar nonkage onko do keṭecʼ keṭecʼ katha Gideonko ańjomadea.

² Uni doe roṛ ruạṛatʼkoa, “Ape khon do cetʼ ḍhergeń ceka akada? Ephrayim okaṭakʼ darkha joko halaṅ ạguakatʼ ona do cetʼ Ạbieserakʼ tumạlakʼko khon baṅ ḍhergea?

³ Isor do apeakʼ tire Midiạnren mukhiyạ Oreb ar Sebe soprot akatʼkinạ. Ape khon do cetʼ ḍhergeń ceka akada?” Onate Gideon upạrte onkoakʼ raṅgao do cabayentakoa.

⁴ Gideon ar uniren pe sae hoṛ do Midiạnrenko khudạu idiketʼkote jordan ṭhen hecʼkate gaḍako paromena. Unre onko do ạḍiko laṅga akan tahẽkana,

⁵ Onate Gideon do Sukotren hoṛkoe metatʼkoa, “Ińren lạṛhại phạdko thoṛa piṭhạ jom ocokope; enteko laṅga akana. Ar iń do ńitokʼ Midiạnren raj Seba ar Salmuna tạkiniń khudạuetʼkinạ.”

⁶ Menkhan Sukotren mukhiyạkoko menkeda, “Cedakʼ amren lạṛhại phạdko do piṭhạle jom ocokoa? Seba ar Salmuna tạkinakʼ kuṭrạ akatʼ ti do cetʼ amakʼ tirem ạguakada?”

⁷ Gideone roṛ ruạṛkeda, “Tinre Probhu Isor do Seba ar Salmuna ińakʼ tireye soprotkinạ unre apeakʼ noa katha iạte hahaṅkar reakʼ rạṅgạini jạnumte apeakʼ dea hartań oṛejtapea.”

⁸ Gideon do onḍe khon Penuelteye rakapʼ calaoena ar onḍenko hoṛ hõ piṭhại koeketʼkoa. Menkhan Sukotren hoṛko cetʼlekako metade onkage onko hõko menkeda.

⁹ Unre Gideon do Penuelren hoṛkoe metatʼkoa, “Iń do tinre jitạukateń ruạṛ hijukʼa unre noa gaṛ doń bhaṅla bhaṭ oṭokakʼa.”

¹⁰ Seba ar Salmuna do gelmõṛẽ hajar lạṛhại phạdante Karkorrekin tahẽkana. Purub disạmren lạṛhại phạdko modre nokoge sarecʼko tahẽkana ar mitʼ lakh bargel lạṛhại phạdko doko gocʼ ocolena.

¹¹ Nobah ar Jogbeha reakʼ purub secʼreko tahẽkan hoṛkoakʼ horte senkate Gideon do ackage onko lạṛhại phạdko cetanre jhãpe emkeda. Unre onko do ạḍi nirdạndiko tahẽkana.

¹² Sebah ar Salmuna ńutuman Midiạnren unkin banar raj dokin dạṛkeda. Menkhan Gideon do unkine khudạu idiketʼkinteye sapʼketʼkinạ, ar onkoren goṭa lạṛhại phạdko do Gideon iạte ạḍi botor caṛhaoatʼkoa.

¹³ Inạ tayom Joasren hopon Gideon do Heros ńutumanakʼ horte lạṛhại khone ruạṛena.

¹⁴ Uni do horre Sukotren mitʼṭen juạn koṛa sapʼkateye kulikedea. Uni juạn koṛa do Sukotren eaegel eae maraṅ hudạren hoṛkoakʼ ar murubbikoakʼ ńutume ol adea.

¹⁵ Ar Gideon do Sukotre senkate onḍenko hoṛe metatʼkoa, “Nukin ńelkinpe Seba ar Salmuna. Nukin lạgitʼge posṛa kedeńtepe menleda, ‘cedakʼ amren lạṛhại phạdko do piṭhạle jom ocokoa? Seba ar Salmunawakʼ ti do cetʼem kuṭrạ ạgu akada?’

¹⁶ Gideon do Sukotren murubbikoe sapʼketʼkoa ar hahaṅkar reakʼ rạṅgạini jạnumte deae dal oṛecʼketʼtakoa.

¹⁷ Uni do Penuelakʼ gaṛe dhaṅdhaserkeda ar onḍenko hoṛe gocʼ cabaketʼkoa.

¹⁸ Ona tayom uni do Seba ar Salmuna tạkine kuliketʼkinạ, “Taborre cetʼ lekan hoṛ apeakʼ titeko gocʼ ocoakana?” Onkinkin roṛ ruạṛkeda, “Am lekan hoṛ, mimitʼko do rajren hoponko leka.”

¹⁹ Gideone menkeda, “Onko do ińren boehako tahẽkana, ińren mitʼ lacʼ boehage. Jiwetʼ Isor ńutumteń kiriạkʼ kana, onko jiwetʼpe doholeko khan iń hõ apeko jiwetʼ iń dohokepea.”

²⁰ Inạ tayom uni do acʼren maraṅicʼ hopon Jethore metadea, “Unkin gocʼkinme.” Menkhan Jethorakʼ umer komge tahẽkante uni do botorte tarwaṛege bae oḍokleda.

²¹ Unre Seba ar Salmuna tạkin kin menkeda, “Amge hecʼkate gocʼlińme, ente am cetʼleka onkage amakʼ kạmiko hõ.” Onate Gideon do hecʼkate unkine gocʼketʼkinạ ar unkinren ũṭakʼ hoṭokʼre tahẽkan condro-har doe raṛa hataokeda.

Gideonakʼ ephod

²² Tayomte Israelko do Gideonko metadea, “Am do Midiạnrenkoakʼ ti khonem bańcao akatʼlea, onate am ar amren bõskoge aleren disạm cakʼlaokoko hoyokʼma.”

²³ Gideon do onkoe metatʼkoa, “Ale do okoege aperen disạm cakʼlaoko bale hoyokʼa. Iń hõ baṅ ar ińren hoponko hõ baṅ; Probhu Isorge aperen disạm cakʼlaoyicʼe hoyokʼa.”

²⁴ Uni do arhõe metatʼkoa, “Menkhan ińakʼ mitʼṭecʼ nehõr menakʼtińạ. Apeakʼ luṭ reakʼ hạṭiń khon mitʼṭecʼkate lutur reakʼ pagra imạńpe.” Uni do noa iạteye menkeda, ente Midiạnrenko do Ismael bõsren hoṛko tahẽkana ar onako oktere Ismael bõsrenko do luturre sona reakʼ pagrako horokʼetʼ tahẽkana.

²⁵ Onkoko roṛ ruạṛadea, “Ale do kusitege onale emokʼa.” Onate onko do mitʼṭecʼ kicricʼko aṭetʼkeda ar mimitʼko do akoakʼ luṭ reakʼ hạṭiń khon mitʼṭecʼkate lutur reakʼ pagrako dohokeda.

²⁶ Onate tinạkʼ sonae ńamketʼ ona reakʼ ojon do bargel keji mõṛẽsae gram hoyena. Ona chaḍa uniyakʼ ńamakʼ condro-har, jhur jhuri, Midiạnren rajkoakʼ horokʼakʼ beguni kicricʼko se ũṭkoakʼ hoṭokʼ reakʼ malako do baṅ sapʼlena.

²⁷ Gideon do onako sonate mitʼṭecʼ ephode benao ocoketʼa ar acʼakʼ ato Ophrareye dohokeda. Ar Israelko do onḍe ona ephod sewawakʼko ehopʼena arko laṭghaṭkeda. Gideon ar uniyakʼ gharońjrenko lạgitʼ onage mitʼṭecʼ jhampa leka hoyena.

²⁸ Nonkage Israelko do Midiạnrenko kobojketʼkoa; onate onko do bohokʼ ar bako rakapʼ daṛeada. Gideonakʼ jionre sarecʼ pongel bochor do disạmre suluk tahẽkana.

Gideonakʼ gujukʼ

²⁹ Ona lạṛhại tayom Joasren hopon Jerubakʼal do oṛakʼe ruạṛ calaoena.

³⁰ Uniren do ạḍi utạr bạhuko tahẽkante acʼrenge eae gel hoponko tahẽkantaea.

³¹ Sikemre uniren do mitʼṭen miluạ bạhui tahẽkantaea. Uniren hõ mitʼṭen hopone tahẽkana. Gideon do uniyakʼ ńutum Abimeleke doholetʼtaea.

³² Joasren hopon Gideon do haṛamkateye gocʼena. Ar Abieserkoakʼ Ophrare uniren apat Joasakʼ topareko baekadea.

³³ Gideonakʼ gujukʼ tayom Israelko do arhõ Probhu Isor bạgikate Bakʼal debota sewawaeko ehopʼena. Onko do Bakʼal-Beritge akoren debota menteko dohowana.

³⁴ Okoe do beṛhaeten bạirikoakʼ ti khone rukhiyạletʼko onkoren uni Probhu Isor doko hiṛińkedea.

³⁵ Jerubakʼal, metakʼme Gideon cetʼlekae bhạlạiyletʼko onko do uniyakʼ gharońj lạgitʼ onka bako kạmileda.