Bikʼcạrko 7 - সান্তালী বাইবেল

Gideon do Midiạnrenkoe bhagaoetʼko

¹ Jerubakʼal, metakʼme Gideon ar uniren sanam hoṛko do ạḍi setakʼre beretʼkate Harod ṭoṭha reakʼ dakʼ jharna ṭhenko ḍerayena. Ar onko utạr reakʼ More buru ṭhenakʼ buru nalare do Midiạnrenkoakʼ ḍera tahẽkana.

² Probhu Isor do Gideone metadea, “Midiạnrenko onkoakʼ tireń soprotko lạgitʼ do amren hoṛkoakʼ lekha ḍhergetakoa. Ariń onka lekhan Israelko do apnarko sarhaokʼa arko men boteja, akoakʼ daṛetegeko bańcao akana.

³ Onate hoṛkom baḍae ocokoa, okoeko botorokʼkan onko do Gilead buru bạgikate oṛakʼteko ruạṛ calao daṛeakʼa.” Onate bargel bar hajar hoṛ doko ruạṛ calaoena ar gel hajar hoṛko sarecʼena.

⁴ Unre Probhu Isor do Gideone metadea, “Ńit hõ ḍher hoṛko sarecʼ akana. Onko do dakʼ ṭhen idikom. Ar iń do onḍe onkoń bachaokoa. Ariń men khan, ‘nui hoṛ am sãoteye senokʼa, ’ enḍekhan uni doe calakʼa; ariń men, ‘nui hoṛ am sãote bae calakʼa, ’ enḍekhan uni do bae calakʼa.”

⁵ Onate Gideon do hoṛko dakʼ ṭhene idiketʼkoa. Onḍe Probhu Isor do uniye metadea, “Seta leka caṭokʼkate okoe dakʼko ńũi onko khon okoe ikhṛumkate dakʼko ńũi onkom begarkoa.”

⁶ Ar pe sae hoṛ do ańjlekate dakʼko ńũkeda ar sarecʼko jotoge ńũi lạgitʼko ikhṛumena.

⁷ Unre Probhu Isor do Gideone metadea, “Okoe pe sae hoṛ do alaṅte caṭokʼkate dakʼko ńũketʼ onko hotetege iń doń bańcaopea ar apeakʼ tire Midiạnrenkoń jimạkoa. Ar eṭakʼko do apan ạpin oṛakʼteko ruạṛ joṅma.”

⁸ Onate Gideon do pe sae hoṛ dohokate sarecʼ Israelko oṛakʼteye kol ruạṛkatʼkoa. Ar jomakʼko ar sakwako doe koe dohoketʼkote onko pe sae hoṛko ṭhene tahẽyena. Midiạnrenkoakʼ ḍera do tahẽkana Gideonkoakʼ ḍera reakʼ latar secʼre.

⁹ Enhilokʼ ạyupʼ jokhecʼ Probhu Isor do Gideone metadea, “Beretʼme, ar pheḍ senkate onkoakʼ ḍera cetanre jhãp emme. Iń do amakʼ tireń jimạ akatʼkoa.

¹⁰ Ar onko cetanre jhãp emem botorokʼkan khan enḍekhan amren guti Pura soṅgeyem ar onkoakʼ ḍerate pheḍ calakʼme,

¹¹ ar onkom ańjomkoa cetʼko meneda mente. Onate Gideon do acʼren guti Purai soṅgekedete lạṛhại phạdkoakʼ ḍera ṭhene senena.

¹² Unre Midiạnrenko, Amalekiko ar purub disạmren hoṛko do ona buru nalare poho lekako tahẽkana. Onkoren ũṭko do gaṅga gitil leka lekhare ạḍi saṅgeko tahẽkana.

¹³ “Gideon do tinre onḍe senkateye seṭerena unre mitʼṭen hoṛ do acʼren gate sãote mitʼṭecʼ kukmũ reakʼ kathae lạiyaekan tahẽkana. Uni doe menetʼ tahẽkana, “Iń do mitʼṭecʼ iń kukmũkeda. Iń doń ńelkeda Jao reakʼ mitʼṭecʼ piṭhạ do Midiạnrenkoakʼ tạmbure guṛdạu hecʼena. Ona do onkoakʼ tạmbure nunạkʼ murukte josena, ar onate onkoakʼ tạmbu do lạnduṛena.”

¹⁴ Uniren gateye roṛ ruạṛkeda, “Noa do Israelkoren Joasren hopon Gideonakʼ tarwaṛe chaḍa ar cetʼge baṅkana. Isor do Midiạnrenko ar onkoakʼ goṭa ḍerage Gideonakʼ tireye soprota.”

¹⁵ Gideon do ona kukmũ reakʼ katha ar ona reakʼ manetetʼ ańjomkate ombakʼente Isore sewawadea. Ar ona tayom do Israelkoakʼ ḍerate ruạṛ hecʼkate ãṭ aṛaṅte hohoateye menkeda, “Ma beretʼpe, Isor do Midiạnrenkoakʼ ḍera ape tireye soprotakada.”

¹⁶ Uni do onko pe sae hoṛko pe ṭhene hạṭińketʼkoa ar mimitʼkoakʼ tire mitʼṭecʼkate sakwa, mitʼṭecʼkate khạli kanḍa ar onako kanḍare mosal hõe ematʼkoa.

¹⁷ Ona tayom uni do onkoe metatʼkoa, “Ape do ińpe beṅgetʼạńạ ar iń cetʼ iń cekae ape hõpe onkaea. Ḍera ṭhen seṭerkate iń okań cekaea ape hõ ṭhik onagepe onkaea.

¹⁸ Iń ar iń sãoten sanamko tinre sakwako oroṅa unre ḍera beṛhae khon ape hõ sakwape oroṅa ar ãṭ aṛaṅtepe mena, ‘Probhu Isor ńutumte ar Gideon ńutumte.’ ”

¹⁹ Ar Midiạnrenko do tala ńindạ horhokoko bodolokʼkan tahẽkanre Gideon ar uni sãoten mitʼsae hoṛ do ḍera ṭhenko seṭerena. Onko do akaoakʼ sakwako oroṅketʼte ti reakʼ kanḍako rạputʼketʼtakoa.

²⁰ Pe dolren hoṛge mitʼ dhaoteko rạputʼkeda. Ar leṅga tire mosal ar jojomtire sakwa hataokate onko do ãṭ aṛaṅteko hohokeda, “Probhu Isor ńutumte tarwaṛe ar Gideon ńutumte tarwaṛe.”

²¹ Ḍera beṛhaete Gideonren hoṛko do tinre akoakʼ ṭhạ̃ireko teṅgo thirena unre sanam Midiạnrenko do kạumạu ar ńir baṛaeko ehopʼena.

²² Pe sae sakwa saḍekʼ oktere Probhu Isor do ḍera bhitriren hoṛkoe andmandaoketʼkote onko do mitʼ hoṛ armitʼ hoṛ cetanre tarwaṛeante lạṛhạiko ehopʼena. Onate Midiạnren lạṛhại phạdko do Tabat ṭhen Beth-sita hạbicʼko dạṛkeda.

²³ Unre Israelko modren Napthali, Aser ar Manasi gusṭiren sanam hoṛko hoho ocoyena ar onko do Midiạnrenko khudạu idiketʼkoa.

²⁴ Ar Gideon do Ephrayim buru ṭoṭha reakʼ sanam jaegare hoṛ kolketʼkoteye metatʼkoa, “Midiạnrenko upạrte pheḍ hijukʼpe ar onko seṭerokʼ laharege Beth-bara hạbicʼ huḍiń gaḍa ar jordan gaḍa reakʼ taṛam paromokʼ jaegako dokhol maṛaṅpe. Onate Ephrayimren sanam hoṛko mitʼente Beth-bara hạbicʼ sanam huḍiń gaḍa ar jordan gaḍa reakʼ taṛam paromokʼ jaegako hatkeda.

²⁵ Onko do Oreb ar Seb ńutuman Midiạnren barea mukhiyạko sapʼketʼkinạ ar Oreb do Oreb reakʼ dhiri ṭhen ar Seb do seb reakʼ darkha lelenkunḍ jaegareko gocʼkedea. Onko do Midiạnrenko khudạu idiketʼkoa ar Oreb ar Seb tạkinakʼ bohokʼ do jordan hanasa Gideon ṭhenko idikeda.