Bikʼcạrko 5 - সান্তালী বাইবেল

¹ Enhilokʼ Debora ar Abinoamren hopon Barak do noa sereńkin sereńkeda:

² Israelkoren mukhiyạko do lạṛhạire hoṛkoko ạyurketʼkoa, onko do akoakʼ kusiteko laha idiyena. Probhu Isorakʼ sabasige hoyokʼtaema!

³ E rapajko, ańjompe baṛe; E disạm cakʼlaoko, luturakʼpe; iń do Probhu Isor ńutumteń sereńa, Israelkoren Probhu Isor ńutumteń sarhao sereńa.

⁴ E Probhu Isor, am do tinre Seyir khonem mohnḍayena, Edom disạm khonem oḍokena, unre dhạrti do daldalaoena ar serma khon dakʼem jạṛi ocokeda.

⁵ Unre Probhu Isor samaṅre buruko do daldalaoena, Israelkoren Probhu Isor samaṅre Sinại buru hõ dalmalaoena.

⁶ Anatren hopon Samgar ar Jayel bidạlre hortenko do sodor ḍahar bạgikate ạcur bihur horko pańjakeda.

⁷ Unre Israelkoakʼ atokore celege bako tahẽkana, ar tin hạbicʼ iń Debora do Israelkoren eṅgat leka bạń tahẽkan, un hạbicʼ onkoakʼ atoko do khạlige tahẽkana.

⁸ Onko do nãwã isorko secʼ monko lawerketʼtakoa Ar onkoakʼ phaṭok duạr ṭhen lạṛhại hoyena. Unre pongel hajar Israelkoakʼ tire mitʼṭecʼ ḍhal hõ baṅ tahẽkana, ar mitʼṭecʼ borlom hõ baṅ tahẽkana.

⁹ Ińakʼ mone do Israelkoren onko mukhiyạko secʼ lawerena ar apnarakʼ kusite lạṛhạiko oḍok senena; Probhu Isorakʼ sabasige hoyokʼtaema baṛe!

¹⁰ Ape okoe do ponḍ gadha eṅgare decʼkate ar kombol reakʼ godire duṛupʼkate hortepe calakʼkan, ape do niạko reaṅ baṛe sereńpe.

¹¹ Ańjompe, dakʼ lo ṭhạ̃ire hoṛko doko khae khoyeda; ar Israelakʼ atoren hoṛko lạgitʼ Probhu Isor do bańcaokʼ reakʼe roṛeda. Noa ańjomkate hoṛko do Nagraha reakʼ phaṭok duạr ṭhenko senena.

¹² Ebhenokʼme E Debora, ebhenokʼme! Ebhenokʼme ar sereń joṅme. E Abinoamren hopon Barak, ma beretʼme; ar lạṛhạire sapʼ ńam akanko do jhuṭiạu idikom.

¹³ Ona tayom sarecʼ hoṛko do manotan hoṛko ṭhenko hecʼena; ar Probhu Isorren hoṛko do lạṛhại lạgitʼ iń ṭhenko hecʼena.

¹⁴ Adomko hoṛ do Ephrayim khonko hecʼena Amalekiko girobasokʼkan tahẽkan ṭhen; onko doko hecʼena Benjamin gusṭiren hoṛko tayomte. Makir khon do mukhiyạko hecʼena, ar Sebulon khon do cakʼlao ṭheṅga sasapʼkoge.

¹⁵ Isạkarren senaputiko do Debora sãoteko senena; Isạkarren hoṛko do buru nalateko pheḍ calaoena Barak tayom tayomtege. Rubenren lạṛhại phạdko do monko kajakketʼtakoa.

¹⁶ E Rubenren hoṛko, bhiḍi chaṛko talare do cedakʼpe duṛupʼ akana? Ape do cetʼ gupikoakʼ tiriyạ ańjompe khojleda? Ar Rubenren lạṛhại phạdko do mot baṅ mitʼlentakoa.

¹⁷ Gileadren hoṛko do jordan hanasareko tahẽyena. Ar Dan gusṭirenko do cedakʼ jahaj ṭhenko tahẽyena? Ar Aser gusṭirenko do jalapuri aṛereko tahẽyena; tahẽyenako bondor ṭhenge.

¹⁸ Lạṛhạire Sebulonren hoṛko do gujukʼ hạbicʼ jiwiko alaekeda; Napthaliren hoṛko hõ ṭạnḍi reakʼ usul jaegakore.

¹⁹ Rapajkoko hecʼena arko lạṛhạiyena, unre Kananren raj doko lạṛhạiyena; Tanak ṭhen, Megido reakʼ dakʼko ṭhenge, menkhan mitʼ kuṭrạ rupạ hõ bako luṭana.

²⁰ Serma khon ipilkoko lạṛhạiyena, apan ạpin ḍahar khon lạṛhạiyenako Sisera birudre.

²¹ Ona sedae reakʼ gaḍa dakʼ ona Kison gaḍa reakʼ dakʼ do bạirikoe ạtu idiketʼkoa. E ińakʼ jiwi, keṭecʼkate lahakʼme baṛe.

²² Ona tayom ot do daldalaoena sadomkoakʼ kaṛapʼ kaṛapʼ khurạte daṛean sadomko calaoena kamsa kodokʼ kamsaoate.

²³ Probhu Isorren goḍete menkeda, “Meros baṛe sarapaeme, ạḍitetʼ sarapaeme onḍenko hoṛ do; lạṛhạire Probhu Isor tulucʼ bako seletʼlena, ar daṛeanko upạrte hõ baṅa.”

²⁴ Kenini Heborren bạhu Jayel do, bhạgangeae maejiuko modre; uni doe bhạgangea tạmbureko tahenkan maejiuko modre.

²⁵ Sisera dakʼe khojletʼre uni do toae ạguadea; ar mońj okocʼ bạṭite dahegeye emadea.

²⁶ Uni do tạmbu reakʼ khile hataokeda, ar jojomtire hạtuṛe sapʼkeda; ar Siserae do khile kuṭạm jalatʼadete bohokʼe posakʼketʼtaea ar cạndireye kuṭạm tapʼadea.

²⁷ Uniyakʼ jaṅga ṭhen Sisera doe bhindạṛena ar onḍege uni doe bhindạṛ tahẽyena; ar uniyakʼ jaṅga ṭhen okareye bhindạṛen onḍege uni doe gocʼena.

²⁸ Siseraren eṅgattetʼ do khiṛki duạr khone oyoṅkeda, ar pińjrạ khon ãṭ aṛaṅteye menkeda, “Uniyakʼ rãt gạḍiko hijukʼ do cedakʼ bilomokʼ kana? Rãt gạḍiko reakʼ pạ̃ihạ̃ saḍe do cedakʼ baṅ ańjomokʼ kana?”

²⁹ Uniren mukhiyạ ạkilan erakoko roṛ ruạṛadea; ar uni hõ mone monte roroṛe ehopʼena,

³⁰ “Khạṭige onko do luṭakʼ jinisko ńamakada ar ako talareko hạṭiń joṅkana; mimitʼ herel hoṛ lạgitʼ mitʼṭen se barea kuṛi ar Sisera lạgitʼ do nana parkan kicricʼ, tiń galaṅakʼ kicricʼko, hoṭokʼ beṛhaeteakʼ baha galaṅakatʼ kicricʼko noa sanamakʼge cetʼ bako luṭ akada?”

³¹ E Probhu Isor, amren bạiriko nonkageko marao cabakʼma; menkhan okoe amko dulạṛme Onko do siń cando leka daṛeanko hoyokʼma. Inạ tayom disạmre pongel bochor hạbicʼ suluk tahẽkana.