Bikʼcạrko 4 - সান্তালী বাইবেল

Debora ar Barak reaṅ

¹ Ehude gocʼen tayom Israelko do arhõ Probhu Isorakʼ mẽtʼre oka bạṛicʼakʼ kan onage kạmiko dhurạuena.

² Onate Probhu Isor do Jabin ńutuman mitʼṭen Kanani rajakʼ tire onkoe jimạkatʼkoa. Jabin do Hasor khon raje calaoetʼ tahẽkana. Uniren senaputiyakʼ ńutum do Sisera tahẽkana. Uni do Harosetreye tahenkan tahẽkana.

³ Jabinakʼ do irạl sae mẽṛhẽtʼ reakʼ rãt gạḍiko tahẽkantaea ar uni do bargel bochor hạbicʼ Israelko cetanre ạḍi bạṛicʼ jor julume caloetʼ tahẽkana. Onate Israelko do Probhu ṭhen goṛo ńam lạgitʼko rakʼkeda.

⁴ Unre Lapidotren oṛakʼ hoṛ Debora do mitʼṭen maejiu nạbiye tahẽkana. Ar unige Israelkoe bicạretʼko tahẽkana.

⁵ Uni do Ephrayem buru ṭoṭhako reakʼ Rama ar Bethel tala reakʼ mitʼṭecʼ khijur dare buṭạreye duṛupʼkan tahẽkana, ar Israelko do akoakʼ jhogṛa emanko miṭmaṭ lạgitʼ uni ṭhenko hijukʼkan tahẽkana.

⁶ Uni do Napthali disạm reakʼ Kedes nagraha khon Abinoam hopon Barake hoho ạgu ocokedeteye metadea, “Israelkoren Probhu Isor do niạ hukume emamkana, ‘Napthali ar Sebulon gusṭirenko khon gel hajar hoṛko hataokom ar soṅgekate Tabor burute idikom.

⁷ Iń do Jabinren senaputi Sisera ar uniren lạṛhại phạdko ar onkoakʼ rãt gạḍiko sudhạ Kison gaḍa ṭheniń idikoa ar amakʼ tireń jimạkoa.’ ”

⁸ Barak do Deborae metadea, “Iń sãote amem calakʼ khan, enḍekhan doń senokʼgea, ar baṅ khan do bạń calakʼa.”

⁹ Deborae menkeda, “Am sãoteń calakʼa, menkhan niạ lạṛhại reakʼ sabasi do bam ńama, ente Probhu Isor do mitʼṭen maejiuakʼ tire Siserae jimạyea.” Ar niạ katha menkate Debora do Barak sãote Kedesteye senena.

¹⁰ Ar Barak do Sebulon ar Napthali gusṭiren hoṛkoe hohowatʼkoa. Onate gel hajar hoṛ do uni sãoteko senena ar Debora hõ onko tulucʼe calaoena.

¹¹ Ar Herob ńutuman mitʼṭen Kenani hoṛ do eṭakʼ Kenaniko, metakʼme Mose hońhartetʼ bõsrenko bạgikate Kedes ṭhen Sananim reakʼ elon dare sorre tạmbui beretʼ akatʼ tahẽkana.

^12-13 Sisera do tinre niạ khobore ańjomkeda baṅma Abinoamren hopon Barak do Tabor buruteye rakapʼ akana unre uni do are sae mẽṛhẽtʼ reakʼ rãt gạḍiko ar uniren sanam hoṛko jarwakate Haroset-hagoyim khon Kison gaḍa aṛeteye senena.

¹⁴ Unre Debora do Barake metadea, “Am do laha idikʼme, Probhu Isor do teheńge amakʼ tire Siserae jimạ akadea. Probhu Isor do am laha lahateye senakana. ” Unre Barak do Tabor buru khone pheḍ hecʼena ar uni tayomte gel hajar hoṛko senena.

¹⁵ Barak do tinre onko cetanre jhãpe emkeda unre uni samaṅre Probhu Isor do Sisera ar uniyakʼ sanam rãt gạḍi ar lạṛhại phạdkoe andmandao ocoketʼkoa. Unre Sisera do acʼakʼ rãt bạgikateye dạṛkeda.

¹⁶ Barak do menkhan Haroset-hagoyim hạbicʼ onkoakʼ rãt gạḍiko ar lạṛhại phạdkoe khudạu idiketʼkoa. Uni do Siseraren sanam lạṛhại phạdkoe gocʼ cabaketʼkoa, mitʼ hoṛ hõ sarecʼ do bae doholetʼkoa.

¹⁷ Ar Sisera doe ńir paskaoente Kenini Herobren bạhu Jayelakʼ tạmbureye boloyena, unre Hasorren raj Jabin ar Kenini Herobakʼ bõsrenko talare gate tahẽkana.

¹⁸ Ar Jayel do tạmbu khone oḍokente Sisera hoho adeteye metadea, “E baba, dela bhitrite bolokʼme; ar alom botorokʼa.” Onate Sisera do uniyakʼ tạmbuteye boloyena ar Jayel do kombolte uniye oyo poṭomkedea.

¹⁹ Siserae menkeda, “Dakʼ tetaṅedeń kana, den thoṛa ńũ ocoyińme.” Jayel do toa reakʼ kum jhicʼadeteye ńũ ocokedea ar tayomte arhõe poṭom dohṛakadea.

²⁰ Ona tayom Sisera do uniye metadea, “Am do tạmbu reakʼ duạr ṭhen teṅgokokʼme. Ar jãhãege hecʼkateye kulime bhitrire jãhãe menaea se baṅa enḍekhan menme, ‘bạnuiya.’ ”

²¹ Sisera doe laṅga akan tahẽkante onḍegeye jạpitʼkeda. Unre Jayel do tạmbu reakʼ mitʼṭecʼ khil ar hạtuṛe hataokeda. Ar hape hapete senkate Siserawakʼ cạndire onae kuṭạm bitʼadea ar ona do otre bitʼ hapeyena. Ar onate Sisera doe gocʼena.

²² Barak do Sisera sendra sendrate onḍeye seṭerena. Unre Jayel do uni hoho ạguiye lạgitʼ bahrete oḍok hecʼenteye menkeda, “Dela hijukʼme, okoeyem sendra baṛayedekan uniń udukʼama.” Barak do uni sãote bhitrite boloyenteye ńelkedea Sisera doe gocʼakana ar uniyakʼ cạndire tạmbu reakʼ khil do bolo akana.

²³ Enhilokʼ Isor do Kananikoren Jabin raj Israelko tabereye ạgukedea.

²⁴ Ar uni upạrte din din Israelko doko daṛe idiyena ar mucạtʼre uniko marao giḍikadea.