Bikʼcạrko 3 - সান্তালী বাইবেল

¹ Okoe Israelko Kanan disạmre lạṛhại reakʼ cetʼge bako baḍaekan tahẽkan onko biḍạu aṭkarko lạgitʼ Probhu Isor do adom adom jạtrenko disạm talaregeye dohokatʼkoa.

² Israel hoponko okoe do tishõ bako lạṛhại akan onkoakʼ lạṛhại babotre cetʼako lạgitʼ uni do noae nonkaleda.

³ Onko jạtrenko doko hoyokʼ kana, Philisṭiko ar onkoren mõṛẽ goṭen raj, Kananrenko ar Sidonrenko ar Hiwiko. Bakʼal-hermon buru khon ehopʼkate Homat hạbicʼ Lebanon reakʼ oka buru ṭoṭhako menakʼ onakorege Hiwiko doko tahenkan tahẽkana.

⁴ Probhu Isor do Mose hotete onkoren hapṛamko okae hukumatʼko tahẽkan ona do Israel hoponkoko manao idiya se baṅa ona biḍạu ạtkarko lạgitʼ iạtege noko jạtrenkoe doholetʼkoa.

⁵ Ona iạte Israelko do Kananiko, Hittiko, Amoriko, Pherisiko, Hiwiko ar Jebusiko talare girobasokʼko ehopʼena.

⁶ Onko do onkoren kuṛikoko baplayetʼko tahẽkana ar ako hõ akoren kuṛiko onkoren koṛako lạgitʼko emokʼkan tahẽkana ar onkoren debotakoko sewawako kan tahẽkana.

Othniyel reaṅ

⁷ Ar Israelko do Probhu Isorakʼ mẽtʼre oka bạṛicʼakʼkan onage kạmiko ehopʼena. Onko do akoren Probhu Isorko hiṛińkedete Bakʼal debota ar Asera debi sewawaeko ehopʼena.

⁸ Ona iạte Probhu Isor do Israelko cetanreye edre seṅgelena ar Aram-Nahrayimren raj Kusan-Risithayimakʼ tire onkoe jimạketʼkoa. Ar onko do irạl bochor uni tabereko tahẽyena.

⁹ Menkhan Israelko do Probhu Isorko rakʼade khan onko lạgitʼ mitʼṭen babańcaoicʼe teṅgowatʼkoa. Uni doe hoyokʼkana Kenas hopon Kaleb bokot Othniyel.

¹⁰ Probhu Isorren Jiu do uni cetanreye hecʼena ar uni do Israelkoren raje hoyena. Uni do tinre lạṛhại lạgitʼe oḍok senena unre Probhu Isor Aramren raj Kusan-Risithayim do uniyakʼ tireye jimạkedea, ar onate uni doe bhagaokedea.

¹¹ Kenas hopon Othniyelakʼ gujukʼ hạbicʼ disạmre pon gel bochor suluk tahẽkana.

Ehud reaṅ

¹² Israel hoponko do Probhu Isorakʼ mẽtʼre oka bạṛicʼakʼkan onage arhõ kạmiko ehopʼena. Onate Probhu Isor do Israel hoponko upạrte Moabren Eglon raje daṛe ocokedea.

¹³ Eglon raj do Amoniko ar Amalekiko soṅgekate Israelkoe akromonketʼkoa ar khijur nagrahae hatkeda.

¹⁴ Israelko do gel irạl bochor Moab raj Eglonakʼ tabereko tahẽyena.

¹⁵ Inạ tayom Israelko do arhõ Probhu Isor ṭhenko rakʼkeda ar uni do onko lạgitʼ Ehud ńutuman mitʼṭen babańcaoicʼe teṅgowatʼkoa. Uni doe tahẽkana Benjạmin gusṭiren Gera hopon. Uni do leṅgṛageye tahẽkana. Ar Israelko do Moabren raj Eglon ṭhen raj bheja emokʼ lạgitʼko kolkedea.

¹⁶ Uni do banar secʼ dharanakʼ mitʼ moka jeleń mitʼṭecʼ chorae benao ocokeda ar acʼakʼ kicricʼ latarre jojomsa bulureye bedhaoana.

¹⁷ Ar senkate Moabren raj Eglon do bhejae emadea. Menkhan Eglon raj do moṭa hoṛe tahẽkana.

¹⁸ Raj bheja em tayom okoe do bhejako ạguletʼ onko hoṛ doe bidạkatʼkoa,

¹⁹ Menkhan acʼ do Gilgal ṭhenakʼ rokʼ akatʼ dhiriko hạbicʼ senkate ruạṛ hecʼenteye menkeda, “E raj, mitʼṭecʼ katha mementeakʼ menakʼtińạ.”

²⁰ Unre raj do coṭ dolan reaṛ kandhare eskargeye duṛupʼ akan tahẽkana, ar Ehud do uni ṭhen senkateye menkeda, “Mitʼṭecʼ khobor menakʼa; ona do Isor ṭhen khonge hecʼakana.” Niạ katha ańjomkate raj do duṛupʼ khone beretʼena,

²¹ ar Ehud do leṅga tite acʼakʼ bulu khon chora or oḍokkate rajakʼ lacʼe bhoskaoketʼtaea.

²² Sasapʼakʼ sudhạ chora do lacʼre boloyente itilre aṭkaoena, ar Ehud do chora bae or bocʼleda. Ona chora do tayom secʼ thoṛa oḍok akan tahẽkana.

²³ Ona tayom Ehud do pinḍạreye oḍokena ar duạre sińketʼteye kulupkada.

²⁴ Ehud sen tayom kạmiyạko hecʼkateko ńelkeda cetan kandha reakʼ duạr do kulupgea. Onko doko hudiskeda khạṭige uni do bhitri oṛakʼte icʼjoṅe boloakana.”

²⁵ Onko do ḍher ghạṛicʼko koyokʼ horkeda, menkhan enhõ duạr bae jhicʼetʼte onko do lajao dea giḍikate choṛan ạgukate duạrko jhicʼkeda. Arko jhicʼketʼ khan onkoren mạlik do gocʼge otre bhindạṛ akanko ńelkedea.

²⁶ Kạmiyạkoko koyokʼ hor akatʼ oktere Ehud doe ńir pharakente rokʼ akatʼ dhiriko paromkate Seyirateye seṭerena.

²⁷ Onḍe Ephrayim reakʼ buru ṭoṭhare sakwae oroṅketʼ khan Israelko do uni sãote buru khon latarteko pheḍ hecʼente uniko pańja idikedea,

²⁸ ente uni doe hukumatʼko tahẽkana, “Ińpe pańjayińa; ente Probhu Isor do aperen bạiri Moabrenko apeakʼ tireye jimạ akatʼkoa.” Onate onko do uniko pańja idikedea ar oka jaega secʼte jordan gaḍa taṛam paromokʼ onako jaegakoko dokholkeda. Ar okoe hõ onako jaega secʼte bako parom ocowatʼkoa.

²⁹ Unre onko do gel hajar Moabikoko gocʼketʼkoa. Noko Moabiko do jotoge daṛeankoko tahẽkana, menkhan onkoren okoehõ bako ńir bańcao daṛeada.

³⁰ Ar enhilokʼ Moab disạm do Israelkoakʼ hatre hecʼena, ar irạlgel bochor hạbicʼ disạmre suluk tahẽyena.

Samgar reaṅ

³¹ Ehud tayom do Anatren hopon Samgar onkoren raje hoyena. Uni do ḍaṅgra gupi ṭheṅgate Philisṭikoren turui sae hoṛe gocʼketʼkoa. Uni hõ Israelkoe rukhiyạletʼkoa.