Bikʼcạrko 21 - সান্তালী বাইবেল

Benjaminrenkoakʼ bapla reakʼ bebosta

¹ Israelko do Mispare kiriạkateko menkeda, onko modre okoe hõ Benjamin gusṭiren hoṛko sãote akoren kuṛiko bako baplakoa.

^2-3 Ar onko do Bethelte senkate Probhu Isor samaṅre duṛupʼkate ạyupʼ hạbicʼ ãṭ aṛaṅte rakʼateko menkeda, “E Probhu, Israelkoren Isor, Israelko talare cedakʼ nonka do hoyena? Cedakʼ teheń do Israelko tala khon mitʼṭen gusṭirenko doko atʼena.

⁴ Dosar hilokʼ ạḍire hoṛko do mitʼṭecʼ pinḍko benaokeda ar jeredokʼ samaṅokʼakʼ ar sulukren samaṅokʼakʼko samaṅkeda.

⁵ Mispare onko do mitʼṭecʼ kajakko kiriạyena, ona do noage je, Mispare Probhu Isor samaṅre jãhãege bae hạjirokʼ enḍekhan uni do khạṭigeye gocʼ ocokʼa. Ar onate onko do apan ạpin kupulikʼko ehopʼena, “Israelren sanam gusṭiko khon okoe Mispate Probhu Isor samaṅre bako hecʼakana?”

⁶ Onko do onkoren boeha Benjaminrenko lạgitʼ duk kateko menkeda, “Israelko tala khon teheń mitʼṭen gusṭiren doko thoṛayena.

⁷ Menkhan okoe sarecʼko tahẽyen onkoakʼ do cetʼlekate bapla reakʼ bon bebostaea? Abo ma Probhu Isor ńutumte bon kiriạ akan, aboren kuṛiko onkoren koṛako sãote babon baplakoa mente.”

⁸ Onko do mitʼ hoṛ armitʼ hoṛko kuliyana, “Israel gusṭiko modre cetʼ nonkan jãhãe hoṛ menaea, okoe do Mispare Probhu Isor samaṅre bae hạjir akan?” Unreko baḍaekeda, Jabes Gilead khon do celege onḍe bako senakana,

⁹ ente hoṛ lekhako jokhecʼ Jabes Gileadren jãhãe hoṛge onḍe do bako ńamlena.

¹⁰ Onate onkoren daṛean lạṛhại birko mod khon gelbar hajar hoṛko kolkatʼkoa jemon onko do Jabes Gileadre senkate kạṭicʼ gidrạko ar maejiuko sudhạ sanam hoṛko gocʼko.

¹¹ Onkoko menkeda, “Ape do mitʼke mitʼ herel hopon ar okoe do kũạri kuṛiko baṅkan nonkan mitʼke mitʼ maejiuko hõpe gocʼkoa.”

¹² Onko bir do Jabes Gileadren hoṛko modre ponsae kũạri kuṛiko ńamketʼkoa; ar onko do Kanan disạmre menakʼ Silo reakʼ ḍerateko idiketʼkoa.

¹³ Inạ tayom onko jarwa akan Israelko do Rimon burute hoṛ kolkate Benjaminrenko sãote kathako roṛkeda ar sulukokʼko jạhirkeda.

¹⁴ Nonkate Benjạminrenko doko ruạṛ hecʼena. Ar Jabes Gileadre jiwetʼ dohoakatʼko kuṛiko sãote onkoakʼ bapla hoyena, menkhan kuṛikoakʼ lekha do thoṛayena.

¹⁵ Hoṛko do Benjaminren gusṭiko lạgitʼ dukokʼko ehopʼena, ente Probhu Isor do Israel gusṭiko talare mitʼṭecʼ phaṭole dhorao akatʼ tahẽkana.

¹⁶ Onkoren murubbiko doko menkeda, “Benjạminren maejiuko doko marao ocoakana. Ar ńitokʼ okoeko herel hoṛko jiwetʼ doho ocoakan onko baplako lạgitʼ abo do okare kuṛi bon ńamkoa?

¹⁷ Israelko tala khon mitʼṭen gusṭiren jemon aloko meṭao utạrokʼ onate jiwetʼ menakʼko Benjạmin bõsren rukhiyạko hoyokʼa.

¹⁸ Aboren kuṛiko do onko tulucʼ babon bapla daṛeako, ente bon kiriạ akana, jãhãege Benjạminrenko lạgitʼ acʼren hoponerae emokʼ enḍekhan uni do sarapanicʼe hoyokʼa.”

¹⁹ Ona tayom onkoko menkeda, “Jao bochor Silore Probhu Isor ńutumte mitʼṭecʼ porob hoyokʼa.” Ar Silo nagraha do Bethel utạr secʼakʼ okaṭakʼ hor do Bethel khon Sikem secʼ calao akan ona purub ar Lebona khon dạkhin secʼre menakʼa.

²⁰ Onko do Benjaminrenko niạ sopolhako ematʼkoa, “Ape do senkate darkha khetre tãṛãkʼ akan tahenpe ar ạribạndhipe.

²¹ Ar onḍenko kuṛi do tinre enecʼ lạgitʼko oḍok hijukʼa unre ape mimitʼko darkha khet khon oḍok kate onko mod khon okoepe kusiyako onkope or idikoa ar Benjạmin ṭoṭhatepe calakʼa.

²² Ado tinre onkoren apat se boehako ale ṭhen lạlis lạgitʼko hijukʼa unrele metakoa, ‘onko kuṛiko do dan alepe ar alere dayakʼpe. Lạṛhại jokhecʼ onko lạgitʼ kuṛiko do bale ńamletʼkoa. Niạ babotre apeakʼ jãhãn dos do bạnukʼa, ente ape apnarte aperen kuṛiko bape emakana.’ ”

²³ Onate Benjạminreko doko onkakeda. Ar kuṛiko tinreko enejokʼ kan tahẽkana unre onko baplako lạgitʼ mitʼ hoṛkateko sapʼ idiketʼkoa. Ona tayom onko do apnarakʼ jaegate ruạṛ senkate ato ar nagrahako benaokeda ar girobasokʼko ehopʼena.

²⁴ Inạ tayom Israelko do ona jaega bạgiyatʼte akoakʼ gusṭi ar bõsrenkoakʼ jaegateko calaoena.

²⁵ Unre hõ Israelko talare cele rajge bako tahẽkana. Ar okoe oka bhageye hudisetʼ tahẽkan onkageko kạmikan tahẽkana.