Bikʼcạrko 20 - সান্তালী বাইবেল

Benjạmin gusṭirenko sãote Israelkoakʼ lạṛhại

¹ Inạ tayom Gileadren Israelko ar Dan khon Ber-seba hạbicʼ sanam jaegaren hoṛko oḍokʼ hecʼena ar Mispare Probhu Isor ṭhenko jarwayena.

^2-3 Niạ katha do Benjamin gusṭiren hoṛko ańjom tiyokʼkeda. Ar Isorren okoeko hoṛko jarwayen onko modre Israel gusṭikoren sanam mukhiyạko ar pon lakh tarwaṛe cakʼlao hoṛko tahẽkana. Onko do baḍae sanaketʼkoa, ona hirkhạwakʼ kạmi do cekate hoyena.

⁴ Unre Liwi gusṭiren onko hoṛ do, metakʼme gocʼ ocoakan maejiuren jãwãeye menkeda, “Iń ar ińren bạhu do Benjamin ṭoṭha reakʼ Gibeare ńindạ liń tahẽkana.

⁵ Ńindạ jokhecʼ Gibearen hoṛ do iń sendrayiń lạgitʼ oṛakʼko gheraokeda. Onko do iń gojeńko menleda, menkhan ona bodolte ińren chuṭki era tulucʼ jorkateko laṭghaṭkeda, ar onate uni doe gocʼena.

⁶ Israelko talare nonkan bạṛicʼ ar hirkhạwakʼko kạmi akatʼte ińren chuṭi era doń phạṛikedea ar Israelkoakʼ gelbar goṭecʼ jaegare ona doń kolkeda.

⁷ Ńitokʼ do E Israelko, niạ babotre sopolhakate mitʼṭecʼ roṛ ruạṛ imạńpe.”

⁸ Noate sanam hoṛ mitʼ domte teṅgoyenteko menkeda, “Okoe hõ oṛakʼte do babon calakʼa; ar aboko modre mitʼhoṛ hõ babon ruạṛa.

⁹ Abo do gulibãṭkate Gibearen hoṛko upạrte bon rakapʼ calakʼa.

¹⁰ Israelkoren sanam gusṭiko mod khon mimitʼ mitʼsae hoṛ khon gel hoṛ, hajarko khon mitʼsae ar gel hajar khon mitʼ hajar hoṛ bon bachaokoa. Onko do senkate lạṛhại phạdko lạgitʼ jomakʼko ạguiya; ar abo do Benjamin ṭoṭha reakʼ Gibeate senkate Israelko talare oka hirkhạwakʼko kạmi akatʼ ona reakʼ bon halawakoa.”

¹¹ Onate Israelkoren eṭakʼ eṭakʼ gusṭiren hoṛko do mitʼdomte jarwakate Gibea upạrteko teṅgoyena.

¹² Onko do Benjamin ṭoṭha reakʼ sanam jaegare hoṛ kolkateko kuliyana, “Apeko modre nonkan bạṛicʼakʼ kạmi do cekatepe kạmikeda?

¹³ Gibearen onko bạṛicʼ hoṛ do aleakʼ tire jimạkope jemon onkole gocʼkote Israelko tala khon hirkhạwakʼle ocokʼ giḍikakʼ. Menkhan Benjaminrenko do akoren Israel boehakoakʼ katha bako luturada.

¹⁴ Onko do Israelko sãote lạṛhại lạgitʼ akoakʼ nagraha ar atoko khon oḍokkate Gibeare senkateko jarwayena.

¹⁵ Enhilokʼ onko do akoakʼ atoko ar nagraha khon bargel turui hajar lạṛhại phạdko jarwaketʼkoa. Ona chaḍa onko sãote Gibearen eae sae tarwaṛe calaokoko tahẽkana.

¹⁶ Sanam lạṛhại phạdko modre eae sae leṅgṛa hoṛko tahẽkana okoe do gạkhuṛ salakʼ ginḍwạri hotete dhiriko capatʼ daṛeakʼkan tahẽkana.

¹⁷ Israelren sarecʼ lạṛhại phạdkoakʼ lekha do pon lakh tahẽkana. Onko do sanamkoge lạṛhạire ạḍi gạkhuṛko tahẽkana.

¹⁸ Onko do Bethelre senkate Isor ṭhen khon baḍae sanaketʼkoa Benjạminrenko upạrte lạṛhại lạgitʼ onko modre okoe do lahateye rakapʼ calakʼa. Probhu Isor doe baḍae ocoketʼkoa, Jihudạ gusṭirenko sen maṛaṅokʼa.

¹⁹ Dosar hilokʼ setakʼre beretʼkate Israelko do Gibea ṭhenko ḍerayena.

²⁰ Ona tayom onko do Benjaminrenko sãote lạṛhại lạgitʼko oḍokente onḍe onko upạrte lạṛhại phạdko sapṛaoketʼkoa.

²¹ Ar Benjaminrenko do Gibea khonko oḍok hecʼena ar enhilokʼ bargel bar hajar Israelko gocʼketʼkoa.

^22-23 Unre Israelko do senkate ạyupʼ hạbicʼ Probhu Isor ṭhen rakʼateko menkeda, “Ale do cetʼ aleren boeha Benjaminko upạrte arhõ lạṛhại lạgitʼle rakapʼ calakʼa?” Probhu Isor doe roṛ ruạṛatʼkoa, “Do calakʼpe.” Ar noa iạte Israelren lạṛhại phạdko do dil salakʼ pạhil din oka jaegareko lạṛhại len onḍege arhõ lạṛhại lạgitʼko sapṛaoena.

²⁴ Dosar hilokʼ onko do Benjạmin gusṭiren upạrteko laha idiyena.

²⁵ Ar Benjạminrenko hõ onko tạkicʼ daramko lạgitʼ Gibea khonko oḍokente arhõ gel irạl hajar Israelkoko gocʼketʼkoa. Onko sanamkoge tarwaṛe calao lạṛhại phạdko tahẽkana.

²⁶ Unre Israelren sanam hoṛ do arhõ Bethelte senkate Probhu Isor samaṅre duṛupʼkate rarakʼko ehopʼena. Enhilokʼ onko do ạyupʼ hạbicʼko upạskeda ar Probhu Isor ńutumte jeredokʼ ar sulukren samaṅokʼakʼko samaṅkeda.

^27-28 Onako dinre Isorakʼ bebosta sinduk do Bethelrege tahẽkana, ar Aronren goṛomtetʼ koṛa, metakʼme Eliaser hopon Pinhas do ona samaṅre teṅgokateye sewayetʼ tahẽkana. Ona iạte Israelko do onḍe Probhu Isorakʼ sana baḍae lạgitʼko kuliyana, “Ale do aleren boeha Benjamin gusṭiren upạrte arhõ lạṛhại lạgitʼle calakʼa se baṅa?” Probhu Isore roṛ ruạṛatʼkoa, “Do calakʼpe, ente gapage apeakʼ tire onkoń jimạkoa.”

²⁹ Unre Israelko do Gibea beṛhaete akoren lạṛhại phạdko oko dohokatʼkoa.

³⁰ Tesar hilokʼ sarecʼ lạṛhại phạdko do Benjạminrenko sãote lạṛhại lạgitʼ lahate leka Gibea ṭhenko sapṛaoketʼkoa.

³¹ Ar Benjạminreko do Israelko daramko lạgitʼ nagraha khon sạṅgińteko senena. Onko do lahate lekage Israelko gocʼketʼkoa. Onate Bethel ar Gibea secʼ okaṭakʼ hor calao akan onare pegel hoṛko gocʼena.

³² Onate Benjaminrenko menkeda, “Lahate lekage bon bhagaoetʼkoa.” Ar Israelkoko menkeda, “Dela bon pạcokʼma, enḍekhan nagraha bahreko oḍok hijukʼte horte bon idikoa.”

³³ Ona tayom Israelren lạṛhại phạdko do akoakʼ jaega khon ocokʼente Bakʼal-Tamarre lạṛhại lạgitʼko sapṛaoena. Ar Israelren oko akan lạṛhại phạdko do akoakʼ jaega khon, metatʼme Mare Gebako bạgiyatʼte onḍe khonko oḍok hecʼena.

³⁴ Unre Israelren gel hajar bachao hoṛko do Gibea reakʼ samaṅ secʼ lạṛhạiko ehopʼena, ar onate ạḍi kajak lạṛhại hoyena; menkhan Benjaminren do bako bujhạu daṛeada, onkoakʼ maraokʼ do sorakana mente.

³⁵ Probhu Isor do enhilokʼ Israelkoakʼ tire Benjamin gusṭirenkoe jimạketʼkoa ar onko do bargel mõṛẽ hajar mitʼsae Benjaminren hoṛko gocʼketʼkoa. Onko sanamkoge tarwaṛe calaokoko tahẽkana.

³⁶ Inạ tayom Benjaminrenko bujhạu daṛeada, onko doko haraokʼkana mente. Ar Gibeare okoe phạdko oko akan tahẽkan onko cetanre bhorsakatege Israelko do Benjạminrenko samaṅ khonko pạclena.

³⁷ Ar oko akan tahẽkan lạṛhại phạdko do ackage Gibea upạrte jhãpko emkeda ar nagrahare bolokate sanam hoṛko gocʼketʼkoa.

^38-39 Onkoko tãṛãkʼ akan tahẽkan lạṛhại phạdko sãote Israelkoren eṭakʼ lạṛhại phạdko do niạ cinhạko ṭhik dohoakatʼ tahẽkana, nagraha khon cetante dhũạ rakabokʼko ńel lekhan jemonko ạcur ruạṛokʼa.

⁴⁰ Menkhan onkoakʼ nagraha khon tinre khunṭi leka dhũạ do coṭte rakabokʼ ehopʼena unre onko do ạcurkateko ńelkeda, goṭa nagraha khon dhũạ do coṭte rakabokʼ kana.

⁴¹ Ar unre Israelko doko ạcur ruạṛena ar ona iạte Benjaminrenko do ạḍi botor caṛhaoatʼkoa. Onkoko bujhạu daṛekeda, ako cetanre maraokʼ do seṭerena mente.

⁴² Ar onate onko do Israelko samaṅ khon hahaṅkar secʼ dạṛ pharakokʼko ehopʼena, menkhan lạṛhại khon rehae do bako ńamleda. Eṭakʼ Israelko do nagraha ar atoko khonko oḍok hecʼente onḍege onkoko gocʼketʼkoa.

⁴³ Onko do Benjạminren hoṛko khudạu idiketʼkoa ar Gibea purub secʼ akoakʼ jirạukʼ jaegareko gocʼketʼkoa.

⁴⁴ Onate Benjạminren gel irạl hajar lạṛhại phạdko gocʼena. Onko sanamkoge daṛean lạṛhại phạdko tahẽkana.

⁴⁵ Ar Benjaminren sarecʼko do ạcurkate hahaṅkar reakʼ Rimon buru secʼko dạṛkeda ar Israelko do horrege onkoren mõṛẽ hajar hoṛko gocʼketʼkoa. Ona tayom hõ Israelko do gidom hạbicʼko khudạu idiketʼkote arhõ bar hajar hoṛko gocʼketʼkoa.

⁴⁶ Enhilokʼ jotote bargel mõṛẽ hajar Benjaminren lạṛhại phạdko gocʼocoyena. Onko sanamkoge bhage lạṛhại phạdko tahẽkana.

⁴⁷ Menkhan Benjaminren turui sae hoṛ do hahaṅkar reakʼ Rimon buruteko ńir paskaoena ar pon cando onḍegeko tahẽyena.

⁴⁸ Ar Israelko do ruạṛkate Benjạminren sarecʼ sanam hoṛko gocʼketʼkoa ar nagraha ar atore onkoren jãhãegeko ńamketʼko onko jotogeko gocʼketʼkoa. Onko do nagraha ar atote bolokate seṅgelte jotowakʼko jeretʼ giḍikada.