Bikʼcạrko 2 - সান্তালী বাইবেল

Bokim ṭhen Probhu Isorren goḍet

¹ Probhu Isorren goḍet do Gilgal khon Bokimre hecʼkate Israelkoe metatʼkoa, “Iń do Misor disạm khoniń oḍok ạgu akatʼpea ar oka disạm emape lạgitʼ aperen hapṛamko ṭheniń gokʼletʼ ona disạmteń ạgu akatʼpea. Ińiń menakada, ‘ape lạgitʼ oka bondobosiń dohoakatʼ ona do tishõ bạń rạpuda.

² Ape do noa disạmren hoṛko tulucʼ jãhãnakʼge bondobos alope dohoya ar onkoakʼ pinḍkope rạputʼ giḍikatakoa.’ Menkhan ape do ińakʼ katha bape bataoleda. Cekate nonka dope kạmikeda?

³ Ona iạte ńitokʼ iń metape kana, ape ṭhen khon noko hoṛ do ar bạń laga oḍokkoa; onko do ape lạgitʼ jhampa lekako hoyokʼa, ente onkoren debotakoakʼ jhạlirepe paṛaokʼa. ”

⁴ Probhu Isorren goḍet do tinre Israelko ṭhen niạko kathae menkeda unre onko do ãṭ aṛaṅte rarakʼko ehopʼena.

⁵ Ar ona jaega reakʼ ńutum do Bokimko dohokeda (metakʼme “Rakʼjoṅ”). Probhu Isor ńutumte onḍe onko do janwar samaṅokʼakʼko samaṅkeda.

Bebatao arko bhagao ocokʼkan

⁶ Josuạ do Israelkoe bidạ baṛaketʼko khan onko do apan ạpin hĩs reakʼ jaega dokhol lạgitʼko calaoena.

⁷ Josuạ tinạkʼ din jiwetʼe tahẽkan ar ona tayom dinkore okoe murubbiko jiwetʼko tahẽkan unạkʼ din Israelko do Probhu Isorko sewawadea. Israelko lạgitʼ Probhu Isor oka bhageakʼkoe kạmiletʼ ona do onkoren murubbiko ko ńelleda.

⁸ Ar Probhu Isorren guti Nunren hopon Josuạ do mitʼsae gel bochor umerreye gocʼena.

⁹ Ar Timnat-heres ńutumanakʼ mitʼṭecʼ jaegareko topakedea. Ona jaega do Ephrayim gusṭirenkoakʼ buru ṭoṭha reakʼ Gas buru utạr secʼre tahẽkana.

¹⁰ Josuạ okteren Israelko do gocʼente akoren hapṛam ṭhenko calaoen khan onkoakʼ jaegare onkoren hoponkoko hecʼena. Onko do Probhu Isor bako baḍae akade tahẽkana ar Israelko lạgitʼ Probhu Isor okakoe cekaletʼ ona hõ bako baḍaekan tahẽkana.

¹¹ Ar Probhu Isorakʼ mẽtʼre oka bạṛicʼakʼ kan onageko kạmiyetʼ tahẽkana. Onko do Bakʼal debotako sewawae kan tahẽkana.

¹² Onkoren hapṛamkoren Probhu Isor, okoe do Misor disạm khone oḍok ạguletʼko tahẽkan uni do jaogeko bạgiyaekan tahẽkana. Onko do ako beṛhaeten jạtren eṭakʼ eṭakʼ debota secʼko ạcurokʼkan tahẽkana arko pujạwako kan tahẽkana, ar onkate Probhu Isorakʼ pitko caṛhao ocoyetʼ tahẽkana.

¹³ Ar nonkate onko do Probhu Isor bạgikate Bakʼal debota ar Asṭoret debiko sewawae kan tahẽkana.

¹⁴ Ona iạte Probhu Isor do Israelko luluṭkoakʼ tireye jimạyetʼko tahẽkana. Onko do onkoakʼ jiniskoko luṭetʼ tahẽkana. Uni do onkoren beṛhaeten bạiriakʼ tireye jimạyetʼko tahẽkana, ar onate bạiriko upạrte bako teṅgo daṛeakʼkan tahẽkana.

¹⁵ Israel hoponko tinre lạṛhạiko oḍok senokʼkan tahẽkana unre Probhu Isor okae kiriạ akan tahẽkan onkage uniyakʼ ti do onkoakʼ bhạlại alo hoyokʼ lạgitʼ onko upạrteye tahenkan tahẽkana, ar maraṅ muhin talareko paṛaokʼkan tahẽkana.

¹⁶ Unre Probhu Isor do onko talare disạm cakʼlaokoe teṅgoyetʼko tahẽkana. Onko do luluṭko reakʼ ti khon Israelkoko rukhiyạyetʼko tahẽkana,

¹⁷ Menkhan enhõ Israel hoponko do disạm cakʼlaokoakʼ katha bako luturakʼkan tahẽkana. Probhu Isor cetanre pạtiạu doho baṅkate debotako cetanre apnarko ṭehãḍokʼkan tahẽkana arko sewawako kan tahẽkana. Onkoren hapṛamko Probhu Isorakʼ oka horteko taṛametʼ tahẽkan ona hor khon thoṛa ghạṛicʼ khangeko ghańjeṛokʼ kan tahẽkana.

¹⁸ Probhu Isor do tinre onko lạgitʼ jãhãe disạm cakʼlaoyicʼe teṅgoyetʼko tahẽkana unrege uni do onko tulucʼe tahenkan tahẽkana. Ar disạm cakʼlaoyicʼ tinạkʼ din jiwetʼe tahenkan tahẽkan unạkʼ din bạirikoakʼ ti khon Israelkoe rukhiyạyetʼko tahẽkana. Onko do santao iạte tinreko rakʼetʼ tahẽkana unre Probhu Isor do onko cetanreye dayakʼ kan tahẽkana.

¹⁹ Menkhan disạm cakʼlaokoko gocʼlen khan hoṛko do arhõ debota secʼko lawerokʼkan tahẽkana arko sewawako kan tahẽkana ar hapṛamko khon hõ bạṛicʼakʼ horteko taṛametʼ tahẽkana. Onko do okalekate hõ bạṛicʼakʼ hor ar bạṛicʼ hewa bako bạgiyakʼkan tahẽkana.

²⁰ Ona iạte Probhu Isor do Israelko cetanre edreteye menkeda, “Nokoren hapṛamko okaṭakʼ iń bondobosatʼko tahẽkan ona do noko bako manao akada ar ińakʼ katha hõ bako ańjom akada.

²¹ Ona iạtege Josuạwakʼ gujukʼ oktere okoe jạtrenko disạmreko tahẽkan onko do Israelko samaṅ khon bạń laga ńirkoa.

²² Ar akoren hapṛamko leka ińakʼ horteko calakʼa se baṅa ona do noko jạtrenko hoteteń biḍạukoa.”

²³ Probhu Isor do noko jạtrenko soṅge soṅgete bae laga ńirletʼkoa ar onko do disạmregeye dohokatʼkoa. Uni do Josuạwakʼ tire bae jimạletʼkoa.