Bikʼcạrko 19 - সান্তালী বাইবেল

Mitʼṭen Liwi ar uniren chuṭki era

¹ Israelko talare tinre cele rapajge bako tahẽkanre mitʼṭen Liwi hoṛ do Ephrayim buru ṭoṭhareye girobasokʼkan tahẽkana. Uni do Jihudạ reakʼ Bethlehem atoren mitʼṭen chuṭki erae ạguan tahẽkana.

^2-3 Uni chuṭki era do loṭghuṭi iạteye bạgi ocoyen khan acʼren apatakʼ oṛakʼ Bethlehemteye ruạṛ calaoena. Uni do onḍe pon candoe tahẽyen khan uniren jãwãetetʼ do ruạṛ ạguiye lạgitʼte senena. Ar uni sãote acʼren guti koṛa ar mitʼ joṛa gadha hõe idi toraketʼkinạ. Unre uni maejiu do acʼ apatakʼ oṛakʼteye idiketʼkinạ. Ar uniren hońhartetʼ hõ uniye ńelkede khan ạḍiye kusiyena.

⁴ Ar onḍe tahen lạgitʼte nehõradea. Onate uni Liwi do acʼren hońhartetʼakʼ oṛakʼre pe dine tahẽyena are jom ńũkeda.

⁵ Ado ponakʼ din ạḍi setakʼre beretʼkate ruạṛokʼ lạgitʼe sapṛaoena menkhan uniren hońhartetʼ doe menkeda, “Jom ńũi ben, ado ben calakʼa.”

⁶ Onate uni do jom lạgitʼe duṛupʼena. Ar hońhartetʼ doe menkeda, “Teheń ńindạ hõ tahen ben ar rạskạkʼ ben.”

⁷ Uni Liwi do calakʼ lạgitʼe sapṛaolenre hõ hońhartetʼe jormoṭkedete ona ńindạ hõ onḍegeye tahẽyena.

⁸ Ado mõṛẽakʼ din ạḍi setakʼre beretʼkate ruạṛokʼ lạgitʼe sapṛaoen khan acʼren hońhartetʼ doe menkeda, “Jom ńũi ben, ar ạyupʼ bela hạbicʼ tahen ben.” Ar unkin dokin jom ńũkeda.

⁹ Ona tayom Liwi do acʼren chuṭki era ar gutiyante tinre calakʼ lạgitʼe sapṛaoena unre hońhartetʼe menkeda, “Ńelben, ber doe khaṭogea are ạyubokʼ lạgidokʼ kana. Onate nonḍege tahen ben ar rạskạ joṅben. Ar gapa do ạḍi setakʼre beretʼkate abenakʼ oṛakʼte ruạṛben.”

^10-11 Menkhan uni hoṛ do onḍe tahẽ aṅgakʼ bae kusilena. Onate uni do gadhae palanketʼkinte acʼren chuṭki erawante onḍe khon ruạṛokʼe ehopʼena. Onko do tinre Jebusi, metakʼme Jerusalem sorko seṭerena unre bela doe hạsurokʼkan tahẽkana. Unre guti do acʼren kisạ̃ṛe metadea, “Dela bon, Jebusikoakʼ nagrahare senkate bon tahẽ aṅgakʼa.”

¹² Uniren kisạ̃ṛ doe roṛ ruạṛkeda, “Baṅa, okoe Israelko baṅkan onkoakʼ nagrahare do babon calakʼa. Abo do bickom Gibeare senkate bon tahẽ aṅgakʼa.”

¹³ Uni do arhõe menkeda, “Abo do Gibea baṅkhan Ramare seṭerokʼ bon kurumuṭuiya ar ńindạ do onakin nagraha reakʼ mitʼṭecʼte senkate bon aṅga hạṭińokʼa.”

¹⁴ Onate onko do calakʼtegeko tahẽyena. Ar Benjạmin ṭoṭha reakʼ Gibea ṭhenko seṭeren khan siń cando doe hạsurena.

¹⁵ Unre onko do aṅga hạṭińokʼ lạgitʼ hor bạgikate Gibeateko boloyena ar nagraha reakʼ kulhire senkateko duṛupʼena, menkhan ńindạ tahẽ aṅgakʼ lạgitʼ okoe hõ apnarakʼ oṛakʼte bako hoho aderletʼkoa.

¹⁶ Enhilokʼ ạyupʼ jokhecʼ Ephrayim buru ṭoṭharen mitʼṭen haṛam hoṛ do acʼakʼ khet khon kạmi baṛakate Gibeateye boloyena. Uni do ona nagraharegeye girobasokʼ kan tahẽkana, menkhan onḍenko hoṛ do Benjạmin gusṭiren hoṛko tahẽkana.

¹⁷ Ar nagraha reakʼ kulhire hortenkoe ńelketʼko khan uni haṛam hoṛ doe kuliketʼkoa, “Ape dope okoe kana ar oka khonpe hecʼakana?”

¹⁸ Uni hoṛe roṛ ruạṛkeda, “Ale do Jihudạ reakʼ Bethlehem khonle hecʼakana ar Ephrayim reakʼ buru ṭoṭhatele calakʼkana. Iń doń onḍenicʼkangea. Iń do Jihudạ reakʼ Bethlehemteń senlena ar ńitokʼ do Probhu Isorakʼ oṛakʼteń ruạṛ kana, menkhan okoe hõ akoakʼ oṛakʼte bolokʼ lạgitʼ do bako metadińa.

¹⁹ Aleren gadhakin lạgitʼ busupʼ ar lobokʼ hõ menakʼgea ar amren nui kạ̃ṛmĩ ar soṅgeten guti koṛa lạgitʼ piṭhạ ar darkha rasa hõ menakʼgea. Amren golam do ar cetʼ reakʼ jạruṛ hõ bạnukʼtalea.”

²⁰ Unre uni haṛam hoṛe menkeda, “Amakʼ suluk baṛe hoyokʼtam ma. Ar jãhãnakʼge jạruṛem bujhạu ona reakʼ bhar do ińre dohoyme. Menkhan ńindạ do niạ tala kulhire alope tahẽ aṅgakʼa.”

²¹ Noa menkate uni haṛam hoṛ do acʼakʼ oṛakʼteye idiketʼkoa ar onkoren gadhakoe jom ocoketʼkoa. Ar onko hõ ti-jaṅga ạbuk baṛakateko jom ńũkeda.

²² Ado khạtirjomako tahẽkanre nagraharen kharap hoṛko do hecʼkate ona oṛakʼko gheraokeda. Onko do silpiń ḍhae ḍhae dal baṛakate haṛam hoṛko metadea, “Okoe hoṛ amakʼ oṛakʼteye hecʼakan uni do ale ṭhen oḍok ạguiyem. Ale do uni sãotele loṭghuṭiya.”

²³ Unre oṛakʼren mạlik doe oḍokente onkoe metatʼkoa, “Baṅa, E boehako; nehõrokʼ kạnạń, nonkan bạṛicʼakʼ do alope kạmiya. Ente uni do ińren peṛa kanae; unire noa bạṛicʼ kạmi do alope kạmiya.

²⁴ Ińren kũạri kuṛi ar uni hoṛren chuṭi era nonḍe menakʼkinạ. Iń do ape ṭhen unkin geń oḍok ạgukinạ. Ape do unkin bạṛicʼkinpe ar apeakʼ oka monsubạ menakʼtape onage unkin cetanre kạmipe, menkhan nui hoṛ cetanre bạṛicʼakʼ jãhãnakʼ do alope cekaea.”

²⁵ Menkhan onko hoṛ do uniyakʼ kathare bako rạjilena. Unre Liwi hoṛ do acʼren chuṭki era sapʼkate bahrete onko ṭhene oḍok gotʼkadea. Onko do goṭa ńindạ jorkate uni tulucʼko laṭghaṭkeda ar uniyakʼ hoṛmo cetanre akoakʼ kusi lekako kạmikeda. Ona tayom onko do aṅga marsalokʼ jokhecʼko aṛakʼkadea.

²⁶ Unre uni maejiu do acʼren jãwãetetʼ okareye tahẽkan uni haṛamakʼ oṛakʼ reakʼ duạr ṭhen hecʼkateye sohor bhindạṛena. Ar cando ạuriye rakabokʼ hạbicʼ onḍege bhindạṛgeye tahẽkana.

²⁷ Ado setakʼ jokhecʼ uniren jãwãe do beretʼente mohnḍa lạgitʼ tinre silpińe jhicʼkeda unre acʼren chuṭki era duạr ganaḍere ti dohokate bhindạṛ akane ńel ńamkedea.

²⁸ Unre uniye metadea, “Beretʼme, dela bon calakʼa.” Menkhan jãhãn roṛ ruạṛ do bae ńamleda. Unre Liwi hoṛ do gadhare acʼren rinicʼtetʼe decʼkedete oṛakʼteye mohnḍayena.

²⁹ Ar oṛakʼ senkate uni do mitʼṭecʼ churi hataokate uniyakʼ jaṅko salakʼ gelbar ṭhecʼe getʼ kuṭrạkedea ar Israelkoakʼ sanam jaegareye kolkeda.

³⁰ Ar okoe onako ńelketʼ onko mimitʼkoko menkeda, “Israelko Misor khonko oḍok hecʼen hilokʼ khon teheń hạbicʼ nonkanakʼ kạmi do baṅ hoyakana ar ńel hõ baṅ ńel akana. Ape do niạ babotre hudispe, sopolhaepe ar cetʼ bon cekaea ona reakʼ lạipe.”