Bikʼcạrko 18 - সান্তালী বাইবেল

Mikạ ar Dan gusṭiren hoṛko

¹ Onako dinre Israelko talare cele rapajkoge bako tahẽkana. Ar Israel gusṭiko modre Dan gusṭiren hoṛko do unhạbicʼ hõ jãhãn sompottige bako dokhol daṛe akawan tahẽkana. Ar onate onko do girobasokʼ lạgitʼ mitʼṭecʼ jaegako sendra baṛayetʼ tahẽkana.

² Ona iạte Dan gusṭirenko do Sora ar Estaol khon akoren mõṛẽ goṭen bir banṭa hoṛ do khobor hatao lạgitʼko kolkatʼkoa jemon onko do mońj okocʼte disạmko ciyạ ạgu daṛeakʼ. Onate onko do bir banṭa hoṛko metatʼkoa, “Ape do disạm reakʼ mońjtepe ciyạ ạguitabona.” Onate onko hoṛ do Ephrayim reakʼ buru ṭoṭhate senkateko boloyena ar ńindạ do Mikạwakʼ oṛakʼreko tahẽ aṅgayena.

³ Unre onko do uni Liwi koṛawakʼ aṛaṅko oromketʼtaea. Ar bhitrite bolokateko kulikedea, “Nonḍe do okoeye ạgu akatʼmea? Ar am do nonḍe cetʼem ceka kana ar cedakʼ baṅem hecʼakan?”

⁴ Uniye menkeda, “Mikạ do iń lạgitʼ ḍhere kạmi akada. Uni do betonteye doho akadińạ ar uniren naekeń hoyakana.”

⁵ Onko do uniko metadea, “Dayakate am do Isor ṭhen khon baḍaeme aleakʼ dãṛãn do jo bahakʼtalea se baṅa.”

⁶ Naeke do onkoe roṛ ruạṛatʼkoa, “Ape do sulukte calao joṅpe; Ente Probhu Isorakʼ sana lekape senokʼ kana.”

⁷ Onko mõṛẽ hoṛ do unre onḍe khon Layisteko senena. Onkoko ńelkeda onḍenko hoṛ do Sidonrenko leka khạtirjoma, sulukte ar bin botorko girobasokʼ kana. Ona jaegare nonkan celege bạnukʼkoa, onko cetanre santaoko calao daṛeakʼ. Ona chaḍa onko do Sidonrenko khon hõ ḍher sạṅgińreko girobasokʼ kana ar eṭakʼ jãhãeko sãote jãhãn karbarge bạnukʼtakoa.

⁸ Onko mõṛẽ hoṛko do tinre Sora ar Estaolteko ruạṛ hecʼena unreko kuli ocoyena, “Ape do onḍe cetʼpe ńelkeda?”

⁹ Onkoko roṛ ruạṛkeda, “Oka jaegale ńel ạguketʼ ona do ạḍi mońjgea. Dela, abo do onko bon akromonkoa. Ape do cetʼ duṛupʼ hape akaepe tahena? Onḍe jaega dokhol do alope biloma.

¹⁰ Arpe senlen khangepe ńela, onḍenko hoṛ do mitʼṭecʼ maraṅ jaegare khạtirjomako girobasokʼ kana. Isor do apeakʼ tire ona jaegae jimạ akawatʼpea. Ar dhạrti reakʼ okaṭakʼ reakʼ okulạn hõ onḍe do bạnukʼ anaṅ.”

¹¹ Niạ katha ańjomkate Dan gusṭiren turui sae hoṛ do lạṛhại lạgitʼko sapṛaoente Sora ar Estaol khonko mohnḍayena.

¹² Horre onko do Jihudạ disạm reakʼ Kiriat-Jearim ṭhenko ḍerayena. Onate Kiriat-Jearim reakʼ pạchim secʼ do teheń hõ Mahane-Danko metakʼ kana (mane do “Danrenkoakʼ ḍera”).

¹³ Onḍe khon onko do Ephrayim reakʼ buru ṭoṭhateko rakapʼente Mikạwakʼ oṛakʼteko boloyena.

¹⁴ Ar okoeko hoṛ do Layisre senkate khoj khoborko ạguletʼ tahẽkan onko do akoren hoṛko metatʼkoa, “Apepe baḍaegea, niạ oṛakʼre do mitʼṭecʼ ehpod, debotakoakʼ muṭhạn rokʼ bekʼnao muṭhạnko ar dulakʼ muṭhạnko menakʼa? Onate ńitokʼ cetʼpe cekaea ma hudispe.”

¹⁵ Niạ katha ańjomkate onko do Mikạwakʼ oṛakʼren uni Liwi koṛawakʼ oṛakʼteko boloyena ar boge bạṛicʼ reakʼ khoborko hataokeda.

¹⁶ Ar Dan gusṭiren onko turui sae hoṛ do lạṛhại lạgitʼ oṛakʼte bolokʼ horre senkateko teṅgoyena.

¹⁷ Unre uni naeke do turui sae hoṛko sãote onḍeye teṅgo akan tahẽkana. Ar disạm reakʼ khoj khobor okoeko ạguletʼ onko mõṛẽ hoṛ do bhitrite bolokate goṛhon muṭhạnko, ephod, deb muṭhạnko ar dul muṭhạnkoko hataoketʼkoa.

¹⁸ Ar tinre Mikạwakʼ oṛakʼ khon onakoko oḍok ạguiyetʼ tahẽkana unre uni naeke doe metatʼkoa, “Noa do cetʼpe cekayeda?”

¹⁹ Uniko roṛ ruạṛadea, “Thirokʼme, ar moca betʼkate ale sãote hijukʼme; ar aleren naeke hoyokʼme ar aleren baba leka hoyokʼme. Mitʼṭen hoṛakʼ gharońjren naeke hoyokʼ khon Israelkoren mitʼ gusṭiren naeke hoyokʼge cetʼ baṅ bhagea?”

²⁰ Niạ katha ańjomkate uni naeke doe kusiyena. Uni do acʼtege ona ephod, deb muṭhạnko ar goṛhon muṭhạnkoante onko hoṛ sãoteye oḍok calaoena.

²¹ Ar hoṛko do akoren kạṭicʼ gidrạko, janwarko ar akoakʼ eṭakʼ eṭakʼ jinisko do akoren phạdkoakʼ lahare dohokate onḍe khonko uṭhạuena.

²² Mikạwakʼ oṛakʼ khon thoṛa sạṅgiń ńokʼko senen khan Mikạ do aḍepaseren hoṛko mitʼ ṭhene jarwaketʼkoa. Ar ona tayom do Dan gusṭirenkoe sen tiyokʼketʼkoa.

²³ Onko do Dan gusṭiren hoṛko tayom tayomte ãṭ aṛaṅte hohoko ehopʼena. Unre Dan gusṭiren hoṛko do ạcurente Mikạko metadea, “Cetʼ hoyakante, lạṛhại lạgitʼ hoṛkom jarwayetʼkoa?”

²⁴ Mikại roṛ ruạṛatʼkoa, “Ape do aleren boṅgako ar aleren naeke hõpe idi torayedekana. Inạ tayom aleakʼ do ar cetʼ tahẽyena? Ar cekatepe meneda, cetʼ hoyakantama?”

²⁵ Dan gusṭiren hoṛko menkeda, “Am do jãhãnakʼ kathage alom roṛa. Nonḍe nonkan etaṅ cạndiyan hoṛ menakʼkoa onko do amakʼ katha ańjomkateko hạn botecʼmea ar amakʼ gharońjren hoṛ doko gujukʼa.”

²⁶ Niạ menkate Dan gusṭiren hoṛ do akoakʼ horteko mohnḍayena. Mikạ doe ńelkeda, onko do acʼ khon hõko daṛegea. Onate uni hõ oṛakʼteye ruạṛ calaoena.

²⁷ Onko do Mikạren naeke ar sanam boṅga muṭhạnko soṅgekate Layisteko calaoena. Ar onḍe okoe do suluk ar khạtirjomako tahẽkan onko sanamko gocʼketʼkoa ar onkoakʼ nagrahako jeretʼ giḍikatʼtakoa.

²⁸ Unre Layisrenko rukhiyạko lạgitʼ nonkan cele hoṛge bako tahẽkana, ente onkoakʼ nagraha do Sidon khon ḍher sạṅgińre tahẽkana ar eṭakʼ jãhãe hoṛko sãote hõ onko do jãhãn helmelge baṅ tahẽkantakoa. Onkoakʼ nagraha do Beth-Rahab nagraha ṭhenakʼ mitʼṭecʼ tapol otre tahẽkana. Dan gusṭiren hoṛko do arhõ nagrahako benaoketʼte onḍe girobasokʼko ehopʼena.

²⁹ Nagraha reakʼ laha ńutum Layis tahẽkanre hõ onko do akoren hapṛamkoakʼ ńutum lekate ona reakʼ ńutum do Danko dohokeda. Dan do Israelren hopone tahẽkana.

³⁰ Dan gusṭiren hoṛko do ako lạgitʼ onḍe mitʼṭecʼ goṛhon muṭhạnko benaokedea. Ar disạmren hoṛko bondi dosare ạuriko calakʼ hạbicʼ Dan gusṭiren hoṛko lạgitʼ do Jonathan ar uniren bõskoge naeke kạmiko kạmikan tahẽkana. Jonathan do Gersem bõsren ar Gersem do Moseren hopone tahẽkana.

³¹ Silore tinạkʼ din Isorakʼ oṛakʼ tahẽkan unạkʼ din hạbicʼ Dan gusṭiren hoṛko do Mikạren goṛhon muṭhạn do ako ṭhenko dohokada.