Bikʼcạrko 17 - সান্তালী বাইবেল

Mikạ ar uniren boṅga muṭhạn

¹ Ephrayim reakʼ buru ṭoṭhare Mikạ ńutuman mitʼṭen hoṛe tahẽkana.

² Uni do eṅgattetʼe metadea, “Amakʼ oka gelpe keji bar sae gram rupạ kombṛolentam ar okaṭakʼ lạgitʼ sarap emokʼ iń ańjomletʼme ona do iń ṭhenge menakʼa, ona do ińgeń hataoleda.” Unre uniren eṅgattetʼ doe menkeda, “E beṭa, Probhu Isore bhoramma!”

³ Ar uni do ona gelpe keji barsae gram rupạ do acʼren eṅgattetʼe ruạṛadea. Unre eṅgattetʼ doe menkeda, “Niạ rupạ do Probhu Isor ńutumteń samaṅetʼkana ar ińren hopon do onate rokʼ benao akade mitʼṭen boṅga muṭhạn ar chãńcre dul benaoakade ar mitʼṭen boṅga muṭhạne benao joṅ. Ar iń do onatege noa rupạ amgeń ruạṛama.”

⁴ Mikạ do ona rupạ eṅgattetʼe ruạṛade khan uniren eṅgattetʼ do bar keji tala rupạ hataokate sonhare emadea. Ar uni do mitʼṭen goṛhon muṭhạn ar chãńcre dulicʼ ar mitʼṭen muṭhạne benao ocokeda, ar unkin banar muṭhạnge Mikạwakʼ oṛakʼreye dohokatʼkinạ.

⁵ Mikạwakʼ do mitʼṭecʼ mundil tahẽkana. Uni do mitʼṭecʼ ehpod ar debota muṭhạnko benaokate acʼren mitʼṭen hopon do naeke hudạreye dohokedea.

⁶ Israelko talare unre hõ cele rajge bako tahẽkana. Onate okoe okaṭakʼ bhageye hudisetʼ tahẽkan onageye kạmikan tahẽkana.

⁷ Onako oktere Jihudạ ṭoṭhare Bethlehemren mitʼṭen juạn Liwi do Jihudạ gusṭiren hoṛko sãoteye girobasokʼkan tahẽkana.

⁸ Uni do eṭakʼ jãhãreye tahena mente jaega sendrae lagitʼ Bethlehem bạgikateye oḍok calaoena. Ar Ephrayim buru ṭoṭhareye tahẽnkan uni Mikạwakʼ oṛakʼteye boloyena.

⁹ Mikạ do uniye kulikedea, “Am do oka khonem hecʼakana?” Uniye menkeda, “Iń do Jihudạ ṭoṭha reakʼ Bethlehem nagraren mitʼṭen Liwi hoṛ kạnạń. Ar jãhãrege tahen reakʼ jaegań ńam onḍegeń tahena.”

^10-11 Mikạ do uniye metadea, “Am do enḍekhan iń sãotege tahenme ar ińren naeke hoekate baba leka hoyokʼme. Iń do bochorre mitʼsae bargel gram rupạ ar jomakʼ ar kicricʼkoń emama.” Niạ katha ańjomkate uni Liwi do bhitriteye boloyena ar uni ṭhen tahen lạgitʼe rạjiyena. Mikạ do acʼren hopon leka uni liwi koṛae dohokedea.

¹² Uni Liwi hoṛ do acʼakʼ kạmireye bahal ocoyen khan naeke lekate uniyakʼ oṛakʼreye tahẽyena.

¹³ Mikại menkeda, “Mitʼṭen Liwi tinre ińren naekeye hoyakana unre ińiń baḍaea, Probhu Isor do ińakʼe bhạlạiytińạ.”