Bikʼcạrko 16 - সান্তালী বাইবেল

Samson do Gasare

¹ Mitʼdin Samson do Gasate senkate mitʼṭen kusumbi kuṛiye ńelkedea ar uni ṭhene boloyena.

² Gasaren hoṛko do Samson onḍeye sen akana menteko ańjomketʼ khan ona jaegako gherao ạcurkeda ar goṭa ńindạ nagraha reakʼ phaṭok duạr ṭhen uni lạgitʼko tãṛãkʼ tahẽyena. Ar onko do ńindạ jokhecʼ thir hapeko tahẽyenteko menkeda, “Setakʼlen khange uni dobon gojea.”

³ Menkhan Samson do onḍe eken tala ńindạ hạbicʼe giticʼena. Ar ona tayom do beretʼkate hurkạṛ sudhạ banar khunṭi ar kapaṭkine pạṭupʼ totʼkeda. Ar onako acʼakʼ tarenreye gokʼketʼte Hebron samaṅ reakʼ buruteye rakapʼ calaoena.

Samson ar Dolila

⁴ Tayomte Sorek buru nalaren mitʼṭen maejiure Samsonakʼ mon do gaḍaoentaea. Uni kuṛiyakʼ ńutum do Dolila tahẽkana.

⁵ Philisṭikoren disạm cakʼlaoyicʼ do uni maejiu ṭhen senkateye menkeda, “Samsonakʼ noa maraṅ daṛe do cetʼre menakʼtaea ar cetʼ lekate uni dole tol daṛekea jemonle koboj daṛeae. Onate ale mimitʼko do gelpe keji barsae gram kate rupạle emama.

⁶ “Noa katha ańjomkate Dolila do Samsone metadea, “Amakʼ noa maraṅ daṛe do cetʼre menakʼa ar cetʼte tollem khanem kạbu daṛekokʼa.”

⁷ Samsone roṛ ruạṛkeda, “Akʼ reakʼ eae goṭecʼ berel tãtte jãhãegeye tolliń khan iń do eṭakʼ jãhãe hoṛ leka daṛe hoyokʼtińạ.”

⁸ Philisṭiren disạm cakʼlaoicʼ do unre onkanakʼ eae goṭecʼ nãwã tãt Dolilae emadea. Ar onate uni do Samsone tolkedea.

⁹ Unre thoṛagan hoṛ do uniyakʼ oṛakʼ bhitriregeko tãṛãkʼ akan tahẽkana. Dolila do Samson hohowadeteye metadea, “E Samson, Philisṭiko do am sapʼme lạgitʼko hecʼakana.” Onate uni do busupʼ baber leka onako phaṭ phuṭe topakʼkeda. Nonkate uniyakʼ daṛe cetʼre menakʼtae ona do danaṅrege tahẽyena.

¹⁰ Unre Dolila do Samsone metadea, “Am do bokam benaokedińa, ar iń ṭhen eṛem roṛakada. Niạ dhao do ṭhikte lạiyạńme cetʼte am do tol daṛekokʼa?”

¹¹ Samsone menkeda, “Tisge baṅ beohar akan nonkan barahite jãhãe ińe tolliń khan enḍekhan iń do jãhãe eṭakʼ hoṛko lekań hoyokʼa.”

¹² Unre Dolila do nãwã barahikote Samsone tolkedea. Ar thoṛa hoṛ do oṛakʼ bhitrire tãṛãkʼ akaeko tahẽkana. Dolilae menkeda, “E Samson, Philisṭiko do tolme lạgitʼko hecʼakana.” Menkhan Samson do sutạm leka onako barahiye topakʼ giḍikada.

¹³ Dolila do unreye roṛ ruạṛketʼteye menkeda, “Ńit hạbicʼ hõ iń ṭhen eṛekatham roṛketʼte bokam benao akadińạ. Cetʼ tem tol oco daṛekokʼa ona ṭhikte lạiyạńme.” Samsone roṛ ruạṛkeda, “Ińakʼ bohokʼ reakʼ eae goṭecʼ jaṭa upʼ otor sutạmrem teń seletʼletiń khan ar bhańj khunṭi sãotem tol uricʼ lekhange ińakʼ daṛe do ńurokʼa ar ne hoṛ lekageń hoyokʼa.

¹⁴ Unre Dolila do uniyakʼ eae goṭecʼ jaṭa upʼ otor sutạmreye tiń mitʼketʼte bhańj khunṭi sãoteye tolketʼteye menkeda, “E Samson, Philisṭiko do sapʼme lạgitʼko hecʼ akana.” Unre Samson do jạpitʼ khone beretʼente bhańj khunṭi do otor sutạm sudhại or totʼkeda.

¹⁵ Onate Dolila do uniye metadea, “Cekatem meneda, ińem dulạṛedińa mente? Amakʼ mon do ińre bạnukʼtama. Niạ ghalokʼ pe dhao bokam benaokedińa. Ar amakʼ noa maraṅ daṛe cetʼre menakʼtama ona do bam baḍae ocoledińa.”

¹⁶ Nonkage Dolila do din hilokʼe ạṛis cabakede khan, uni doe ạṛisena.

¹⁷ Onate Samson do joto katha uniye lạiyadea. Samsone menkeda, “Ińakʼ bohokʼre tisge holatʼ do baṅ calao akana. Janam khonge iń do Isor ńutumte mitʼṭen nạsri hoṛ kạnạń. Ińiń hoyo poṭorlen khange ińakʼ daṛe do iń khon ocogokʼa. Ar onate iń do eṭakʼ jãhãe hoṛ leka daṛe hoyokʼtińạ.”

¹⁸ Dolila do tinreye bujhạukeda, uniyakʼ mon reakʼ joto kathae lại akadea mente unre uni do Philisṭiren disạm cakʼlaoyicʼ ṭhen kathae roṛ gotʼkada, “Ape do ar mitʼ dhao dela hijukʼpe. Uni do mon reakʼ joto kathae lại akadińạ.” Onate Philisṭiren disạm cakʼlaoko do soṅgete rupạko ạgu darakeda.

¹⁹ Dolila do acʼakʼ hoborre Samsone jạpitʼ ocokedea ar uniyakʼ eae goṭecʼ jaṭa upʼ hoyo poṭortae lạgitʼ mitʼṭen hoṛe hohowadea. Nonkate uni do santaoeye ehopʼkeda ar uniyakʼ daṛe hõ oḍok calaoentaea.

²⁰ Ona tayom Dolila doe metadea, “E Samson, Philisṭiko do am sapʼme lạgitʼko hecʼakana.” Samson do jạpitʼ khon ebhenkateye hudiskeda, lahate lekage irci giḍikate bahreteye oḍok calakʼa mente. Menkhan bae baḍaekan tahẽkana, Probhu Isor do uniye bạgi giḍi akadea mente.

²¹ Unre Philisṭiko do uniko sapʼkedete uniyakʼ banar mẽtʼko hoṭor totʼketʼtaea ar Gasateko idikedea. Onko do pitạl reakʼ sikṛiteko tolkadea ar hajot khanare idikate jante riritʼ kạmireko dhurạukedea.

²² Menkhan uniyakʼ bohokʼ reakʼ upʼ do hoyo poṭor tayom arhõ janam rakabokʼ ehopʼena.

Samsonakʼ gujukʼ

²³ Inạ tayom Philisṭikoren disạm cakʼlaoko do akoren debota Dagon ạḍi okocʼ dãṛẽ teṅgenae lạgitʼ ar rạskạkʼ lạgitʼ mitʼ ṭhenko jarwayena. Onkoko menkeda, “Aboren Isor do aboakʼ tire aboren bạiri Samsone jimạ akadea.”

²⁴ Ar hoṛko hõ Samson ńelkate noa katha menkate akoren Debota sarhaoate memenko ehopʼena, “Aboren Isor do aboakʼ tire aboren bạiriye jimạ akadea; uni do aboakʼ jumi ar phosole nosṭo akada ar aboren ḍher hoṛkoe gocʼ akatʼkoa.”

²⁵ Ona tayom onko do rạskạkʼko ehopʼena ar ãṭ aṛaṅteko menkeda, “Samson doe oḍok ocokʼma; ale do uniyakʼ kheloḍle ńeltaea.” Onate onko do hajot khana khon Samsonko oḍok ạgukedea ar Samson do kheloḍ udukʼakoe ehopʼena. Onko do barea khunṭi talare Samsonko teṅgokedea.

²⁶ Ar okoeṭakʼ koṛa do uniyakʼ tiye sapʼ akatʼtae tahẽkan Samson do uniye metadea, “Oka khunṭiko cetanre mundil teṅgo akan onako sapʼ ocoạńme jemon onareń ṭenḍar daṛeakʼ.”

²⁷ Unre mundilre ạḍi utạr herel ar maejiuko jarwa akan tahẽkana, ar Philisṭikoren disạm cakʼlaoko hõko tahẽkana. Ar chat cetan khon pe hajar herel ar maejiuko do Samsonakʼ kheloḍko ńeletʼ tahẽkana.

²⁸ Unre Samson do Probhu Isor ṭhene koekeda, “E Probhu Isor, mitʼ dhao baṛe disạiyińme. E Isor, dayakate ar mitʼ dhao daṛe imạńme jemon ińakʼ banar mẽtʼ iạte Philisṭiko cetanreń hala ruạṛ daṛeakʼ.”

²⁹ Ar tala reakʼ okakin khunṭi cetanre mundil teṅgo akan tahẽkan Samson do ona banare sapʼkeda. Uni do acʼakʼ jojom tite mitʼṭecʼ ar leṅga tite armitʼṭecʼ khunṭi hạṛupʼketʼteye japakʼena.

³⁰ Ona tayom uni do ãṭ aṛaṅteye menkeda, “Philisṭiko sãote iń hõń gujukʼma!” Niạ menkate uni do kajakteye ḍhekakeda. Onate disạm cakʼlaoko ar bhitriren hoṛko cetanre mundil do rạputʼ ńurena. Nonkate uni do jiwetʼ tahenre tinạkʼ hoṛe gocʼletʼko ona khon ḍher hoṛ acʼakʼ gujukʼreye gocʼketʼkoa.

³¹ Tayomte uniyakʼ apatakʼ gharońjrenko ar uniren boehako do mạ̃ṛĩ iditae lạgitʼko hecʼena. Onko do uniyakʼ mạ̃ṛĩ idikate Sora ar Esṭaol talare acʼ apat Manohoakʼ topareko baekadea. Samson do bargel bochor hạbicʼ Israelkoakʼ bicạrketʼtakoa.