Bikʼcạrko 15 - সান্তালী বাইবেল

Samson do Philisṭikoe bhagaoetʼko

¹ Guhum gegetʼ okte Samson do mitʼṭen merom hoponante acʼren bạhu tulucʼ ńapamokʼ lạgitʼe senena. Uniye menkeda, “Iń do bhitrite ińren bạhu ṭheniń calakʼ kana.” Menkhan kuṛiren apattetʼ do bhitrite bae bolo ocoadea.

² Uniren apattetʼe menkeda, “Iń doń hudiskeda, uni dom hirkhạwae kana, ar onate iń do amren gateakʼ tireń jimạ akadea. Uniren huḍińicʼ boeha kuṛi do uni khon hõe cehragea; uni bodolte am do huḍińicʼge hataoem.”

³ Unre Samson do onkoe metatʼkoa. “Ńitokʼ do Philisṭikoakʼ iń lokshan daṛeatakoa, ar onate jãhãn dos do baṅ hoyokʼtińạ.

⁴ Noa menkate uni do bahrete oḍok senkate pe sae toyoye sapʼketʼkoa ar mimitʼ joṛa toyokoakʼ canḍbol canḍbole tolmitʼketʼ takote talare mitʼṭecʼkate mosale tolatʼkoa.

⁵ Ona tayom do mosalre seṅgele lagaoatʼte Philisṭikoakʼ khet reakʼ phosol talareye aṛakʼkatʼkoa. Nonkate uni do onkoakʼ tolakʼ ạṭi ar phosolko ar onkoakʼ jạitun bagwankoe jeretʼ poṭorketʼtakoa.

⁶ “Philisṭiko do tinreko kuliyana, “Okoe noa doe kạmi akada?” Unreko lại ocoyena, “Timnại hoṛren jãwãe koṛa Samson do noae kạmi akada, ente uniren hõńhartetʼ do Samsonren bạhu hataokate uniren gateakʼ tireye jimạ akadea.” Onate Israelko do senkate Samsonren bạhu ar uniren hońhartetʼ seṅgelreko atar giḍikatʼkinạ.

⁷ Unre Samson do onkoe metatʼkoa, “Apeakʼ noa kạmi cetanre ạuriń halae hạbicʼ iń do bạń thirokʼa.”

⁸ Niạ menkate ạḍi bạṛicʼe hạnketʼkoa ar ḍher hoṛgeye gocʼketʼkoa. Ona tayom uni do senkate Etam reakʼ huṭupʼ dhiri ciritʼreye tahẽyena.

⁹ Philisṭiko do unre Jihudạ ṭoṭhare senkateko ḍerayena ar Lehiko gheraokeda.

¹⁰ Jihudạren hoṛko kuliyana, “Cedakʼ ale upạrtepe rakapʼ hecʼakana? ” Onkoko roṛ ruạṛkeda, “Samson tolkate idiye lạgitʼ nonḍele hecʼakana. Ar ale cetanre okae ceka akatʼ ale hõ uni cetanrele onkaea.”

¹¹ Unre Jihudạren pe hajar hoṛ do Etam dhiri huṭupʼ reakʼ ciritʼ ṭhen senkate Samsonko metadea, “Philisṭikoko bicạretʼ bon kan ona do cetʼ bam baḍaekana? Alere noa do cetʼem ceka akatʼa? ” Samsone roṛ ruạṛatʼkoa, “Ińre okako ceka akatʼ iń hõ onko cetanreń onka akada.”

¹² Onko do uniko metadea, “Ale do am tolkate Philisṭikoakʼ tire jimạkam lạgitʼle hecʼakana.” Samsone menkeda, “Enḍekhan kiriạwạńpe, bape gojeńa mente.”

¹³ Onkoko roṛ ruạṛadea, “Bale onkamea. Ale do eken tolkate onkoakʼ tirele jimạkama; ar sạrige bale gocʼmea.” Noa menkate onko do barea nãwã baberte uniko tolkedete buru khonko idikedea.

¹⁴ Uni do tinre Lehi ṭhene seṭerena unre Philisṭiko do hohowate uni secʼ hijukʼko ehopʼena. Unre Probhu Isorren goḍet do purạ daṛete uni cetanreye hecʼena. Onate uniyakʼ ti reakʼ baberko do lo busupʼ leka hoyena ar uniyakʼ ti do raṛayentaea.

¹⁵ Unre uni do gadhawakʼ berel jambeye hataokeda ar onate mitʼ hajar hoṛe gocʼketʼkoa.

¹⁶ Ar Samson doe menkeda, Mitʼṭen gadhawakʼ jambete lade mude hoṛ, mitʼṭen gadhawakʼ jambetege hajar hoṛkoń gocʼketʼkoa.”

¹⁷ Uni do noa menkate ona jambeye giḍikada. Ar ona jaega reakʼ ńutum do Ramat-lehiye metatʼa (Ona reakʼ mane do “Jambe-buru”).

¹⁸ Inạ tayom Samson do ạḍi ãṭ tetaṅkedea. Uni do Probhu Isor ṭhene koeketʼteye menkeda, “Am do amren gutim jitạu ocoakadea. Ar ńitokʼ do tetaṅteń gujukʼte cetʼ bin khatna akan hoṛkoakʼ tirem paṛao ocoyińa?”

¹⁹ Unre Isor do Lehire mitʼṭen ghaḍlakʼe paṛakʼ ocoketʼte ona khon dakʼ oḍok hecʼena. Ar ona dakʼe ńũketʼ khan Samson do daṛe ńamketʼteye cerṭha ruạṛena. Onate ona jharna reakʼ ńutum do Enhakkore dohokeda (Ona reakʼ mane do “Koejoṅ kạnicʼ reakʼ jharna”). Ar jharna do ńit hõ Lehire menakʼgea.

²⁰ Philisṭiko oktere Samson do bargel bochor Israelkoakʼe bicạrketʼtakoa.