Bikʼcạrko 14 - সান্তালী বাইবেল

Samsonakʼ bapla

¹ Samson do Timnạteye senena, ar onḍe mitʼṭen Philisṭikoren kuṛiye kusiyadea.

² Onḍe khon ruạṛ hecʼkate uni do acʼren go-babae metatʼkinạ, “Iń do Timnạre mitʼṭen Philisṭi kuṛiń ńel ạguakadea; uni sãotege baplakạń ben.”

³ Uniren eṅgat apatkin menkeda, “Aboren peṛako se aboren jạtrenko talare cetʼ jãhãn kuṛi do bạnukʼkoa, ar baplakʼ lạgitʼ begor khatna akan Philisṭiko ṭhenem calakʼkana?” Menkhan Samson do apattetʼe metadea, “Baṅa baba, iń lạgitʼ do unige ạguiye ben. Iń do uniregeń kusi akana.”

⁴ Uniren eṅgat apat do Probhu Isor khonge hoyakan ona do bạkin bujhạu daṛeada, ente uni do Philisṭiko upạrte lạṛhại lạgitʼ mitʼṭecʼ ạte ńam baṛayetʼ tahẽkana. Onako dinre Philisṭiko do Israelko cetanre mạlikiko calaoetʼ tahẽkana.

⁵ Tayomte Samson do acʼren go-baba sãote Timnạteye senena. Ar Timnạ reakʼ darkha bagwan ṭhene seṭeren khan mitʼṭen dhạcri kul do hạnḍrạuate Samson secʼe laha hecʼena.

⁶ Unre Probhu Isorren jiu do uni cetanreye decʼena, ar onate eken tite merom hopon leka uni dhạcri kule or cirạkedea. Menkhan okae cekaketʼ ona do acʼren eṅgat apat hõ bae baḍae ocoletʼkinạ.

⁷ Tayomte uni do kuṛi ṭhen senkate uni sãoteye galmarokeda ar kuṛi hõ uniye kusiyadea.

⁸ Inạ thoṛa din tayom uni kuṛi baplaye lạgitʼ Timnạteye calaoena. Ar calakʼ jokhecʼ uni dhạcri kulakʼ jaṅko ńela mente onteye ạcurena. Uni do dhạcri kulakʼ pańjra jaṅre dumur chata ar onare rasa hõe ńamkeda.

⁹ Uni do dumure jhõṛaketʼkote rasa hataokate ona jom jomteye calaoena. Ona tayom uni do eṅgat ar apat ṭhen senkate unkin hõ ona rasae ematʼkinte unkin hõkin jomkeda. Menkhan dhạcri kulakʼ pańjra jaṅ khon ona rasae ạgu akatʼ ona do bae lạiyatʼkinạ.

¹⁰ Ar Samsonren apattetʼ do uni kuṛi ńele lạgitʼe senena. Unre Samson do onḍe mitʼṭecʼ bhoj reakʼe bebostakeda ente jãwãe koṛa doko onkayetʼ tahẽkana.

¹¹ Samson onḍeye seṭeren khan Philisṭiko do soṅgeae lạgitʼ pe gel koṛakoko ńamadea.

¹² Samson do onko sãotenkoe metatʼkoa, “Mitʼṭecʼ iń kudum apea. Ar ape do bhoj reakʼ niạ eae din bhitrire noa reakʼpe roṛ ruạṛ daṛeạń khan iń do pe gel mĩhĩ musnạ oyonakʼ ar pe gel goṭecʼ kicricʼ iń emapea.

¹³ Ar bape lại daṛeạń khan ape do pe gel mĩhĩ musnạ reakʼ oyonakʼ ar pe gel goṭecʼ kicricʼ ińpe imạńa.” Onkoko menkeda, “Amakʼ kudum lạime, onale ańjoma.”

¹⁴ Samsone menkeda, “Jojomicʼ khon do jomakʼ hecʼena, ar daṛeanicʼ khon do heṛemakʼge.” Onko do pe din hạbicʼ noa kudum reakʼ roṛ ruạṛ bako daṛeada.

¹⁵ Ar eae din hilokʼ onko do senkate Samsonren bạhuko metadea, “Amren jãwãeyem mạluṅea ar niạ kudum reakʼ manetetʼem lạiyaleya. Ar baṅkhan am ar amakʼ gharońjren sanamko seṅgeltele ḍahao maraopea. Ar ale do cetʼ reṅgecʼ ocole lạgitʼ nonḍem neota akatʼlea?”

¹⁶ Samsonren bạhu do unre Samson ṭhen rakʼ rakʼteye menkeda, “Am dom kurudạńkana, ar bam dulạṛedińa. Am do ińren hoṛko mitʼṭecʼem kudum akawatʼkoa menkhan ona reakʼ mane do iń hõ bam lạiyạdińạ.” Samsone roṛ ruạṛkeda, “Ińren go-baba hõ ona reakʼ mane do bạń lại akatʼkinạ, enḍekhan am do cedakʼ iń lạiyama?”

¹⁷ Bhoj reakʼ mucạtʼ din hạbicʼ acʼren bạhu doe rakʼkeda. Ar eae din hilokʼ Samson do acʼren bạhu onae lạiyadea, ente uni doe ạṛis caba akade tahẽkana. Ar unre acʼren bạhu do ona reakʼ manetetʼ acʼren hoṛkoe lạiyatʼkoa.

¹⁸ Eae din hilokʼ cando ạuriye hạsurokʼre atoren onko hoṛ do Samsonko metadea, “Dumur rasa khon do ar cetʼ heṛema? Ar dhạcri kul khon do okoeye daṛeana?” Samson do onkoe metatʼkoa, “Ińren phẽṭaṛte bape sile khan ińakʼ kudum reakʼ mane do ohogepe lại daṛelea.”

¹⁹ Inạ tayom Probhu Isorren jiu do purạ daṛete Samson cetanreye hecʼena. Ar uni do Askilonte senkate onḍenko pe gel hoṛe gocʼketʼkoa ar onkoakʼ jotowakʼe luṭketʼtakoa ar onkoakʼ kicricʼ ạgukate okoe acʼakʼ kudum reakʼ manetetʼko lạiletʼ onkoe ematʼkoa. Ona tayom uni do edrete acʼren apatakʼ oṛakʼteye calaoena.

²⁰ Unre acʼren soṅgetenko modre uniren mitʼṭen gate do uniren bạhuko goṅadea.