Bikʼcạrko 12 - সান্তালী বাইবেল

Jiptha ar Ephrayimrenko

¹ Tayomte Ephrayim gusṭiren hoṛko do akoren lạṛhại phạdko hohowatʼkote gaḍa paromkate Saphonteko calaoena. Onḍe onko do Jipthako metadea, “Amonrenko sãote lạṛhại lạgitʼ cedakʼ bam hohowatʼlea? Ale do am sudhạ amakʼ oṛakʼle jeretʼ giḍikakʼa.”

² Jiptha do roṛ ruạṛatʼkoteye metatʼkoa, “Ińren hoṛkoante Amonren hoponko tulucʼ lạṛhạire bestoń tahẽkana. Iń doń hohowatʼpe tahẽkangea menkhan onkoakʼ ti khon do bape rukhiyạledeńa.

³ Iń doń ńelkeda ape do bape goṛowạńkana onate jiwi cuputʼkate Amonrenko sãote lạṛhại lạgitʼ iń oḍok calaoena ar Probhu Isor do onko cetanreye jitạu ocokedińa. Menkhan ńitokʼ ape do cedakʼ iń tulucʼ lạṛhại lạgitʼpe hecʼakana?”

⁴ Jiptha do unre Gileadren sanam hoṛe hoho jarwaketʼkote Ephrayimrenko upạrteye lạṛhạiyena, ente Ephrayim gusṭiren hoṛko menleda, “E Gileadrenko, ape do Ephrayim ar Manase gusṭi bạgiyakʼ hoṛko kanape.” Ona lạṛhạire Gileadrenko do onkoko bhagaoketʼkoa.

⁵ Onate Gileadrenko do Jordan gaḍa reakʼ oka jaegare taṛamte paromokʼ ar Ephrayim ṭoṭha secʼ senokʼ jaegakoko hatkeda. Ar Ephrayim gusṭiren sarecʼ jãhãe hoṛge tinreko menetʼ tahẽkana, “Parom ocoạńme,” Unre Gileadren hoṛko do uniko kuliyede tahẽkana, “Am do cetʼ Ephrayim hoṛ kanam?” Uni doe roṛ ruạṛetʼ tahẽkana, “Baṅa,”

⁶ Enḍekhan onkoko menetʼ tahẽkana, “Bhagegea, tobe mase menme, ‘Sibboleth.’ ” Onate uni do katha ṭhik leka bae roṛ daṛeakʼteye mena, “Chiboleth, ” Ar onate sapʼkate uni do jordan gaḍa reakʼ taṛam paromokʼkan jaegaregeko gojekan tahẽkana. Nonkate unre pongel bar hajar Ephrayimko gocʼketʼkoa.

⁷ Gileadren Jiptha do turui bochor Israelkoakʼe bicạrketʼtakoa. Ar uniye gocʼen khan uni do Gilead reakʼ mitʼṭecʼ atoreko topakedea.

Ibsan, Eylon ar Adbon reaṅ

⁸ Jiptha tayom Bethlehem atoren Ibsan do Israelkoren bikʼcạricʼe hoyena.

⁹ Uniren do pegel koṛa hopon ar pegel kuṛi hoponko tahẽkana. Uni do acʼ bõsrenko bahreren hoṛko tulucʼ acʼren hoponerakoe baplaketʼkoa ar acʼren hoponko lạgitʼ pegel bạhuko hõe ạguketʼkoa. Ibsan do eae bochor Israelkoren bikʼcạricʼe tahẽkana.

¹⁰ Ibsane gocʼen khan uni do Bethlehemreko topakedea.

¹¹ Ibsan tayom do Sebulon gusṭiren Eylon do gel bochor Israelkoe bicạrketʼkoa.

¹² Ar uniye gocʼen khan Sebulon ṭoṭha reakʼ Aijalonre uniko topakadea.

¹³ Eylon tayom Pirathon Hilelren hopon Adbon do Israelkoren cakʼlaoicʼe hoyena.

¹⁴ Uniren do pongel hopon ar pegel goṛomtetʼ koṛako tahẽkana. Onko do eaegel gadhakoreko decʼ baṛaekan tahẽkana. Ar Adbon do irạl bochor Israelkoakʼe bicạrketʼtakoa.

¹⁵ Ar uniye gocʼen khan Amalekikoakʼ buru ṭoṭhare Ephrayim reakʼ Pirathonreko topakadea.