Bikʼcạrko 11 - সান্তালী বাইবেল

¹ Ona jokhecʼ Jiptha do lạṛhại bire tahẽkana. Menkhan uniren eṅgattetʼ do mitʼṭen kusumbiye tahẽkana ar uniren apattetʼakʼ ńutum do Gilead tahẽkana.

² Gileadren bạhu do koṛa hoponkoe janamadea. Onko do harakate Jiptha noa menkateko laga ńirkedea, “Am do aleakʼ sompotti reakʼ ạidạri bam ńama, ente am do eṭakʼ maejiuren hopon kanam.”

³ Onate Jiptha do acʼren boehako khone dạṛketʼte Tob disạmte senkate girobasokʼe ehopʼena. Onḍeko adom kharap hoṛ do uni beṛhaeteko jarwayena ar uni sãote gatekʼko ehopʼena.

^4-5 Inạ thoṛa din tayom Amonrenko do Israelko upạrte tinre lạṛhại lạgitʼko oḍok hecʼena unre Gileadren murubbiko do Tob disạm khon Jiptha ạguiye lạgitʼko senena.

⁶ Onkoko menkeda, “Amonrenko sãote bon lạṛhạiya, onate dela hijukʼme ar aleren subedar hoyokʼme.”

⁷ Jiptha do onkoe metatʼkoa, “Iń do cetʼ bape kurud akawạdińa ar iń babawakʼ oṛakʼ khon cetʼ bape laga oḍok akadińạ? Ar ńitokʼ do muhinrepe paṛao akante iń ṭhenpe hecʼakana?”

⁸ Gileadren murubbiko do uniko metadea, “Menkhan ńitokʼ do am ṭhenle ruạṛ hecʼakana jemon ale sãotem senokʼte Amonrenko sãotem lạṛhại. Ar Gileadre girobasokʼkan sanamko cetanren mạlik hoyokʼme.”

⁹ Jiptha doe roṛ ruạṛatʼkoa, “Amonrenko upạrte lạṛhại lạgitʼ ińpe ruạṛ idiyediń kana ar Probhu Isor hõ ińakʼ tire onkoe soprotketʼkoa; enḍekhan unre cetʼ iń do sạrige aperen mạlikiń hoyokʼa?”

¹⁰ Gileadren murubbiko roṛ ruạṛadea, “Probhu Isorge aleren gohae hoyena, am okam menketʼ onagele onkaea.”

¹¹ Onate Jiptha do Gileadren murubbiko sãoteye senena ar hoṛko do akoren matha ar senaputiko hoe ocokedea. Uni do Mispare senkate Probhu Isor samaṅre onako kathae roṛkeda.

¹² Inạ tayom Jiptha do hoṛ kolkate Amonren raje kulikedea, “Am ar iń talare nonkanakʼ cetʼ hoyakante am do ińakʼ disạm upạrtem oḍok hecʼakana?”

¹³ Amonren raj do Jiptharen hoṛkoe metatʼkoa, “Israelko do Misor disạm khon oḍok hecʼkate jordan gaḍa aṛe aṛeteakʼ jaegako ar Arnon gaḍa khon Jabok gaḍa hạbicʼ ińakʼ sanam jaegako dokhol akada. Ona ńitokʼ mońj mońjte ruạṛkạtińme.”

^14-15 Jiptha do Amonren raj ṭhen arhõ hoṛ kolkateye roṛ gotʼkada, “Jipthaye meneda, Israelko do Moab se Amonrenkoakʼ disạm do bako dokhol akada.

¹⁶ Misor khon oḍokʼ hecʼ tayom Israelko do hahaṅkar ṭoṭha secʼte arakʼ jalapuri hạbicʼko senlena ar ona tayom do Kadesteko calaolena.

¹⁷ Ona tayom Israelko do Edomren raj ṭhenko roṛ gotʼkada, ‘amakʼ disạm talate calakʼ reakʼ hukum emaleme baṛe.’ Menkhan Edomren raj do ona katha bae luturada. Onko do Moabren raj ṭhen hõ hoṛko kolletʼkoa menkhan uni hõ bae rạjilena. Ar onatege Israelko do Kadesreko tahẽyena.

¹⁸ Ona tayom onko do hahaṅkar talate senkate Edom ar Moab disạm secʼteko ạcurente Moab reakʼ purub secʼte senkate Arnon gaḍa reakʼ eṭakʼ aṛereko ḍerayena. Menkhan Moab disạmte do bako bololena, ente Arnon gaḍage Moab reakʼ simạna tahẽkana.

¹⁹ Ona tayom Israelko do Amorikoren Sihon raj, okoe do Hesbon khon raje calaoetʼ tahẽkan, uni ṭhen hoṛ kolkateko roṛ gotʼkada, ‘aleakʼ disạmte senokʼ lạgitʼ amakʼ disạm talate sen ocoaleme baṛe.’

²⁰ Menkhan Sihon do Israelko bae pạtiạuatʼkote acʼakʼ disạm talate calakʼ reakʼ hukum bae ematʼkoa. Uni do acʼren sanam hoṛkoe jarwaketʼkoa ar Jahasreye ḍerayente Israelko upạrteye lạṛhạiyena.

²¹ Unre Israelkoren Probhu Isor do Israelkoakʼ tire Sihon ar uniren sanam hoṛkoe soprotkatʼkoa ar Israelko do onkoko bhagaoketʼkoa. Ar ona disạmreko girobasokʼkan sanam Amorikoakʼ jaega do Israelkoko hatkeda.

²² Onko do Arnon khon Jabok hạbicʼ ar hahaṅkar ṭoṭha khon jordan hạbicʼ Amorikoakʼ sanam jaegako hatkeda.

²³ Israelkoren Probhu Isor do acʼren hoṛ Israelko samaṅ khon tinre Amorikoe laga oḍokketʼkoa unre ona ruạr hatao reakʼ do cetʼ amakʼ ạidạri menakʼa?

²⁴ Amren Kemos debota okaṭakʼ ạidạriye emakawatʼme ona do cetʼ amakʼ ạidạrire bạnukʼa? Ṭhik onkage aleren Probhu Isor ale samaṅ khon okoeye laga ńir akatʼko onkoakʼ jaegagele ạidạri akawana.

²⁵ Am do cetʼ Moabren raj Siphorren hopon Balak khon hõm bhagegea? Uni do tishõ Israelko sãote bae jhogṛalena se bae lạṛhạilena.

²⁶ Teheń pe sae bochor Israelko do Hesbon ar Aroer nagraha ar ona aḍepase reakʼ ato ar Arnon gaḍa aṛe secʼteakʼ sanam atokorele girobasokʼ kana. Inạko dinre cedakʼ am do onako arhõ bam hatleda?

²⁷ Niạko babotre iń do am upạrte cetʼge bạń behok akada, bickom iń upạrte lạṛhại lạgitʼem oḍok hecʼakante amgem behok akada. Bikʼcạricʼ Probhu Isorge ńitokʼ Israelko ar Amonrenko talareye bicạrma.”

²⁸ Menkhan Jipthawakʼ roṛ gotʼakʼ niạ sombatre Amonren raj do bae luturada.

²⁹ Unre Probhu Isorren Jiu do Jiptha cetanreye hecʼena. Onate Jiptha do Gilead ar Manase ṭoṭha talate senkate Gilead reakʼ Mispateye calaoena ar onḍe khon Amonrenko birudteye laha idiyena.

^30-31 Jiptha do niạ menkate Probhu Isor ṭhen mitʼṭecʼe manotketʼteye menkeda, “Ińakʼ tire Amonrenkom jimạleko khan Amonrenko sãote lạṛhạire jitạukate oṛakʼ iń ruạṛ hijukʼre daramiń lạgitʼ okoeye oḍok hijukʼ unige Probhu Isorrene hoyokʼa. Ar unige mitʼṭecʼ jeredokʼ samaṅokʼakʼ menteń samaṅea.”

³² Inạ tayom Jiptha do Amonrenko sãote lạṛhại lạgitʼe oḍok senena ar Probhu Isor do uniyakʼ tire Amonrenkoe soprotʼketʼkoa.

³³ Uni do Aroer khon Minni ṭhen Abel-Keramim hạbicʼ bargel nagraha ar atoren hoṛkoe ńẽtʼketʼkoa. Ar nonkate Israelko do Amonrenko akoakʼ gobolreko dohoketʼkoa.

Jiptharen hoponera

³⁴ Jiptha do tinre Mispare acʼakʼ oṛakʼteye ruạṛ hecʼena unre darame lạgitʼ okoeye oḍok hecʼen uni do acʼren hoponerageye tahẽkana. Uni do tobla ru rute ar enecʼateye hijukʼkan tahẽkana. Uni do Jiptharen sadher hoponerae tahẽkana.

³⁵ Jiptha do acʼren hoponerae ńelkede khan acʼakʼ kicricʼe oṛecʼketʼteye menkeda, “Hae, hae, E biṭi tiń, am do cedakʼ sorbonasrem paṛaokedińa! Ạḍi muhinregem paṛao ocokedińa, ente iń do Probhu Isor ṭhen onkań manot dohoakatʼ ona do bạṅ rạputʼ daṛeakʼa.”

³⁶ Kuṛiye roṛ ruạṛkeda, “E baba, amakʼ mocatege Probhu Isor ṭhenem roṛ kại akatʼte amakʼ katha lekage ińre baṛe kạmime. Ente Probhu Isor do amren bạiri Amonrenko cetanre halae reakʼe emakatʼmea.”

³⁷ Ona tayom uniye menkeda, “Menkhan ińakʼ mitʼṭecʼ nehõr dohoytińme. Iń do gidrạren eṅgat bạń hoedaṛeakʼa; onate gate kuṛiko sãote burukore senkate bar cando hạbicʼ rakʼ homor ocowạńme.”

³⁸ Jiptha doe menkeda, “E biṭi, do calakʼme.” Ar noa menkate uni do bar cando lạgitʼe bidạkadea. Unre uni ar eṭakʼ kuṛiko do burukore ạcur baṛae tulucʼ rakʼ homorko ehopʼena, ente gidrạren eṅgat do ar tishõ bae hoedaṛeakʼa.

³⁹ Ado bar cando paromen khan uni do acʼ apattetʼ ṭhene ruạṛ hecʼena. Ar Jiptha do Probhu Isor ṭhen okae manotletʼ onkage acʼren hoponera cetanreye kạmikeda. Ar kuṛi do kũạri tahenregeye gocʼena. Niạ ghoṭna khon Israelko talare mitʼṭecʼ niạm ehopʼena.

⁴⁰ Gilead Jiptharen hoponerawakʼ katha disạite homor halaṅ lạgitʼ Israelren kuṛiko do jao bochor pon din lạgitʼ oṛakʼ khonko oḍok calakʼkan tahẽkana.