Bikʼcạrko 10 - সান্তালী বাইবেল

Tola reaṅ

¹ Abimelek tayom Tola ńutuman Isakar gusṭiren mitʼṭen hoṛ do Israel hoponko rukhiyạko lạgitʼe hecʼena. Tola doe hoyokʼ kana Puaren hopon ar Dodoren do goṛomtetʼ koṛa. Ephrayim buru ṭoṭha reakʼ Semirre uni doe girobasokʼkan tahẽkana.

² Uni do bargel pe bochor Israelkoakʼe bicạrketʼtakoa. Tayomte uni doe gocʼena ar Semirreko topake dea.

Jayir reaṅ

³ Tola tayom Gilead ṭoṭhare Jayir do bargel bar bochor Israelkoakʼe bicạrketʼtakoa.

⁴ Jayirren do pegel hoponko tahẽkantaea; ar onko do pegel gadhare decʼkateko dãṛã baṛaekan tahẽkana. Gilead reakʼ pegel ato do onkoakʼ gobolre tahẽkana. Teheń hạbicʼ ona atoko do Hawot-Jayirko metakʼ kana.

⁵ Ar Jayire gocʼen khan uni do Kamonreko topakadea.

Jiptha reaṅ

⁶ Israel hoponko do arhõ Probhu Isorakʼ nońjorre oka bạṛicʼakʼkan onage kạmiko ehopʼena. Onko do Bakʼal debotako ar Astarot debiko ar Aramrenko, Sidonrenko, Moabrenko, Amonrenko ar Philisṭikoren debotako sewawakoko ehopʼena. Nonkate Israelko do Probhu Isorko bạgikedete ar bako sewawadea.

⁷ Ona iạte uni do onko cetanre edrete pit caṛhaoadea ar Philisṭiko ar Amonrenkoakʼ tireye jimạkatʼkoa.

⁸ Inạ bochor onko do Israelkoko lạhutʼ cabaketʼkoa. Onko do jordan purub secʼ Amorikoakʼ disạm Gileadre girobasokʼkan Israelko gel irạl bochor hạbicʼ kosṭoreko dohoketʼkoa.

⁹ Ar Amonrenko do Jihudạ, Benjamin ar Ephrayim gusṭiren hoṛko upạrte lạṛhại lạgitʼ jordan gaḍako paromkeda. Ar Israelko do ạḍitetʼ kosṭoreko paṛaoena.

¹⁰ Onko do Probhu Isor ṭhen rakʼateko menkeda, “Aleren Isor bạgikate sạrige ale do am upạrte ạḍile kại akada ente Bakʼal debotale sewawaekan tahẽkana.”

¹¹ Probhu Isor do Israelkoe roṛ ruạṛatʼkoa, “Misriko, Amoriko, Amonrenko ar Philisṭikoakʼ ti khon iń do cetʼ bạń bańcaoletʼpea?

¹² Tinre Sidonrenko, Amalekiko ar Maonirenkoakʼ santao iạte goṛo ńam lạgitʼ iń ṭhenpe rakʼkeda unre hõ onkoakʼ ti khoniń bańcaoletʼpea.

¹³ Menkhan ape do iń bạgikate debotakope sewawako kana, onate ar bạń bańcaopea.

¹⁴ Okoe debotakope bachaoan tahẽkan onko ṭhenge senkate ragpe. Onkoge muhinreko bańcaope ma.”

¹⁵ Menkhan Israelko do Probhu Isorko metadea, “Ale dole ghạṭ akada. Am okaṭakʼ bhagem hudisetʼ alere onage onkaeme baṛe, menkhan dayakate niạ dhao do rukhiyạleme.”

¹⁶ Inạ tayom onko talare tinạkʼ debotako tahẽkan onko jotoko ocokʼ giḍikatʼkoa ar Probhu Isor sewawaeko ehopʼena. Israelkoakʼ kosṭo ńelte Probhu Isor do monre duke ńamkeda.

¹⁷ Inạ tayom Amonrenko do riạu mitʼkate lạṛhại calakʼ lạgitʼ Gileadre senkateko ḍerayena. Ona iạte Israelko hõko oḍokente Mispare senkateko ḍerayena.

¹⁸ Unre Gileadren mukhiyạko do akoreko mepenena, “Okoe hoṛ pạhilre Amonrenkoe ńẽtʼko unige Gileadren mạlike hoyokʼa.”