Aposkạmi 9 - সান্তালী বাইবেল

Sạulakʼ mon ạcur

^1-2 Ar Sạul do unhạbicʼ Probhu Isorren celako gocʼko reakʼ botore udukʼako kan tahẽkana. Uni do Damesek nagraha reakʼ sunạgogkore jimạko lạgitʼ maraṅ naeke ṭhen senkate ciṭhiye koekeda. Ar tinạkʼ hoṛ Jisuakʼ horteko calakʼkan tahẽkan, baṅ do herel hoponko, baṅ do maejiuko, onko sanamkoe ńamlekore jemon tolkate Jerusalemteye ạgu daṛeako ona reakʼ ektiạri ńam lạgitʼ uni do ona ciṭhiye khojleda.

³ Ado hor horteye calakʼkan tahẽkanre Damesek ṭhene seṭeren khan ackage serma khon mitʼṭecʼ marsal do uni beṛhaete bamberena.

⁴ Uni do otreye bhindạṛena ar mitʼṭecʼ aṛaṅ metaekane ańjomkeda, “E Sạul, E Sạul cedakʼem khedeńkana?”

⁵ Sạul doe menkeda, “E Probhu Isor, am dom okoekana?”

⁶ Uniye menkeda, “Iń doń Jisu kana, okoe amem khedeńkan. Ńitokʼ do beredokʼme ar nagrahate calakʼme. Ar cetʼ cekae hoyokʼtama ona dom lại ocokʼa.”

⁷ Ar okoeko hoṛ Sạul sãoteko calakʼkan tahẽkan, onko do hahaṛakʼ tulucʼko teṅgo hapeyena. Onko do kathako ańjomkeda menkhan celege bako ńel ńamletʼkoa.

⁸ Ado Sạul ot khone beretʼena, menkhan mẽtʼe beṅgetʼketʼ khan cetʼge bae ńel ńam daṛeada. Unre acʼren sãotenko do Damesekte uniko tiyạkʼ idikedea.

⁹ Pe din hạbicʼ Sạul do mẽtʼte bae ńel ńamleda ar jom hõ cetʼge bae jomleda.

¹⁰ Damesek nagrahare Ananiạs ńutuman mitʼṭen celae tahẽkana. Probhu Isor do dorsonte uniye metadea, “Ananiạs.” Adoe menkeda, “Hẽ, Probhu Isor, nõkʼõe minạńgea.”

¹¹ Probhu Isor do uniye metadea, “Ma beretʼkate sojheko metakʼ kulhite calakʼme. Ar onḍe Jihudạwakʼ oṛakʼre Tạrsus nagraharen Sạul ńutuman mitʼṭen hoṛ khojeme.

¹² Uni doe koejoṅ kana ar dorsone ńel akada, Ananiạs ńutuman mitʼṭen hoṛ hecʼkate hoṛmoreye capoakadea jemon arhõe ńeńel.”

¹³ Ananiạse menkeda, “E Probhu Isor, ḍher hoṛkoakʼ moca khon nui hoṛ reaṅ iń ańjomakada, Jerusalemre amren hoṛko ạḍi bạṛicʼe khed akatʼkoa.

¹⁴ Ona chaḍa am ńutumte koejoṅkan hoṛko sapʼko lạgitʼ maraṅ naekeko ṭhen khon ektiạri hataokate nonḍeye hecʼakana.”

¹⁵ Menkhan Probhu Isor do Ananiạse metadea, “Do calakʼme, ente boṅgan hoṛ jạtrenko ar onkoren rajko ar Israelko ṭhen porcar lạgitʼ, iń do uni hoṛgeń bachao akadea.”

¹⁶ Ar iń iạte tinạkʼ duk jojom hoyokʼtaea onań udukʼaea.”

¹⁷ Unre Ananiạs do senkate ona oṛakʼteye boloyena ar tikin capoadeteye metadea, “E boeha Sạul, nonḍe hijukʼ jokhecʼ horre okoe do am ṭhene ńel ocolen uni doe Probhu Jisu kana. Unige iń doe kol akadińạ jemon am dom ńeńel ar sonot Jiutem perejokʼ.”

¹⁸ Unre Sạulakʼ mẽtʼ khon cuiạ̃kʼ leka phạnṭil ńurena ar ńeńele ehopʼena.

¹⁹ Ona tayom uni do beretʼenteye bạptisena ar jom ńũketʼteye daṛeyena. Ar Sạul do Damesekren celako sãote thoṛa dine tahẽyena.

Damesek ar Jerusalemre Sạul

²⁰ Ona tayom uni do bin bilomte eṭakʼ eṭakʼ sunạgogkore noa menkate porcare ehopʼena je, Jisu kangea Isorren Hopon do.

²¹ Ar okoe uniyakʼ kathako ańjomketʼ onko sanamkoge hahaṛakʼ tulucʼko kulikan tahẽkana, “Nui do cetʼ uni doe baṅkana, one Jerusalemre Jisu ńutumte koejoṅkoe khedetʼko tahẽkan? Ar nonḍehõ okoeko onkayetʼkan onko tolkate maraṅ naekeko ṭhen idiko lạgitʼge cetʼ bae hecʼakana?”

²² Menkhan Sạul do arhõe daṛe idiyena ar Jisuge Mạsikanae menteye sạbudkedea. Noate Damesekren Jihudiko do ạḍiko tharbasaoena.

²³ Ado ḍher din tayom Jihudiko do uni goje reaṅko solhawana,

²⁴ Menkhan Sạul do onkoakʼ goṭawakʼe baḍaeketʼtakoa. Ar uni goje lạgitʼ Jihudiko do nagraha reakʼ Phoṭok duạrkore siń ńindạ pahrako ehopʼena.

²⁵ Menkhan mitʼ din ạyupʼ jokhecʼ Sạulren celako do mitʼṭecʼ khạclạkʼte pạcri reakʼ jalna secʼte latarteko pheḍgotʼ kadea.

²⁶ Sạul do Jerusalem hecʼkate celako sãote gatekʼe kurumuṭukeda, menkhan onko do uniko botoraekan tahẽkana. Onko do bako pạtiạu daṛeakʼkan tahẽkana, Sạul do sạrige mitʼṭen celae hoyakana mente.

²⁷ Menkhan Barnabas do uniye soṅgekedete apostolko ṭhene idikedea are baḍae ocoketʼkoa, Damesek reakʼ horre Sạul do cetʼlekate Jisui ńelledea ar cetʼleka Probhu Isor do uni sãoteye galmaraoleda, ar Damesekre Jisu reaṅ cetʼleka dilkateye porcarleda.

²⁸ Ona tayom Sạul do Jerusalemren celako sãoteye tahẽyena ar onko sãoteye bolo oḍokokʼkan tahẽkana ar goṭa Jerusaleme dãṛãketʼa ar Probhu Isor reaṅ dilkateye porcaretʼ tahẽkana.

²⁹ Ar okoe Jihudiko Junạni pạrsiteko roṛetʼkan tahẽkan uni do onko sãoteye galmarao kan tahẽkana are reṭe peṭekʼkan tahẽkana, menkhan noko Jihudikoge uni goje lạgitʼ kurumuṭuko ehopʼena.

³⁰ Ado biswạsi boehako noako ańjomketʼ khan Kạisạriạ nagrahateko idikedea ar tayomte Tạrsus nagrahateko kolkadea.

³¹ Ona oktere Jihudạ, Gạlil ar Samariạ disạm reakʼ manḍerkore do suluk tahẽkana, ar ona manḍerko benao rakabokʼkan tahẽkana. Onate Probhu Isor botoraete ar sonot Jiu reakʼ uskurte onko doko saṅge idikʼkan tahẽkana.

Aeneas ar Dorkas

³² Patras do goṭa ṭạnḍi ạcur ạcurte Luddareko berelakan tahẽkan Isorren hoṛko ṭhene hecʼena.

³³ Ona atore Aeneas ńutuman mitʼ hoṛe tahẽkana. Uni do mitʼkaṛ gocʼ ruạte irạl bochor khon aṭetʼreye jaṛao akan tahẽkana.

³⁴ Patras do uni ńelkede khane metadea, “E Aeneas, Jisu Mạsi do ame bogeketʼmea. Ma beretʼme, ar amakʼ aṭetʼ kuṭuṅtam.” Khange uni do saṭmenteye beretʼena.

³⁵ Unre Ludda ar Sharon atoren sanam hoṛ do Aeneasko ńelkede khan Probhu Isor secʼko ạcurena.

³⁶ Joppa nagrahare Tabitha ńutuman mitʼṭen maejiu celae tahẽkana. Junạni pạrsite noa ńutum reakʼ mane do Dorkas (se Posta). Uni do jaoge eṭakʼkoe bhạlạiyetʼko tahẽkana, ar reṅgecʼ orecʼko hõe goṛowako kan tahẽkana.

³⁷ Uni do ruạ kạhilenteye gocʼena arko um saphakedete mitʼṭecʼ koṭha kandhareko dohoakade tahẽkana.

³⁸ Jappo do Ludda sorre tahẽkana; onate celako do Patras Luddare menaea menteko ańjomketʼ khan bar hoṛ uni ṭhen kolketʼkinteko nehõradea, “Am do usarate ale ṭhen baṛe hijukʼme.”

³⁹ Unre Patras do unkin soṅgeteye calaoena. Ar onḍeye seṭeren khan ona cetan koṭha kandhateko idikedea. Unre sanam rạnḍi maejiuko do Patras beṛhaete teṅgokate rarakʼko ehopʼena ar Dorkas jiwetʼe tahẽkanre okako aṅgrop ar eṭakʼ kicricʼkoe benao akatʼ tahẽkan onakoko udukʼadea.

⁴⁰ Unre Patras do sanamko oṛakʼ khone oḍokketʼkote ikhṛumenteye koekeda. Ona tayom gocʼ akan maejiu secʼ ạcurkateye menkeda, “E Tabitha ma beretʼme.” Ar inạtege Dorkas doe beṅgetʼkeda ar Patrase ńelkede khane duṛupʼena.

⁴¹ Unre Patras do ti sapʼkate uniye beretʼkedea. Ar Isorren hoṛko ar rạnḍi maejiukoe hohowatʼkote onkoe udukʼatʼkoa je, Dorkas doe jiwetʼena.

⁴² Noa katha do Joppa nagraharen sanamko baḍaekeda ar ḍher hoṛge Probhu Isorreko pạtiạuena.

⁴³ Ar Patras do Joppare Simon ńutuman mitʼṭen hoṛakʼ oṛakʼre ḍher dine tahẽyena. Ar nui Simon do mitʼṭen camar hoṛe tahẽkana.