Aposkạmi 8 - সান্তালী বাইবেল

¹ Ar onḍe Sạul hõ uni gocʼ ocokʼre rạjigeye tahẽkana. Enhilokʼ Jerusalem manḍerren hoṛko upạrte maraṅ okocʼ khed ehopʼena. Onate apostolko chaḍa sanam biswạsiko do Jihudạ ar Samariạ disạm reakʼ ṭoṭhakoreko chirchạturena.

Santao iạte biswạsikoakʼ chirchạtur

² Ar adom Isor bhokti hoṛ do Stephanko topakedea ar uni lạgitʼ ạḍiko rakʼ homorkeda.

³ Menkhan Sạul do onako manḍer marao lạgitʼ oṛakʼ oṛakʼ bolokate manḍerren herel ar maejiuko or totʼkate hajotre bhoraokoe ehopʼena.

Samariạre Philipakʼ porcar

⁴ Ado okoe biswạsiko chirchạtur akan tahẽkan onko do beṛhaete senkate Mạsiyakʼ bhage sombat porcarko dhurạuena.

⁵ Un jokhecʼ Philip do Samariạ disạm reakʼ mitʼṭecʼ nagrahate senkate Mạsi reaṅe porcarkeda.

⁶ Ar hoṛko do uniyakʼ katha ańjomkate ar uniyakʼ hahaṛa kạmiko ńelte uniyakʼko luturatʼtaea.

⁷ Ar ḍher hoṛko khon bạṛicʼ jiuko do ãṭ aṛaṅte hohowateko oḍok calaoena ar mitʼkaṛ gocʼ rog hoṛ ar leḍhako hõko bogeyena.

⁸ Onate ona nagraharen hoṛ do ạḍiko rạskạyena.

⁹ Ona nagrahare Simon ńutuman mitʼṭen hoṛ do ḍher din khon jạdukoe udukʼ ạguyetʼkan tahẽkana. Onate Samariạren sanam hoṛkoko ṭhak caba akan tahẽkana.

¹⁰ Ar acʼ do mitʼṭen maraṅ hoṛ menteye udugokʼkan tahẽkana, ar kisạ̃ṛko ar reṅgecʼko sanamkoge uniyakʼ kathako hetawakʼkan tahẽkana. Hoṛko menetʼ tahẽkana, “Isor reakʼ maraṅ daṛe oka menogokʼkan nui hoṛ kangeae ona daṛe do.”

¹¹ Ar hoṛko hõ uniyakʼ katha lekako calakʼkan tahẽkana, ente ḍher din khon uni do acʼakʼ jạdukoteye ṭhak caba akatʼko tahẽkana.

¹² Menkhan Philip do tinre Isorakʼ raj ar Jisu Mạsi reaṅ bhage sombate porcarkeda unre hoṛko do uniyakʼ kathareko pạtiạuena ar herel ar maejiukoko bạptisena.

¹³ Ar uni Simon hõe pạtiạuente bạptismae hataokeda ar Philip são sãote sanam jaegakoteye senena ar cinhạ kạmiko ar maraṅ maraṅ hahaṛa kạmiko ńelteye ṭhak utạrena.

¹⁴ Ado Jerusalemren apostolko do tinreko ańjomkeda Samariạren hoṛko Isorakʼ kathako ataṅakada unre Patras ar Johan do onko ṭhenko kolkatʼkinạ.

¹⁵ Patras ar Johan do hecʼkate onko lạgitʼkin koekeda jemon sonot Jiuko ńame,

¹⁶ ente unhạbicʼ hõ onko cetanre sonot Jiu do bae hecʼakan tahẽkana; eken Probhu Jisu ńutumte onko doko bạptis ocoakan tahẽkana.

¹⁷ Unre Patras ar Johan do onkokin capoketʼkoa, ar onko do sonot Jiuko ńamkedea.

¹⁸ Ado apostolkin ti capokate sonot Jiukin emokʼkane ńeltʼketʼ khan Simon do unkin ṭhen ṭaka ạgukateye menkeda,

¹⁹ “Iń hõ noa daṛe imạń ben jemon jãhãegeń capoye unige sonot Jiue ńame.”

²⁰ Unre Patras do uniye metadea, “Amakʼ ṭaka do am sãotege nosṭokʼma, ente am dom hudisetʼkana Isorakʼ dan do ṭakate kirińokʼa.

²¹ Ạlińakʼ noa kạmire amakʼ bakhra se ạidạri do bạnukʼtama, ente Isor samaṅre amakʼ ontor do baṅ sojhetama.

²² Amakʼ dusṭami khon mon ạcurtam ar Probhu Isor ṭhen koejoṅme; enḍekhan amakʼ mon reakʼ noa bạṛicʼ hudis pasere pase uni doe ikạiytam.

²³ Ińiń ńel ńameda, amakʼ mon do lalocte perecʼgea ar am do kại reakʼ tonolre menama.”

²⁴ Unre Simone roṛ ruạṛkeda, “Abenge Probhu ṭhen iń lạgitʼ koeben jemon aben okaṭakʼ ben roṛakatʼ ona ińre alo hoyokʼ.”

²⁵ Inạ tayom Patras ar Johan do Probhu Isor reaṅ goha emkate Jerusalemtekin ruạṛ calaoena. Ar calakʼ calakʼte unkin do Samariạkoakʼ aema atokore bhage sombatkin porcar idikeda.

Philip ar Ithipiạren raj kạmiạyicʼ

²⁶ Mitʼ din Probhu Isorren mitʼṭen goḍet do Philipe metadea, “Ma beretʼme, ar dạkhin secʼ calakʼme, one okaṭakʼ hor do Jerusalem khon Gasa nagraha secʼ calao akan ona horte calakʼme.” Ona hor do nisungea.

²⁷ Unre Philip do ona secʼe calaoena. Ar horre Ithipiạ disạmren mitʼṭen maraṅ raj kạmiạ hoṛ soṅgeteye ńapamena. Uni raj kạmiạyicʼ do cạkrại tahẽkana. Ithipiạren Kandake rạniyakʼ dhon-duribko ńel todarot reakʼ bhar do nui hoṛ cetanrege tahẽkana. Uni kạmiạyicʼ do Isor sewawae lạgitʼ Jerusalemteye senlena.

²⁸ Ado oṛakʼteye ruạṛkan tahẽkanre uni do sadom gạḍire duṛupʼkate Jesaea nạbi reakʼ puthiye paṛhao joṅkan tahẽkana.

²⁹ Unre sonot Jiu do Philipe metadea, “Do, ona gạḍi ṭhen sorokʼme ar uni sãote calakʼme.”

³⁰ Khange Philip do ona gạḍi ṭhene ńir sorena ar uni hoṛ do Jesaea nạbi puthi khon paṛhaokʼ kane ańjomkedea. Adoe kulikedea, “Okaṭakʼem paṛhaoetʼkan ona do cetʼem bujhạu daṛeakʼ kangea?”

³¹ Uni kạmiạyicʼe menkeda, “Jãhãe bae bujhạuạń khan cekateń bujhạu daṛekea?” Uni do Philipe nehõradea jemone dejokʼte acʼ ṭhene duṛupʼ.

³² Uni kạmiạyicʼ do sonot sostor khon okae paṛhaoetʼ tahẽkan ona do noage; mage lạgitʼ bheḍa cetʼlekae idi ocokʼ onkage uni doe idi ocoyena. Kạpciyicʼ samaṅre bhiḍi hopon cetʼleka thir akane tahen, onkage uni do moca bae jhicʼletʼtaea.

³³ Uni doe bemanot ocoyena, unire hok reakʼ bicạr do baṅ hoylena. Uniyakʼ bõs reakʼ katha do ohoge lại daṛelena, ente dhạrti khon uniyakʼ jion do hatao akantae tahẽkana.

³⁴ Uni raj kạmiyạ hoṛ do Philipe metadea, “Dayakate lạiyạńme, nạbi do okoe reaṅ noa kathae roṛakada? Acʼ reaṅ, se eṭakʼ jãhãe reaṅ?”

³⁵ Unre Philip do sonot sostor reakʼ ona hạṭiń khon ehopʼkate uni ṭhen Jisu reaṅ bhage sombate porcarkeda.

^36-37 Ado hortekin calakʼkan tahẽkanre nonkan mitʼṭecʼ jaegarekin hecʼena one okare do dakʼ tahẽkan. Unre uni raj kạmiyạ hoṛ doe menkeda, “Nõkʼõe ńelme, nonḍe do dakʼ menakʼa; ar ińiń bạptis ocokʼre tạkicʼakʼ jãhãnakʼ cetʼ menakʼa?” Unre Philipe menkeda, amakʼ goṭa montem pạtiạu akan khan ma bogege. (Uni hoṛ do roṛ ruạṛketʼteye menkeda pạtiạukʼ kangeạń Jisu Mạsi do Isorren Hopon kanae mente).

³⁸ Uni do gạḍi teṅgoe lạgitʼe hukumkeda. Ona tayom Philip ar uni rajren kạmiyạ hoṛ do dakʼrekin pheḍena ar uni doe bạptisena.

³⁹ Ado dakʼ khonkin rakapʼen khan Probhu Isorren Jiu do ackage Philipe idikedea. Ar uni cạkrạ hoṛ do ghuriạ Philip bae ńel ńamledea. Unre uni do rạskạte oṛakʼe calaoena.

⁴⁰ Menkhan Philip do Asdod nagrahareye ńelena. Ar uni do ato ato bhage sombat porcar porcarte mucạtʼre Kạisạriạteye calaoena.