Aposkạmi 4 - সান্তালী বাইবেল

Maraṅ bạisi samaṅre Patras ar Johan

¹ Patras ar Johan do tinre hoṛkokin galmarao akokan tahẽkana unre naekeko, mundilren mukhiyạko ar Sạdukiko hõ unkin ṭhenko hecʼena.

² Onko do ạḍiko edre akan tahẽkana, ente Patras ar Johan do hoṛkokin cetʼakokan tahẽkana ar Jisu hotete gocʼko arhõ jiwetʼ beredokʼ reaṅ kin porcaretʼ tahẽkana.

³ Onko do Patras ar Johanko sapʼketʼkinạ ar ạyupʼ akan tahẽkante dosar hilokʼ hạbicʼ hajotreko dohokatʼkinạ.

⁴ Menkhan okoeko Patrasakʼ kathako ańjomletʼ onko modren ḍher hoṛgeko pạtiạuena; ar nonkate biswạsi hoṛko ḍher idiyente mõṛẽ hajarko hoyena.

⁵ Ado dosar hilokʼ Jihudikoren maraṅ naekeko, murubbiko ar sostor baḍaeko do Jerusalemreko jarwa mitʼena.

⁶ Onḍe do maraṅ naeke Hannas hõe tahẽkana. Ona chaḍa Kaeapha, Johan, Aleksander ar maraṅ naekeakʼ gharońjren eṭakʼ hoṛko hõko tahẽkana.

⁷ Onko do Patras ar Johan ako talare teṅgoketʼkinteko kuliketʼkinạ, “Aben do cetʼ reakʼ daṛete se okoe ńutumte noa ben kạmikana?”

⁸ Unre Patras do sonot Jiuteye perecʼente onkoe metatʼkoa, “Maraṅ naekeko ar murubbiko,

⁹ ạliń do mitʼṭen leḍha hoṛliń bogekedete teheńpe kuliyetʼlińạ, uni hoṛ do cekateye bogeyena.

¹⁰ Enḍekhan ape ar sanam Israelko noa katha baḍae dohokakʼpe je, Nasaretren Jisu Mạsi, okoe dope kuruslede ar okoe do gocʼko khon Isore jiwetʼ beretʼkede, uniyakʼ daṛetege nui hoṛ doe bogeyente ape samaṅreye teṅgo akana.

¹¹ Sonot sostor reakʼ katha leka Jisu Mạsi kangeae ‘ona dhiri do, one okaṭakʼ raj mistiriko, metakʼme apepe nihạ̃t giḍiletʼ; ar onage konac reakʼ asolakʼ dhiri do hoyena.’

¹² Kại khon bańcao do ar okoe ṭhen khon hõ oho ńamlena, ente serma latarre, manwako talare nonkan okoege bạnukʼkoa one uniyakʼ ńutumte kại khon bańcao bon ńam daṛeke.”

¹³ Ado Patras ar Johanakʼ dil ńelte ar bin bidiyạwan ar ne hoṛkanakin menteko baḍaeketʼ khan onko mukhiyạko doko hahaṛayena, ar noa hõko bujhạukeda je unkin hõ Jisu sãotekin tahẽkana.

¹⁴ Ar okoeye boge ocoyen uni do Patras ar Johan sãote teṅgo akanko ńelkede khan unkin upạrte roroṛ reakʼ ar cetʼge baṅ tahẽlen takoa.

¹⁵ Onate onko do maraṅ bạisi khon oḍok calakʼ lạgitʼko hukumatʼkinạ. Ar inạ tayom onko do mitʼ ṭhenko jarwayente sopolhako dhurạuena.

¹⁶ Onkoko menkeda, “Nukin hoṛ do cetʼbon cekakinạ? Ente Jerusalemre okoeko tahenkan onko do jotogeko baḍaekeda je, nukin do mitʼṭecʼ hahaṛawakʼkin kạmi akada, ar ona do abo hõ babon baṅ daṛelea.

¹⁷ Menkhan disạm hoṛko talare kathako jemon ar alo pasnaokʼ onate nukin hoṛ do botor udukʼ ạkin hoyokʼa, jemon Jisu reaṅ ar okoe hõ alokin galmaraoako.”

¹⁸ Noa tayom Patras ar Johan do arhõ bhitriteko hohowatʼkinte noako hukumatʼkinạ jemon unkin do Jisu reaṅ ar cetʼge alokin lạiyako se alokin cetʼako.

¹⁹ Patras ar Johan dokin roṛ ruạṛkeda, “Apeakʼ hukum liń manaoa se Isorakʼ hukumko liń senakʼa? Isorakʼ mẽtʼãhã samaṅre okaṭakʼ ṭhika, ona do apege bicạrpe.

²⁰ Ạliń do okaliń ńelakatʼ arliń ańjomakatʼ ona begor lạite do ohoge liń tahẽdaṛelena.”

²¹ Unre onko do Patras ar Johan arhõ botorko udukʼatʼkinte unkinko aṛakʼkatʼkinạ. Onko do hoṛkoko botoratʼkote bako goṭa daṛeada cetʼ lekateko sạjạikinạ mente, ente oka hoyakan onate joto hoṛge Isorko sarhaoedekan tahẽkana.

²² Ar okoe hoṛe bogeyen uniyakʼ umer do pongel bochor khon hõ bạ̃ṛti tahẽkantaea.

Biswạsikoakʼ koejoṅ

²³ Ado onḍe khonkin aṛakʼ ocoyen khan unkin do ạkinren hoṛko ṭhenkin calaoena ar maraṅ naekeko ar murubbiko cetʼ cetʼko metatʼkin tahẽkan ona sanamakʼ do onkokin baḍae ocoketʼkoa.

²⁴ Noa katha ańjomkate onko do mitʼ monte Isor ṭhen nonkako koekeda,” E Probhu Isor, am do serma ar ot ar jalapuri ar onare menakʼ jotowakʼem sirjạu akada.

²⁵ Am do sonot Jiu hotete amren golam aleren hapṛam Dạudakʼ mocatem menakada, ‘Sanam jạtren hoṛko do cetʼ iạte akbakteko kikiạukʼ kana? Ar cedakʼ hoṛko do ạuṛiyakʼko soṛojontro kana?

²⁶ Probhu Isor ar uniren Mạsi upạrte dhạrtiren rapajko do mitʼ domteko teṅgoyena, ar cakʼlaoko do mitʼ ṭhenko jarwayena.’

²⁷ “Amren sonot guti Jisu, okoe do Mạsi mentem bahal akade, uni upạrte Herod raj ar Pontus Pilạt do noa nagraharege boṅgan hoṛ jạtrenko ar Israelko sãote uni upạrte tikin milạuleda.

²⁸ Amakʼ daṛe ar sanate oka hoyokʼa mentem goṭa doholetʼ tahẽkan onko do onageko onkakeda.

²⁹ Ar ńitokʼ do E Probhu Isor, cetʼ lekako botor ocoyetʼle ona dom ńeletʼkangea. Amren gutiko nonkan daṛe baṛe emakom jemon dil salakʼ amakʼ kathako lại sodor daṛeakʼ.

³⁰ Amakʼ ti tiyạrtam jemon amren sonot guti Jisu ńutumte onko do hoṛkoko boge daṛeako ar hahaṛa kạmi ar cinhạkoko udukʼ daṛeakʼ.”

³¹ Ado oka jaegare onkoko jarwa mitʼ akan tahẽkan, koejoṅ tayom ona jaega do dal dalaoena. Ar onko sanamkoge sonot Jiuteko perecʼente dil salakʼ Isorakʼ katha lạlạiko ehopʼena.

Biswạsiko okako cekayetʼ tahẽkan

³² Mạsire pạtiạu akan sanamkoge mon ar jiwite mitʼko tahẽkana. Onko do okaṭakʼge apnarakʼ kana mente bako dạbiyetʼkan tahẽkana, bickom sanamakʼge apan ạpin jạruṛakokan lekako beoharetʼ tahẽkana.

³³ Ar apostolko do maraṅ daṛe salakʼ gohako em idiyetʼ tahẽkana je, Probhu Jisu do gocʼko khone jewetʼ beretʼ akana ar sanamko cetanre Isorakʼ maraṅ daya do tahẽkana.

^34-35 Onko modre okoe hõ reṅgecʼ do bako tahẽkana, ente okoekoakʼ ot-baṛge se oṛakʼ-duạr tahẽkan onko do onako ạkhrińkate ṭaka-poesa ạgukate apostolkoakʼ jaṅga ṭhenko dohoyetʼ tahẽkana. Ar tayomte onko do mimitʼ hoṛ jạruṛako lekako em hạṭińako kan tahẽkana.

³⁶ Lewi bõsren Joseph ńutuman mitʼṭen hoṛe tahẽkana. Uni do Kupriko metakʼ dipre oṛakʼ tahẽkantaea. Apostolko do Barnabasko bahnakedea torjomate do jiwi raṛecʼren hoponko hohowaekan tahẽkana.

³⁷ Uniyakʼ do mitʼṭecʼ goḍa tahẽkantaea; ar onae ạkhrińketʼte ṭaka ạgukate apostolkoakʼ jaṅga ṭhene dohokeda.